¹ Le nivola tamy i Absaloma i Ahitofela: ''Engaho zaho hitingy lahilahy ray aly sy roa arivo, sady hitsanga sady hanohitsy any Davida zaho androany haly. ² Ho avy aminy eto zaho lafa ie mbo vozaky noho malemy iny sady hapoky azy amy havaka zaho. Hilay ty olo ze miaraky aminy, le ty mpanjaka avao ro tafihiko. ³ Handesiko mimpoly aminao iaby ty olo, manahaky ty ampela ampakary avy amy valiny eo, le ty olo iaby hilamy ambany fahefanao.'' ⁴ Zay ty vola i Ahitofela le nankasitraha i Absaloma noho loholon'Israely iaby. ⁵ Le hozao tiasa Absaloma: ''Kaiho avao koa i Hosay azy Arkita iny henanizao, le engaho tsika hahare ze ty volany.'' ⁶ Lafa niavvy tamy Absaloma eo i Hosay, le nazavay Absaloma taminy zay nivolany Ahitofela sady nanontany any Hosay manao hozao ie: ''Tokony hanao ze nivolany Ahitofela va tsika? Laha aha, volano anay ze tororhevitsinao.'' ⁷ Le nivola tamy Absaloma hozao i Hosay: '' Tsy soa ty torohevitsy ze namea i Ahitofela tamy toy.'' ⁸ Le nanampy ihozao i Hosay: ''Hainao fa mpialy mahery ty babanao noho lahilahiny rey, sady meloky ndrozy, sady manahaky bera trobo anaky ambaibo. Lahilahy mpaaly ty babanao; tsy hiroror miaraky amy miaramilaie androany haly. ⁹ Ingo, mety mivony an-davaky any na amy toera hafa any ie zao. Lafa misy maty amy ty fiatomboha ty fanafiha ty lahilahinao ilany, ndra ia ndra ia mahare anizay le tsy maintsy mivola hozao: ''Misy famonoa miseho amy miaramila ze manoriky any Absaloma rey.' ¹⁰ Ka ndra ty miaramila be herim-po mare aza, ze manahaky ty fo ty liona ty fondrozy, le havaka safe hainy Israely iaby fa lahilahy mahery ty babanao, sady lahilahy miaraka aminy le vatany matanjaka. ¹¹ Lafa zay le manoro hevitsy anao zaho fa tokony havory miaraka aminao eto ty Israely iaby, manomboky a Dana any le zisiky a Beri-sheba any, ze lako isa manahaky ty fasy amoro ty riaky eo, sady le ty vatatenanao mihintsy ro handeha hialy. ¹² Bakeo le ho avy aminy ao zahay ndra aia ndra iia ro mety ahita azy, sady handomboky azy manahaky ty ando miravoky amy tany zahay. Tsy misy enganay ho velo ndra ty raiky amy ty olony, ndra ty vatany aza. ¹³ Laha mila amy tana raiky any ie, le handay taly ho amy tana zay any ty Israely iaby le ho tarihinay ho amy renirano any zay, zisiky tsy hisia ndra vato kely raiky aza hita ao.'' ¹⁴ Le hozao tiasa Absaloma noho lahilahy Israely : ''Ty torohevitsy Hosay azy Arkita iny le soa mandilatsy any Ahitofela.'' Yaveh le nampisy tsy fanenkea ty torohevitsy soa any Ahitofela mba handat loza amy Absaloma eo. ¹⁵ Le hozao tiasa i Hosay tamy zadoka noho tamy Abiatara mpisoro: ''Ahitofela nanoro hevitsy any Absaloma noho ty loholon'Israely tamy ty fomba manahaky zay, fe zaho mana hevitsy hafa. ¹⁶ Le henanizao, mandina malaky sady tatero amy Davida any; Volano hozao ie: 'Ka mivory amy fita i Araba ao androany haly, fa miampita amy ty kila fomba iaby, laha tsy zay le ho voately miaraky amy olo iaby ze manoriky ty mpanjaka.''' ¹⁷ Le i Joanatana noho Ahimaza nipetraka tamy loharano i En-rogela tany. Nisy ampela mpanompo nanovy handeha noho hampahay androzy amy ze tokony ho haindrozy, fa tsy natahora ho hita ty filiran-drozy an-tanaao. Lafa niavy ty hafatsy, le nandeha sady nivola tamy Davida Mpanjaka ndrzy. ¹⁸ Fe nisy pamaraky nahita androzy tamy fotoa io le nivola amy Absaloma. Le niboaky malaky i Jonatana noho Ahimaza sady nandeha an-trano lahilahy raiky ta Bahorima tao, ze nana vovo tantokontany, tao ty nijotsoan-drozy. ¹⁹ Nangalaky ty fandongofa vovo iny ty valy lahilahy iny sady nandomboky anizay tamy vava ty vava ty vovo, sady nanaparitaky vary taminizay teo, le tsy nisy nahay fa tanay vovo i Jonatana noho Ahimaza. ²⁰ Niavy tan-trano ampela iny tao ay lahilahy Absaloma rey le nanao hozao: '' Aia i Ahimaza noho Jonatana?'' Hozao tiasa ampela iny tamindrozy: ''Fa niampita ty rano ndrozy.'' ka lafa baka nagnenty ty manodidy ndrozy le tsy nahita androzy, le nimpoly ta Jerosalema tany. ²¹ Lafa nandeha ndrozy le niakatsy baka anay vovo i Jonatana noho i Ahimaza. Nandeha nitatitsy tamy Davia Mpanjaka ndrozy; hozao tiasany taminy: ''Mitsangana le miampita malaky ty rano safe i Ahitofela fa nanome torohevitsy manahaky zao zao momba anao.'' ²² Le nitsanga i Davida noho ty kila olo iaby ze niaraky taminy, le niampita any Joradana ndrozy. taloha ty andro maray le tsy nisy tafita any Joradana ndrozy. ²³ Lafa nihita i Ahitofela fa tsy norihany ty torohevitsiny, le nanisy fipetraha ty borikiny ie le nandeha. Noly tan-tanany tany ie, nandamy rahalahiny rey, le nampihanto ty vatany. Tamy fomba zay ty nahafaty azy le nalevy tamy lolo ahy babany ie. ²⁴ Bakeo i Davida le niavy ta Mahanaima tany. Laha ty amy Absaloma, le niampita any Jordana ie, ie noho lahilahy Israely iaby niaraky taminy. ²⁵ Le i Absaloma nanennga any Amsa fa tsy i Joaba hifehy ty miaramila. Amasa le anakilahy i Jitra azy Ismaelita iny, ze nandry niaraky tamy iAbigaila, ze anakampela i Nahasa sady rahavavy Zeroia, reniny Joaba. ²⁶ Le Israely noho Absaloma le nivory tamy tany Gileada tao. ²⁷ Lafa niavy tao i Mahanaima i Davida, i Sobyanakilahy Nahasa baka a Raba amy Amonita ao,noho Makira anakilahy Amiela baka a Lo-debara ao, le i Barzilay azy Gileadita baka aRogelima any, ²⁸ le nanday kitrely noho kotsy, vinga, valany, noo vary, kobam-bary hordea, lango, tsaramaso, lojy, ²⁹ tantely, dibera, aondry, le ronono mandry, mba hahaiza i davida noho olo niaraky taminy mihina. Hozao tiasa lahilahy rey: ''Mosare, vozaky,le marandrano anefitsy any ty olo.''