¹ Loza ho gnani-gny tana antsiky lio! Antsiky vandy ndraiky fanagna halatsy iaby; agnaminy ao zisiky amparany gny reo babo. ² Fa androany la misy feony gny karavasy ndraiky gny feony gny firodorodony reo pone, fikatrokatrikireo sovaly, voho gny firaondraony reo kalesa. ³ Misy fanafihany reo mpitikitsy sovaly, tselatsy gny meso, famirapiratsy gny lefo, korontam-paty, faty mitandahatsy. Tsy misy fiafarany gny reo faty; voafinga agnabon-drozy eo gny mpanafiky gn'azy. ⁴ Miseho zay noho gny filany gny janga soa tarehy, gny mpahay ami-gny sikily, mivarotsy firenena ami-gny alalany gny fivarotam-batany, voho gny vahoaky ami-gny alalany gny fanovany sikily. ⁵ "Ingo, hamango gnanao Iaho__zay ro fagnambaran'i Yaveh Tomponi-gny maro__haninda gny sikinao ami-gny tarehinao eo Iaho voho hagnatoro gny reo faritsy mandozanao ami-gny reo firenena, gny hegnatsao ami-gny reo fanjaka. ⁶ Hanoraky fahalotoa mampangaroharo agnaminao Iaho voho hanao gnanao ho raty; hataoko ho olo fihentehenteany gn'olo iaby iha. ⁷ voho gn'olo iaby magnenty gnanao la hilay gnanao voho hisafa hoe: "Rava i Ninive; ia ro mba hitagny gn'azy? "aia ro ahitako olo hagnahery gnanao?" ⁸ Ninive, moa va iaha ro soa tozay i Teba, namboary ami-gny Renirano Neily eo, nisy rano magnodidy gn'azy, ka riaky bavata ro arony, gny riaky avao ro mandany? ⁹ Etiopia ndraiky Egypta ro tanjakiny, voho tsy nisy fiafarany gny ami-zay; Pota ndraiky Lybia ro mpiara-mialy tagnaminy. ¹⁰ kanefa nandesy i Teba, lasa ami-gny fahababoa agny ie; voatorotoro tan-dohan-dala tegny gn'anany tanora; nanoraky filokagna ho gnany reo johary manam-boninahiny gny reo fahavalony, voho voarohy tami-gny reo rojo vy gny reo johariny mahery. ¹¹ Ho lasa mamo avao koa iha; hiezaky hietaky iha, voho hila fialofa ami-gny reo fahavalonao avao koa iha. ¹² Gny fiarovanao mahery reo la hanahky gnany reo hazon'aviavy miaraky ami-gny aviavy masaky alohany gny fotoa: laha ahozonkozo rozy, la ihintsa am-bavany gny mpihina ao. ¹³ Ingo, la ampela gny vahoaky agnaminao ao; gny reo vavahadiny gny taninao la nisokafy midagnadagna ho gnany reo fahavalonao; nandevo gny hiliny gny bolo. ¹⁴ mandehana mantsaka rano ho ami-gny fahirano; hatanjaho gny fiarovanao maherinao reo; mandehana ami-gny tanimanga voho hosihoseo gny feta; alao ho gnany reo biriky gny tavy. ¹⁵ Handevo gnanao agny gny bolo, voho handringa gnanao gny meso. Handevo gnanao manahaky gny fandevognany gny valala gny raha iaby zay. Ataovo maro agn'isa manahaky gnany reo valala vao gny vatanareo, la ho maro manahaky gnany reo valala. ¹⁶ Nampitombo gnany reo mpandratonao mandilatsy gny basia ami-gny lagnitsy egny iha; nefa manahaky gny voa rozy regny: mandroba gny tany rozy ka bakeo la roso tomily. ¹⁷ Maro manahaky gnany reo valala gny andriandahinao, voho gny jeneralinao la manahaky gny andian-drozy mivotraky ami-gny manda reo ao ami-gn'andro manintsy. Fa lafa miposaky gny masoandro la tomily ami-gny polasy tsy hain'olo agny reo. ¹⁸ Ry mpanjakan'i Asyria, azon-tory gny reo mpiarak'andro aondrinao; mandry ami-gny fitsaharany gny reo mpanapakao. Niely am-bohitsy egny gny olonao; voho tsy misy na ia na ia hamory gn'androzy. ¹⁹ Tsy hisy fagnajanga azo atao ho gnany reo ferinao. Henja mare gny ferinao reo. Ze iaby mahaja vaoavao mikasiky gnanao la hiteha-pifalea agnaminao eo. Ia ro fa nilay gny faharatianao mitandava?