¹ Retia ty safa i Davida farany----Davida anakilahy i Jese, azy lahilahy le vatany namea voninahitsy, ay lahilahy ze nohosoran-Ndranahare i Jakoba iny, azy mpanao salamo soasoan'Israely . '' ² Ty fanahy Yaveh mivola tamy alalako, sady tamy lelako teo ty safany. ³ Nivola ty Ndranahare Israely, nivola tamiko manao hozao ty Vatolampy Israely: 'Azy manapaky ty olo amy ha to, azy manapaky amy fahavaka an-Dranahare iny. ⁴ Ie le manahaky ty fahazava ty maray lafa miposaky ty masoandro, maray tsy misy raho, lafa mitiry baka amy ty tany ty akata maintso amy alala ty fipiriaha ty masoandro afara ty ora. ⁵ Eka vatany, tsy manahaky zay anatrehan-Dranahare va ty longoko? Tsy fa nanao fanenkea mandrakizay, voalahatsy noho azo antoky amy fomba iaby tamiko va Ie? Vasa tsy mampitombo ty faniriako iaby va Ie? ⁶ Kanefa tsy maeva le ho manahaky ty fatiky aria iaby, safe tsy voavory ty tanan'olo rey . ⁷ Ty olo ze mikasiky androzy le tsy maintsy mampiasa fitaova vita baka amy ty vy ndra kititsin-defo. Tsy maintsy oroa amy ze ipetrahany rey.''' ⁸ Retia iaby ty nara ty miaramila mahery tiahy Davida: Josebala azy Takeminita iny ro mpitariky ty miaramila mahery. Nahafaty lahilahy valonjato tanay ty andro raiky ie. ⁹ Manorikoriky azy i Eleazara, anakilahy i Dodo, anakilahy i Ahohita, azy raiky amy lahilahy telo maheriny tiahy Davida. Teo ie tamy naharendrozy ty Filistina ze nivory niharo mba hialy, noho tamy nihemora ty lahilahy Israely. ¹⁰ Nitsanga i Eliazara sady nialay tamy Filistina zisiky mahavozaky ty tanany sady nipitiky tamy taho ty mesobe teo ty tanany. Nanday fandresea bevata tamy zay andro zay Yaveh. Nimpoly nanoriky any Eleazara ty miaramila, mba hitimpo ze maty fahatany avao. ¹¹ Nanoriky azy i sama anakilahy i Age, azy hararita iny. Niara nivory tamy zay nisy tany ty lojy ty Filistina, le ty miaramila nilay androzy. ¹² Fa i Sama le nitsanga tanivo ty baibo ao sady niaro anizay. Novonoany ty Filistina, sady nanday fandresea bevata Yaveh. ¹³ Ty telo tamy miaramila telopolo le nijotso tamy Davida tany tamy ty fotoa ty fiakara ty vokatsy, tamy ty fivonia ty Adolama tao. Nivory tam-baibo i Refaita teo ty miaramila Filistina rey. ¹⁴ Tamy fotoa zay i Davida le tamy fiarova mare, lakato raiky, lafa nipetraky ta Betlehema tao ty Filistina. ¹⁵ Nila rano i Davida le hozao tiasany: ''Laha mba misy olo manome ahy rano honomikko baka amy vovon-drano a Betlehema tao, azy vovo anila ty vavahady henanizao!'' ¹⁶ Le nanapatapaky ty miaramila Filistina rey azy lahilay telo matanjaky rey le nangalaky rano baka amy ty vovon-drano anila ty vavahady eo. Nalandrozy ty rano le nandesiny tamy Davida any, fe tsy nanenky hino anizay ie.Fa rarany hoahy Yaveh avao zay. ¹⁷ Bakeo le hozao tiasany: ''Yaveh lahy, sanatria laha manao manahaky zay zaho. Tokony hino ty lio ty lahilahy ze nanao soro ty ainy va zaho?'' Le nada tsy hino anizay ie. Ay raha rey ty nanovy ty lahilahy telo matanjaky. ¹⁸ Abisay, rahalahy Joaba sady anakilahy i Zeroia, ro kapitenindrozy telo. Nialy tamy lahilahy telo arivo lahy ie sady namono androzy tamyty lefp. Voatona tsikanikany niaraky tamy miaramila telo ie. ¹⁹ Tsy nalaza tany azy lahilahy telo va ie? Nanovy kapitenindrozy ie. Fe, ty lazany le tsy mifanahaky tamy ty laza ty miaramila lahilahy telo malaza mare. ²⁰ Benaia baka a Kabezela any le anakilahy i JOiada; ie le halilahy matanjaky ze nanao asa bevata. . Namono ty anakilahy i Ariela roe ta MOaba tany ie. Nijotso tanay ty lavaky avao koa ie sady namono liona tamy mbo nisy ora ty nintsy iny. ²¹ Le namono lahilahy Egyptiana lako ie. Nana lefo tan-tanany teny azy Egyptiana iny, fe tamy kobay avao ro nialia i Benaia taminy. Nafahany tamy tana Egyptiana iny ty lefp le tamy lefony avao ro namonoany azy. ²² Benaia anakilahy Joiada ro nanao anizay asa bevata zay, le nankalaza niaraky tamy ay lahilahy telo matanjaka ie. ²³ Laha ty tena ie le nalaza tany miaramila telopolo rey ie, fe tsy le vatany nalaza manahaky ty miaramila lahilahy telo matanjaka mare. Fe i Davida nampiakatsy azy ho mpiamby azy. ²⁴ Anay ty telopolo azy lahilahy manoriky retia: ''Asahela rahalahy i Joaba, Elanana anakilahy i Dodo baka a Bethlehema tany, ²⁵ Sama azy Harodita iny, Elika azy harodita iny, ²⁶ Heleza azy Paltita iny, Sady anakilahy Ikesy azy Tekoita iny, ²⁷ Abiezera azy Anatotita iny, Mebonay azy HOsatita iny, ²⁸ Zalmona azy Ahohita iny, Maharay azy Netofatita iny; ²⁹ haleba anakilahy i Bana, azy Netofatita iny, Itahy anakilahy i Ribay baka a Gibea tariha i Benjamina, ³⁰ Benaia azy Piratonita iny, Hiday baka amy tany malemy i Gasy. ³¹ Abi-albonaazy arbatita iny, Azmaveta azy Psaromita iny, ³² Eliaba azy Salbonita iny, anakilahy i Jasena, Jonatana anakilahy i Sama azy Hararita iny; ³³ Ahiama anakilahy i Sarara azy Harirata iny, Elifeleta anakilahy i Ahasbay azy Makatita iny, ³⁴ Eliama anakilahy i Ahitofelaazy Gilonita iny, ³⁵ Hezray azy Karmelita iny, Paray azy Arbita iny, ³⁶ Jigala anakilahy Natana baka a Zoba any, Bany baka amy fokoa i Gadita, ³⁷ zaleka azy Amonita iny, Naharay azy Berotita iny, mpanday ty fitaovam-pialia hoahy i JOba anakilahy i Zeroia, ³⁸ Ira azy Jitrita iny, Gareba azy Jitrita iny, ³⁹ Oria azy Hetita iny---- telopolo fito amby ndrozy iaby.