¹ Le Joaba anakilahy Zeroia le ahay fa naniry te hahitaky any Absaloma ty fo mpanjaka. ² Lafa zay le nandefa safa hoahy i Tekoa i Joaba le nanday ampela hendry taminy tany. Hozao tiasany tamy ampela iny: ''Mba mangataka lahy mba anovo kisary misaona iha sady misikina siky fisaonana. Mba mangataka lahy mba ka milemy soliky ty vatanao, fa manaova manahaky ty ampela misaona ty maty fa ela. ³ Bakeo le mandina amy mpanjaka any le volano aminy ty mikasiky ty ze raha ho soritako.'' Le nivolany Joaba taminy ty safa ze tokony ho volaniny amy mpanjaka. ⁴ lafa nivola tamy mpanjaka ampela baka a Tekoa iny, le nampandohaliky ty vatany tamy tany iele nanao hozao: '' Ampeo zaho, lahy mpanjaka.'' ⁵ Le hozao tiasa mpanjaka taminy: '' Ino ty raha mahazo ?'' Namaly hozao ie: '' Ty to le tsy manam-baly zaho, le nimaty ty valiko.'' ⁶ Zaho ro mpanomponao,le managnanaky lahilahy roe, le nialy tambaibo eny ndrozy , le tsy nisy nanaraky androzy. Ty raiky nalemy le ty raiky nahafaty azy. ⁷ Henanizao le mitsanga hanohitsy ty mpanomponao ty longo iaby, le hozao tiasandrozy: '' Aseseo ty lahilahy ze namono ty rahalahiny, mba hamonoa azy ho maty, mba hanonotsy ty ay rahalahiny ze fa nivonoany.' Le ho voanoandozy avao koa ty mpandova. Le manahaky zay avao koa ty hangalandrozy ty bolon'afo mirehitsy ze nengako, sady tsy hanenga anara ndra taranaky anabo ty tany hoahy ty valiko ndrozy.'' ⁸ Le hozao tiasa mpanjaka tamy ampela iny: ''mandina an-tranonao any, le handidy raha hanovy ho ahinao zaho.'' ⁹ Le namaly hozao ty mpanjaka azy ampela Tekoa iny: '' Iha mpanjaka, tompoko, engaho ho amiko noho ho amy ty longo ty babako ty fahadisoa. Tsy mana-hakeo ty mpanjaka noho ty sieza fiadanany.'' ¹⁰ Namaly hozao ty mpanjaka: ''Ndra ia ndra ia mivola raha aminao, le andeso amiko atoy ie, le tsy hitolo anao sasy ie.'' ¹¹ Le hozao tiasany: '' Mba manngataka lahy, tokony hahatiaro any Yaveh Ndranaharinao ty mpanjaka, le tsy handrava ndra ia ndra ia lakolako mare ty mpamaly lio, mba tsy handravandrozy ty anakilahiko.'' Le namaly hozao mpanjaka iny: '' Laha mbo velo avao Yaveh, le tsy hisy ndra singam-bolo raiky amy anakinao aza hihintsa amy tany.'' ¹² Le hozao tiasa ampela iny: ''Mba mangataka lahy mba engaho ty mpanomponao mba hivola toviny safa amy tompoko azy mpanjaka iny.'' ¹³ Le hozao tiasany: '' Mivolana.'' Le hoasa ampela iny: '' Le manino ary iha mieritseritsy raha manahaky zay amy olo Ndranahary? Amy fivolana raha zay, le manahaky ty olo ze manao fahadisoa ty mpanjaka, safe tsy mbo nanamboly ndraiky ty anakilahiny voaroaky ty mpanjaka . ¹⁴ Fa tsy maintsy ho maty tsika iaby, sady manahaky ty rano araraky amy tany tsika, ze tsy afaky ala sasy. Fa Ndranahare tsy hangalaky ty ay; fe , mahita lala hoahy ze voaroa Ie mba ho ampoliny ndraiky. ¹⁵ Le henanizao e, avy hivola raha zao amy mpanjaka tompoko zaho, zay safe nampitahory olo rey zaho. Vasa tanteraky ty fangataha ty mpanompo ty mpanjaka. ¹⁶ Safe hijanjy ahy ty mpanjaka, mba hanolora ty mpanompony ho afaky amy tana ty lahilahy ze handrava ahy noho ty anakilahiko, ho afaka amy lovan-Dranahare.' ¹⁷ Bakeo le nivavaky hozao ty mpanomponao: ''Yaveh lahy, engaho hanameva ahy ty safa ty mpanjaka tompoko, safe manahaky ty anjely Ndranahare, le