¹ Gny mpisonabe nivola hoe: " To va zay iaby zay?" ² Stefana nivola hoe: " Ry rahalahy voho ry ray, njanjigno aho: " Gny Ndranagnahariny gny voninahitsy niseho tamy gny babantsika Abrahama tamin-drozy tagny Mesopotamia, talohany gny nipetrahany tao Harana; ³ nivola tagnaminy Ie hoe he: " Miala eo amy gny taninao iha voho reo longonao, sady mandehana agny amin'izay tany izay asehoko gnanao." ⁴ Bakeo niala gnan'izay taniny gny Kaldeana ie sady nipetraky tagny Harana; nanomboky teo, tafarany gny nahafatesany gny babany, nandesin-Dranagnahary tagny amin'io tany io ie, zay hipetrahanao. ⁵ Tsy nomeny ho lova teo ie, tsia, tsy ampy hametraha tomboky akory. Fa nagnome toky ie_na la mbo tsy nanan-janaky aza i Abrahama fa_ie la hagnome gny tany gnazy ho fanagnany voho ho gnan'ireo avorohotany agny afara. ⁶ Ndranagnahary la nisafa tagnaminy manahaky zao, fa reo avorohotany la hipetraky maharitsy agny amy gny taniny gny firenen-kafa, sady reo mponina ao la handay gnan-drozy amy gny fanandevoza voho fampahoria mandritry gny efa-jato tao. ⁷ ' Nefa ho tsaraiko gny firenena zay tompon-drozy,' hoy Ndranagnahary, ' sady afaran'izay la hagnato voho handrengy Gnahy eo amin'io toera io rozy. ⁸ Bakeo nomen-Dranagnahary gnan'i Abrahama gny fagnenkea amy gny famora, ka i Abrahama la lasa baban'Isaka sady namora gnazy tamy gny andro fahavalo; Isaka la nanjary baban'i Jakoba, sady Jakoba, nanjary baban'ireo patriarika roe ambin'ny folo. ⁹ Fotony reo patriariky la nialona gnan'i Josefa, ka navilin-drozy tagny Egypta ie; fa Ndranagnahary la niaraky tagnaminy ¹⁰ sady namonjy gnazy tamin'ireo olany iaby. I Josefa la nomeny fankasitraha voho fahendrea teo agnatrehan'i Farao, mpanjakan'Egypta, zay nametraky gnazy ho governora manapaky gnan'Egypta voho agnabon'ireo fanagnany iaby. Sady la avy gny mosary nagnera gnan'Egypta voho Kanana, voho fijalea bevata, sady reo razantsika la tsy nahita sakafo. ¹² Fa lafa nahaja i Jakoba fa nisy vary tao Egypta, nandefa reo razantsika tamy gny lian-drozy voalohany ie. ¹³ Tamy gny lian-drozy faharoa i Josefa nampahay gny vatany tamin'ireo rahalahiny, sady gny fianakavian'i Josefa la nanjary hain'i Farao ¹⁴ Josefa la nagniraky reo rahalahiny hivola gnan'i Jakoba babany mba hoaviny agny Egypta, miaraky agnamin'reo longony iaby, teo amy gny limy ambiny gny fitopolo olo laha atambatra. ¹⁵ Noho izay Jakoba la nilitsy tao Egypta, sady maty ie, ie voho reo razantsika. ¹⁶ Nilanjany ho agny Sekema rozy sady naleviny tao agnamin'izay fasa zay vinilin'i Abrahama tamy gny volafoty tamin'ireo anak'i Hamora tagny Sekema. ¹⁷ Lafa narikitsy gny fotoanan'izay fampanante, izay fampanantena zay nataon-Dranagnahary tamin'i Abrahama, la nihamaro voho nitombo gny olo tao Egypta, ¹⁸ mandra-pitsangany gny mpanjaka hafa tao Egypta, mpanjaka zay tsy nahay gny mikasiky gnan'i Josefa. ¹⁹ Io mpanjaka io avao ro namitaky gny vahoakantsika voho nampahory reo razantsika, rozy la nanery gny razantsika hagnenga gny razantsika handao reo anany ambava loza mba tsy ho velo. ²⁰ Tamin'izay fotoa izay i Mosesy ro teraky; ie la soa teo agnatrehan-Dranagnahary sady notazainy telo vola tao