¹ Gny boky nisoratako taloha teo, ry Teofily, la magnambara gny natombokin'i Jesosy voho nampianariny iaby, ² hatramy gn'andro nampiakara gnazy, bakeo la nandily reo Apostoly ze nifiliny tamy gn'alalan'ny Fagnahy Masy Ie. ³ Tafarany gny nijaliany, la nampiseho gny vatany velo tamin-drozy Ie niaratsy tamin'ireo porofo mandresy lahatra maro. Niseho tamin-drozy Ie tagnaty gny efapolo andro , sady nisafa mikasiky gny fanjakan-Dranagnahary. ⁴ Lafa nifakatojy tamin-drozy Ie, la nandily gnan-drozy tsy hiala ao Jerosalema, fa hiamby gny fampitamanan'ny Baba, mikasiky zay, nisafagniny hoe he: " Nahaja tagnamiko nareo ⁵ fa nanao batisa tamy gny rano vatany i Jaona, fa nareo la tokony hatao batisa amy gny Fagnahy Masy ao agnatiny gny andro tsy ampy." ⁶ Lafa tafavory nisondry rozy la nanontany Gnazy rozy hoe he: " Tompo, zao va ro fotoa hameregnanao gny fanjaka ho gnan'Israely?" ⁷ Hoy Ie tamin-drozy hoe he: " Tsy nareo ro hahay gny fotoa na reo andro zay notendreny gny Baba tamy gny fahefany manoka. ⁸ Fa lafa avy koa gny Fagnahy Masy la hahazo hery nareo, ka ho lasa vavolombeloko erany gny Jerosalema voho Jodia raiky manontolo voho Samaria, voho hatragny am-paran-tany." ⁹ Lafa nivola zay raha zay i Jesosy Tompo, la niandrandra rozy, naakatsy Ie, sady gny hiboky nanako Gnazy teo amason-drozy. ¹⁰ Laha mbo nandiniky gny lagnitsy igny rozy tamy gny nandehanany, tampoky, teo, nisy roelahy nisalotsy foty nitsanga teo agnilan-drozy. ¹¹ Nisafa rozy hoe he: " Ry johary avy bakagny Galilia, magnino nareo ro mitsanga eto magnenty gny lagnitsy? Igny Jesosy nala tagnaminareo zay nampiakary manahaky gny nahitanareo gnazy niakatsy agny an-dagnitsy teo igny. ¹² Bakeo rozy la nimpoly tagny Jerosalema avy tao amy gny tendrombohitr'Oliva, zay eo agnilany gny Jerosalema, mitovy amy gny liany gny andro Sabata raiky. ¹³ Lafa avy rozy, la niakatsy tao amy gny tragno ambony, zay nimpetrahan-drozy. Rozy voho i Petera, Jaona, Jakoba, Andrea, Filipo, Tomasy, Bartelomeo, Matio, Jakoba anak'i nAlifeo, Simona Zelota, voho Jodasy anak'i Jakoba. ¹⁴ Nitambatsy ho raiky rozy iaby, sady nazoto nivavaky. Agnisan'izany reo ampela, Maria renin'i Jesosy, voho reo rahalahiny. ¹⁵ Tamy zay andro zay i Petera la nitsanga teo agnivon'ireo rahalahiny, eo amy gny olo 120 eo, voho nisafa hoe he ¹⁶ : " Ry rahalahy, tena nila gny fahatanterahany gny Soratsy Masy, zay nagnambarany gny Fagnahy Masy mialoha tany gny tsihovin'i Davida mikasiky gnan'i Jodasy, zay nanday reo olo nanambotsy gnan'i Jesosy." ¹⁷ Fa agnisany gny raiky amintsika ie voho nahazo gny anjarany tamin'izao fanompoana izao." ¹⁸ (henanio io johary io la nivily baibo tany gny jala azony tamy gny faharatia ie, lavo nihohoky teo ie, ka nisokatsy voho nipoaky gny vatany, sady niboaky iaby gny tinainy. ¹⁹ Reo olo iaby tao Jerosalema la nahaja gny mikasiky zany, sady nikaiky io baibo io tamy gny fivolagnan-drozy hoe he: "Keldama", zany hoe: " Sahan-dio.") ²⁰ Fa efa voasoratsy ao amy gny Bokiny gny Salamo hoe he: " Engao ho lao gny baibony, sady ka enga na olo raiky aza hipetraky ao'; Engao ho raisiny gny olo hafa gny andraikiny." ²¹ Noho zany, la ila, gny raiky amin'ireo johary niaraky tamintsika tagnatiny gny fotoa iaby niliran'i Jesosy Tompo voho gny niboahany teto amintsika, ²² hatramy gny batisan'i Jaona ka hatramy gny andro niakarany teo amintsika, la tsy maintsy vavolombelo miaraky amintsika amy gny fitsanganany." ²³ Sady nametraky roe lahy rozy, la i Josefa nikaihy hoe he Barsabasy, na koa atao hoe he Josto, voho Matia. ²⁴ Nivavaky rozy sady nisafa hoe he: " Iha, no Tompo, ro mahalala reo fony gny olo iaby, koa ambarao zay hofilinao amin-drozy roelahy ²⁵ mba haka gny toera ato amin'izao fanompoana zao voho gny maha Apostoly noho gny fandikan-dalana zay nataon'i Jodasy handeha ho agny amy gny toera manoka. ²⁶ Rozy la niloka ho gnazy, voho nilatsaky tamin'i Matia gny filoka, sady voaisa ho Apostoly raiky ambin'ny folo ie.