¹ Sady Filistina rey nialy tamy Israely rey. Nilay tanila i Filistina teo ty lahilahy Israely iaby sady niampatsy maty tam-bohitsy Gilboa eny. ² Nania mariny an'i Saoly noho ty anakilahiny Filistina rey. Nivono Filistina rey i Jonatana, Abinadaba, noho Malkisoa, anakilahiny. ³ Navesatsy tamy i Saoly ty aly, sady nahatsatsy androzy mpandefa kititsy. Tanay faharary maré ao ie noho mpandefa kititsy rey. ⁴ Le hoasa Saoly tamy ty mpanday ty fialiany hozao: "Aboaho ty meso bevatanao ka le tsobaho amy zay zaho. Laha tsy zay ro hoavy hanararaotsy ahy tsy voatampaky rey." Nefa tsy nenky ty mpanday ty fialia, safe natahotsy maré ie. Ka le nala i Saoly ty meso beny sady lova tamy zay eo ie. ⁵ Lafa hita ty mpanday ty fialiany fa maty Saoly, le lova tamy ty meso beny manahaky zay koa ie ka le maty. ⁶ Le maty Saoly, noho anakilahiny telo rey, ka le niaraky maty longony iaby rey. ⁷ Lafa hita ty lahilahy Israely iaby tan-doham-baibo eny fa nilay ndrozy, sady maty Saoly noho anakilahiny rey, le niala ty tanàny ndrozy sady nilay. Le avy Filistina rey sady nipetsaky tamin-drozy eo. ⁸ Sady hamaray, lafa avy nangalaky ty maty Filistina rey, le nahita an'i Saoly noho anakilahiny rey lavo tam-bohitsy Gilboa eo. ⁹ Nisakanan-drozy sady nandesiny ty lohany noho ty fialiany. Naniraky mpanday hafatsy nameno an'i Filistina mba handay vaovao rey tamy sampy noho tamy ty olo lako ndrozy rey eo. ¹⁰ Napetsakin-drozy tan-degilizy ty njanaharin-dro ao ty fialiany, sady nifehezin-drozy tan-degilizy i Dagona ao ty lohany. ¹¹ Lafa nahare ty iaby ze nanovy Filistina rey tamy i Saoly ty olo lako i Jabesa-gileada iaby, ¹² le nandeha ty lahilahy mpialy iaby sady nangalaky ty faty i Saoly noho ty an' i anakilahiny rey, sady nanday tamy i Jabesy rey any. Nalevin-drozy tambany hazo terebinta ty taolan-drozy ao ka le nifaly hany fito-herin'andro ndrozy. ¹³ Sady maty Saoly safe tsy nahatoky an'Yaveh ie. Tsy nankato lily i Yaveh rey ie, fa nangalaky torohevitsy tamy ty olo ze niresaky tamy ty maty. ¹⁴ Tsy nila torolala tamy Yaveh ie, ka le nivonoa Yaveh sady nafalony tamy i Davida anakilahy i Jese ty fanjaka.