an-tragnony gny Babany. ²¹ Lafa naboaky tegny amonto ie, la gny anaky ampelan'i Farao ro nananga voho nitaiza gnazy manahaky gny anakiny johary. ²² I Mosesy la nampianary reo fahendrea iaby nanagnany gny Egyptiana, sady ie la nahery tamy gny vatany voho gny asany. ²³ Ka lafa ho efapolo tao ie, avy tao am-pony gny hitsidiky reo rahalahiny, anak'Israely. ²⁴ Nahita israelita raiky zay nampahory ka niaro gnazy i Mosesy sady namaly agnan'izay zay nampahory gnazy tamy gny famonona izay Egyptianina: ²⁵ Nihevitsy ie fa ho azon'ireo rahalahiny fa tamy gny alalany gny tagnany Ndranagnahary ro nagnavotsy gnazy reo, nefa la tsy azon-drozy izay. ²⁶ Gny andro magnaraky la avy tao agnamin'ireo Israelita sasany ie raha rozy nifanditsy; nanandra gny nampitony gny kiraidraiky aby ie, nivola hoe: " Ry johary, nareo la mpirahalahy, magnino nareo ro mifandratra?" ²⁷ Fa gny raiky zay nanao tsy nety tamy gny namany nanosiky gnazy, sady nivola hoe he: " Ia ro nanendry gnanao ho mpanampaky voho hitsara gnanay? ²⁸ Tianao va gny hamono gnahy, manahaky gny namononao reo Egyptianina omaly?" ²⁹ Nandositsy i Mosesy lafa nahaja izay; nanjary mpivahiny ie tao antanin'ny Midiana ,ka niterahany gnanany roa johary. ³⁰ Lafa dila gny efapolo tao, nisy anjely raiky nimpoly tamy gny tany agn'efitsy tegny amin'tendrombohitsy Sinay, teo amy gny lelam-bolo voaroy nirehitry. ³¹ Lafa jerin'i Mosesy gny bolo, treriky ie tamin'izay fahajerea; sady lafa nagnanto ie ka nagnenty izay ie, ingo bakagny nisy feon'ny Tompo nivola hoe: ³² " Zaho ro Ndranagnaharin'ireo razanao, Ndranagnaharin'Abrahama, voho Isaka, sady Jakoba." Nangitikitiky i Mosesy sady tsy nahasaky nagnenty. ³³ Gny Tompo nivola tagnaminy hoe: " Engao gny kapa egny amy gny tombokao, fa io toera zay hijoroanao io la tany masy. ³⁴ Fa jeriko vatany gny fijaliany gny vahoakako zay ao Egypta, njako gny fitaraignan-drozy, sady fa nilitsy nagnavotra gnan-drozy Zaho; ka henanizao, alefako ho agny Egypta iha." ³⁵ Io gny Mosesy zay nilierin-drozy, lafa nivola rozy hoe: " Ia ro nanendry gnanao ho mpanapaky voho ho mpitsara?" Ie izay toka zay nalefan-Dranagnahary sady ho mpanampaky ro mpagnavotsy. Ndranagnahary nandefa gnazy tamy gny alalany gny tagnan'izay anjely izay niboahany tagnamin'i Mosesy tegny amy gny voaroy. ³⁶ Nitariky gnan-drozy hiala tao Egypta i Mosesy, lafa baka nanao fahagaga voho famantara tao Egypta voho teny amy gny ranomasy mena, sady tegny agn'efitsy tagnatiny gny efapolo tao. ³⁷ Io avao izay Mosesy izay nivola tamy gny vahoakan'Israely hoe: " Ndranagnahary la hananga mpaminany ho gnanareo eo amy gny rahalahinareo, mpaminany manahaky gnahy."' ³⁸ Ie izay johary zay tao am-piangona tao agn'efitsy niaraky tamin'izay anjely zay nivola tagnaminy tegny amin'tendrombohitr'i Sinay. Ie zay johary zay nanday gny safa velo zinara ho gnantsika. ³⁹ Ie zay johary zay tsy nankatoavin'ireo razantsika; natosikin-drozy lavitsy gnan-drozy, sady agny ampon-drozy la nimpoly tagny Egypta rozy. ⁴⁰ Tamin'io fotoa io nivola tamin'i Arona rozy hoe: " Hanaovy Ndranagnahary rahay hitariky gnanay, manahaky gnan'i Mosesy, zay nitariky gnantsika hiboaky agny Egypta, tsy