manahaky anizay koa ty mpanjaka tompoko amy ty fivolana ty soa baka amy ty raty.' Hiaro anao lahy Yaveh Ndranaharenao.'' ¹⁸ Bakeo le namaly ty mpanjaka le nivola tamy ampela iny manao hozao: ''Mba mangataka lahy mba ka avony amiko ze anontaniako anao iaby.'' Le namaly hozao ampela iny: ''Engaho hivola ty mpanjaka tompoko henanizao.'' ¹⁹ Le hozao tiasa mpanjaka: '' Va tsy miaraky aminao amy kila tany iaby zao ty tana i Joaba?'' Le namaly ampela iny le nanao hozao: '' Laha mbo velo avao iha, lahy mpanjaka tompoko, le tsy misy afaka hilay mban-kavana ndra ankavia amy ty kila raha iaby ze nivolany mpanjaka tompoko. I Joaba mpanomponao ro nandidy ahy noho nivola tamiko mba hivola raha ze nivolany ty mpanomponao rey. ²⁰ Fa nanao anizay i Joaba mpanomponao mba hampiova ty raha miseho. Hendry ty tompoko, manahaky ty fahendrea ty anjely Ndranahare, sady hainy ty raha iaby ze miseho amy tany eo.'' ²¹ Le hozao tiasa mpanjaka tamy Joaba: Ingoe, hanao ze raha zay zaho. Mandina, le andeso mimpoly azy pamaraky Absaloma iny.'' ²² Lafa zay i Joaba le nampandongaliky ty vatany tamy tany ho voninahitsy ty fisaora any mpanjaka. HOzao tiasa i Joaba: '' Henanizao le hay ty mpanomponao fa nahita sitraky tamasonao teo zaho, lahy mpanjaka tompoko, amy fanatantera ty mpanjaka ty fangataha ty mpanompony.'' ²³ Le nitsanga i Joaba, e nandeha a Gesora any, le nanday any Absaloma nimpoly ta Jerosalema tany. ²⁴ Hozao tiasa mpanjaka: '' Engaho ie himpoly an-tranony any, fa ka enga hahita ty tarehiko.'' Lafa zay le nimpoly tan-tranony tany manoka i Absaloma, fa tsy nahita ty tarehy mpanjaka. ²⁵ Le heniky Israely le tsy nisy olo nankalaza tamy hahatovolahy mandilatsy any Absaloma. Baka amy lelatombony any le zisiky amy ty tampo-dohany any le tsy nisy handra taminy tany. ²⁶ Lafa saky faran-tao ie manampaka ty volondohany, safe navesatsy aminy zay, le nolanjany ty volony; milanja amy roanjato sekely ao vasa zay, ze lanja amy fandanja ty mpanjaka. ²⁷ I Absaloma le niteraky lahilahy telo noho ampela raiky, Tamara ro anarany . Ampelasoa ie. ²⁸ Feno roa tao ta Jerosalema tao nipetraha i Absaloma, fa tsy nahita tarehy mpanjaka. ²⁹ Bakeo i Absaloma le nandefa safa tamy Joaba teny mba handefa azy amy mpanjaka, fe tsy niavy tamy Joaba. Le nandefa safa fanindroa i Absaloma, kanefa tsy mbo niavy avao i Joaba. ³⁰ Le hoasa i Absaloma tamy mpanompony rey: '' Ingo, anila tiahy ty tanimbary Joaba, sady mana vary hordea ao ie. Mandina le oro zay.'' Le noroa mpanompo Absaloma azy tanimbary iny. ³¹ Bakeo le nitsanga i Joaba le nandeha amy Absoloma tan-tranony tany, le nanao taminy manao hozao: '' Manino no noroa mpanomponao rey ty tanimbariko?'' ³² Le namaly any Joaba i hozao i Absaloma: ''Ingo, nandefa safa taminao zaho nanao hozao: 'Miavia atoy mba afahako maniraky anao ho amy mpanjaka any mba hivola hozao: '' Nanino zaho ro niala ta Gesora tany? Soa mare ho tiahy ty mbo miegny agny. Lafa zay e le engaho zaho hagnety ty tarehy mpanjaka, ka laha diso zaho, le engaho ie ro hamono ahy.''''' ³³ Le nandeha amy mpanjaka any i Joaba le nivola taminy. Lafa nampikaiky any Absaloma ty mpanjaka, le nagnanto any mpanjaka ie le nandongaliky ambany tamy tany teo taloha ty mpanjaka, le noroasy mpanjaka i Absaloma.