¹ Hoasa Davida Mpanjaka tamy ty egilizy iaby hozao: "Solomona anakilahiko, ze nitinginin-Janahary avao, ro mbo tanora noho tsy mana fahaiza, nefa lako ty asa. Fa egilizy ro tsy ho ahy ty olo lako fa ho ahy Yaveh Njanahary. ² Ka le fa nanao ze fara ty heriko zaho hanampea ty egilizy ty Njanahariko. Hanome volamena zaho ho ahy ze raha vità amy ty volamena, volafoty ho ahy ze raha vità amy ty volafoty, saba ho ahy ze raha vità amy ty saba, vy ho ahy ze raha vità amy ty vy, sady hazo ho ahy ze raha vità amy ty hazo. Hanome vato beryla avao koa zaho, vato hatsanga, vato ho ahy ty asa voapitiky loka lako ---karaza vato sarotsy iaby---sady marmora foty lako maré. ³ Ingo, noho ty fankasitsahako ty tsano ty Njanahariko, ro hameako ho ahy zay ty volamena noho volafoty sarotsy hananako. Anoviko zao ho fanampea ze iaby fa nihomaniko ho ahy egilizy masy toy: ⁴ talenta volamena baka Ofira telo arivo any, noho talenta volafoty malio fito arivo, mba hampipetsaha rindry fanamboara rey. ⁵ Hanome volamena ho ahy ty raha ho vità amy ty volamena zaho, noho volafoty ho ahy ty raha ho vità amy ty volafoty, sady raha ho ahy ty harazan'asa iaby ze anovy mpanao asa tana rey. Ia avao koa ro tahandramby anjara ho an'Yaveh androany sady hanome-vata ho Azy?" ⁶ Sady fanomeza an-tsitsapo rey ro nanovy mpitariky rey ty longo ty razamben-drozy, mpitariky rey fokon'Israely, mpifehy an'arivony rey noho an-jatony, sady manam-boninahitsy rey amy ty asa ty mpanjaka eo. ⁷ Nanome talenta dima arivo dariky volamena ray aly, manahaky volafoty ray aly, talenta vy 100. 000 ho ahy ty asa ty tsanon-Janahary ndrozy. ⁸ Ze nana vato sarotsy rey ro nanome zay tamy ty fipetsahan-drakitsy ty tsano Yaveh ao, tambany fanaraha-maso i Jehiela eo, tariha i Gersona. ⁹ Nifalifaly ty olo lako noho fanomeza an-tsitsapo rey, safe nandramby anjara tamy ty fony iaby ho an'Yaveh ndrozy. Faly le faly avao koa i Davida Mpanjaka. ¹⁰ Nisaotsy an'Yaveh tanila ty egilizy iaby eo i Davida. Hoy ie hozao: "Ho tompoy lahy Iha, Yaveh, Njanahary ty Israely razambey, mandrakizay doria. ¹¹ Ahy nao, Yaveh, ty habey, ty fahefa, ty voninahitsy, ty fandresea, sady ty famirapiratsy. Fa ze iaby amy ty lanitsy eny noho am-bony ty tany eo ro Ahy nao. Ahy nao ty fanjaka, Yaveh, asondroto ho mpanapaky amy ty raha-iaby eo Iha. ¹² Ty hanana noho ty voninahitsy ro samby baka aminao, sady manapaky amy ty olo iaby Iha. An-tananao eo ty fahefa noho ty hery. Hanananao ty tanjaky noho ty hery mba hahabey ty olo noho hanome tanjaky ty olo ndra ia ndra ia. ¹³ Ka le amy zao, Njanaharinay, ro misaotsy Anao noho manompo ty anaranao bey voninahitsy zahay. ¹⁴ Fa ia moa zaho, sady ia olo lakoko rey, ro tokony ho afaky hanome raha rey an-tsitsapo? Eka vatany, ty raha-iaby ro baka aminao, ka le nampolinay taminao