haintsika zay nitranga tagnaminy." ⁴¹ Sady nanao aomby lahy kelikely rozy tamin'izay andro izay sady nanday fagnatitsy teo amin'izay sampy, sady nifaly tamy gny asan-tagnany rozy. ⁴² nitoliky Ndranagnahary sady namela gnan-drozy mba ho fandrengea reo kintana egny an-dagnitsy, araky gny voasoratsy tao amy gny bokiny gny mpaminany: " Nareo va nanolotsy gnahy biby maty voho fagnatitsy, tragnony gny Israely? ⁴³ Nekenareo gny tabernakelin'i Moloka voho gny kintan-Dranagnahary Refana, voho reo sary zay ataonareo handrengea gnazy, sadyzaho handay gnanareo agny ankoatran'Babylona." ⁴⁴ Reo razantsika la nana tabernakeliny gny fijoroa vavolombelo tao agn'efitsy, araky gny baikon-Dranagnahary lafa nivola tagnamin'i Mosesy Ie, zay tokony nataony nitovy tamin'izay fomba fa jeriny. ⁴⁵ Io gny tragnolay zay nalan'ireo razantsika, sady nandesiny tao amin'izay tany niaraky tagnamin'i Josoa, teo agnatrehan'ireo razantsika, reo fanagnany gny firenena zay nandroahan-Dranagnahary gny tany zay niraisan-drozy ho fanagnan-drozy manoka, Izay tagnatiny gny andron'i Davida, ⁴⁶ sady ie nahazo fankasitraha tao amy gny fijerin-Dranagnahary sady nagnotany raha hahajery toera hipetrara ho gnan-Dranagnaharin'i Jakoba. ⁴⁷ Fa i Salomona ro nagnamboatsy gny tragno ho gnan-Dranagnahary. ⁴⁸ Na izay aza, gny Abo mare la tsy nipetraky tao amy gny tragno vita tamy gny tana, araky gny nambarany gny mpaminany hoe: ⁴⁹ " Gny lagnitsy ro seza fiandrinako, sady gny tany ro fitoeran-tomboko. Tragno manahaky ino ro afaky hamboarinao ho gnahy? hoy gny Tompo, na toera manahaky gny ino ro hiegnenako? ⁵⁰ Tsy tagnako va ro nanao reo raha iaby reo? ⁵¹ Reo olo mafy hatoky voho tsy voafora ao am-po voho sofy, nareo la manohitsy avao gny Fagnahy Masy; nareo la manao manahaky zay nataony gny razanareo. ⁵² Ia tagnamin'ireo razanareo ro tsy nagnenjiky mpaminany? Vinonon-drozy gny mpaminany zay niseho talohany gny fiavin'izay Fahamarigna, sady henanizao nareo la manjary mpamadiky voho mpamono gnazy koa, ⁵³ nareo vahoaky zay nandramby gny lalagna zay napetrak'ireo anjely nefa tsy nitandrahinareo izay." ⁵⁴ Sady lafa nahaja reo raha reo gny mpikamba ao amy gny filan-kevitsy, neloky gny fon-drozy, sady nihily vaza rozy tamy gny Stefana. ⁵⁵ Fa ie, zay feno Fagnahy Masy, nijery soa gny lagnitsy sady nahajery gny voninahits'i Ndranagnahary, sady nahajery gnan'i Jesosy nitranga teo ankavanan-Dranagnahary. ⁵⁶ Stefana nivola hoe: " Henteo, itako misokatsy reo lagnitsy, sady gny zanak'olo mitsanga eo ankavan-Dranagnahary." ⁵⁷ Teo amin'izay la nitapenan'ireo mpikamba ao amy gny filan-kevitsy gny sofin-drozy, sady nikoraky niaraky tamy gny feo agnabo, nilay rozy nagnegny aminy. ⁵⁸ Nitaritin-drozy amontony gny tana ie sady nanomboky nitora-bato gnazy rozy, sady reo vavolombelo la nametraky gny akanjony teo amy gny tombony zaza johary kinaiky hoe Saoly. ⁵⁹ Laha nitorr-bato gnan'i Stefana igny rozy, nikaiky mare gny Tompo ie sady nivola hoe he: " Tompo Jesosy, rambeso gny fagnahiko." ⁶⁰ Nandohaliky ie sady nikaiky tamy gny feo mahery hoe: " Tompo, ka tandraha zao ota zao hanohera gnan-drozy." Lafa baka nivola zay ie la resitory.