¹ Noho zay, ndao hengantsika gny fiantombohan'ny hafatr'i Kristy ka handroso amin'ny fahamatora. Andeha tsika tsy hametraky ndraiky gny fototsy gny fibebeha noho'ny asan'ny maty voho gny finoa an-Dranagnahary, ² na gny fototsy gny fampianara mikasikin'ny batisa, gny fametrahan-tagna, gny fitsanganan'ireo olo maty, sady gny fitsara mandrakizay. ³ Hanao izay avao koa tsika laha engan-Dranagnahary. ⁴ Fa tsy hay atao ho gnan'ireo ze fa nihazava ndraiky mandeha zay, ze nagnandra gny fanomeza bakan-dagnitsy agny, ze nandramby gny Fagnahy Masy, ⁵ sady ze nagnandra gny safa soan-Dranagnahary voho reo herin'ny vanim-potoa ho avy, ⁶ nefa bakeo la lavo__tsy hay atao gny mampimpoly gnan-drozy amin'ny fibebaha ndraiky. Zay la fotony nomboan-drozy ho gnan'ny vatan-drozy gny Anakin-Dranagnahary, sady nalany baraky ampahibemaso. ⁷ Fa gny tany ze misintsy gn'ora mateti-piavy ,amin'izay mamokatsy reo raha mitiry ilan'ireo olo ze niasa gny tany__ io ro tany ze mandramby fitahia baka amin-Dranagnahary. ⁸ Fa laha mamokatsy fatiky zay, la tsy misy ila gnazy sady fa agnilan'ny fanozogna. Gny fiafaran'izay la amin'ny fireheta. ⁹ Fa rahay la resy lahatsy gny amin'ireo raha soa mare mikasiky gnanareo, ry malala, laha zay mahakasiky gny famonjea, na la mivola manahaky izay aza rahay. ¹⁰ Fa Ndranagnahary la tsy mba tsy to ka hagnalino gny asanareo voho gny fitiava zay nasehonareo nohon'ny agnarany, fotony nareo la nanompo reo mpino sady mbo manompo gnan-drozy hatrany. ¹¹ Magniry mare rahay mba haneho fahazotoa manahaky izay hatramin'ny farany gny kiraidraiky agnaminareo ho gnan'ny antoky gny fahatokia feno. ¹² Izay la mba tsy ho lasa kamo nareo, fa ho mpangalaky ataky gnan'ireo zay mandova reo fampanantena amin'ny finoa voho fahareta. ¹³ Fa tamin-Dranagnahary nanao gny fampanantenany tamin'i Abrahama, la niania tamin'ny Vatany Ie, lafa tsy afaky niania tamin'ny olo bevata mare. ¹⁴ Hoy Ie hoe: " Zaho la hitahy gnanao vatany, sady tena hahamaro gnanao." ¹⁵ Tamin'izay fomba izay, la nahazo zay nampanantena tafaran'ny niandrasany tamim-pahareta Abrahama. ¹⁶ Fa gny olo la miainia amin'ny olo zay bevata kokoa noho gny vatan-drozy. Isakin'ny tapitsy gny fifamalian-drozy, la misy voady raiky natao ho fanamafisa. ¹⁷ Lafa nanapa-kevitsy gny hampiseho mazava kokoa tamin'ireo mpandovan'ny fampanantena gny tsy fiovan'ny kalitaon'ny tanjony Ndranagnahary, la nomeany antoky tamin'ny voady izay. ¹⁸ Nataony izay mba ho amin'ny alalan'ny raha tsy azo ova roe__ zay tsy hain-Dranagnahary gny mavandy amin'izay__la hana fampahereze matanjaky mba hitandrahany mare gny fahatokia zay napetraky teo agnatrehantsika, tsika, zay nilay mba hana fialofa. ¹⁹ Mana izay toky izay tsika ho aro voho vatofantsiky azo hiankina ho gnan'ny fagnahintsika, fahatokia zay militsy ao amin'ny fitoera agnatiny ao ambaliky gny lamba. ²⁰ Jesosy nilitsy tao amin'izay fitoera izay manahaky gny mpialoha lala ho gnantsika, ka tonga mpisoronabe mandrakizay magnaraky gny fomban'i Melkizedeka.