moramora ze ahy nao. ¹⁵ Fa vahiny noho mpandalo manahaky razambenay iaby rey zahay, anilanao eo. Ty andronay an-tany eto le manahaky ty aloky, sady tsy misy fanantena ty amy ty fijanona an-tany eto. ¹⁶ Yaveh Njanaharinay, hanana iaby rey ze voaorinay mba hanangana egilizy hanomezam-boninahitsy ty anaranao masy--- le baka aminao sady Anao. ¹⁷ Haiko avao koa, Njanahariko, fa mandiniky ty fo noho mankasitsaky ty fahitia Iha. Laha ty amiko, tamy ty fahitim-po ro fa nanomezako an-tsitsa-po raha iaby rey, sady amy zao manenty am- pifalefalea olo lakonao ze manatsiky an-tsitsa-po rey eto manome fanomeza ho ahy Nao zaho. ¹⁸ Yaveh, azy Njanahary Abrahama iny, Isaka, sady Israely--- razambey--- apitiho mandrakizay an-tsainao noho eritseritsy olo lakonao ao zay. Tariho ty fon-drozy hitoliky aminao ¹⁹ Ameo an'i Solomona anakilahiko ty fo atsiky faniria hiemby lilinao rey, lalà ty fanenkeanao rey, sady lalànao rey, mba hanantanterahà faniria iaby rey amy ty fanangana ty lapa ze fa nandesiko." ²⁰ Hoasa Davida tamy ty egilizy iaby hozao: "Amy zao misaora an'Yaveh Njanaharinareo." Ty egilizy iaby, misaora an'Yaveh, azy Njanahary ty razamben-drozy iny, nanondriky ty lohany ka le nanompo an'Yaveh sady nandohaliky taloha ty mpanjaka eo. ²¹ Ty hamaray, le nanao soro ho an'Yaveh noho nanome fanomeza oroa ho Azy ndrozy. Nanome aomby arivo raiky, andro lahy arivo raiky, sady anak'aondry arivo raiky, niaraky tamy ty fanomeza inomy noho soro bey tena bey an'Israely ndrozy. ²² Tamy andro zay, le nihina noho nino tanila Yaveh tamy ty fankalaza bevata androzy. Nanovin-drozy mpanjaka fanindroeny ndraiky i Solomona, anaky i Davida, sady nanosotsy azy ho mpanapaky tamy ty alala ty fahefa Yaveh. Nanosotsy an'i Zadoka ho mpiasa avao koa ndrozy. ²³ Sady Solomona nipetsaky tamy ty seza fipetsaha Yaveh eo ho mpanjaka hanolo an'i Davida babany. Nitahiny ie, sady ty Israely iaby nanenky azy. ²⁴ Mpitariky iaby rey, maramila, sady anakilahy i Davida rey ro nanome fanenkea an'i Solomona Mpanjaka. ²⁵ Namean'Yaveh voninahitsy tam-palehibey tanilan'Israely iaby eo i Solomona sady fahefa bevata noho ze fa nameany an'i mpanjaka talohany teo a-Israely ao. ²⁶ Nanjaka tamy Israely iaby eo i Davida anakilahy i Jese. ²⁷ Mpanjaka Israely anay ty efa-polo tao i Davida. Nanapaky an'i Hebrona anay ty fito tao sady Jerosalema anay ty telopolo telo amby tao ie. ²⁸ Maty ie lafa tsatsy antitsy soa, lafa niay andro lava, tamy ty hanana noho voninahitsy. Nandimby azy i Solomona anany. ²⁹ voasoratsy amy ty boky i Samoela mpaminany ao, amy ty boky i Natana mpaminany ao, amy ty boky i Gada mpaminany ao raha vita i Davida Mpanjaka rey. ³⁰ Voapitiky ao asa ty fanapahany rey, rahavita rey noho raha-niboaky ze nikasiky azy rey, Israely, sady fanjaka ty tany hafa iaby rey.