¹ Sady la handeha hampiakatsy gnan'i Elia tamin'ny tafio-drivotsy ho agny an-dagnitsy i Yaveh, la niala tao Gilgala niaraky tamin'i Elisa Elia. ² Hoy Elia tamin'i Elisa:" Mba mijanogna eto lahy, fotony fa nagniraky ahy ho agny Betela Yaveh." Namaly Elisa hoe:' Laha mbo velo koa i Yaveh, sady laha mbo velo koa iha, la tsy hagnenga gnanao aho.' La nizotso tagny Betela rozy. ³ Nagnagny amin'i Elisa reo anaky gny mpaminany zay tagny Betela sady nisafa taminy hoe:" Hainao va hangalaky gny tomponao aminao Yaveh androany?' Namaly Elisa hoe:' Eka, haiko io, fa ka miresaky mahakasiky gnan'io." ⁴ Hoy i Elia taminy:' Elisa, mba mandignisa eto lahy, fotony fa nagniraky ahy ho agny Jeriko Yaveh." la namaly Elisa hoe:' Laha mbo velo koa Yaveh, sady laha mbo velo koa iha, la tsy hagnenga gnanaoaho." La nandeha tagny Jeriko rozy. ⁵ La nagnagny amin'i Elisa reo anaky gny mpaminany zay tagny Jeriko sady nivola taminy hoe:' Hainao va fa hangalaky gny tomponao aminao Yaveh androany?" La namaly Elisa hoe:' Eka, haiko io, fa ka miresaky mahakasiky gnan'io." ⁶ La hoy Elia taminy:' Mba mijanogna lahy , fa Yaveh nagniraky ahy ho agny Jordana." Namaly Elisa hoe:' Laha mbo velo koa Yaveh, sady laha mbo mbo velo koa iha, la tsy hagnenga gnanao aho.'a La nandeha rozy roe. ⁷ Tafaran'io kelikeky, nisy dimampolo tamin'ireo anaky mpaminany nitsanga nifagnatsiky tamin-drozy tegny lavitsy lafa nitsanga teo an-tsisin'i Jordana rozy roe. ⁸ Nalan'i Elia gny sikiny,nahorongorony ,sady nivangoany tamin'io gny rano. Nizara tamin'ny lafiny roe gny renirano ka nandeha tamin'ny tany maiky rozy roe. ⁹ Sady lafa rozy niavy tan-tety tegny, la hoy Elia tamin'i Elisa hoe: " Angataho agnamiko ze raha hataoko ho gnanao, alohany gny hangala gnahy aminao." La namaly Elisa hoe: " Ao lahy avy agnamiko gny in-droeny gn'anjaram-pagnahinao." ¹⁰ Namaly Elia hoe: " Fa nangataky raha sarotsy iha". Fe ndra zay zao, laha hitanao zaho fa hala agnaminao, la ho avy aminao vatany zay, fe laha tsy zay, la tsy ho avy aminao zay." ¹¹ Laha mbo roso voho nisafa rozy, ingo, nisy katraka bolo rehitsy gny soavaly niavy, ka nampisaraky gnan-drozy roe lahy, voho niakatry tamy talio tan-dagnitsy tagny Elia. ¹² Lafa nahitaky gnan'igny Elisa, la nikoiaky mare hoe: " Rako o, rako o, ndreo gny katrak' Israely rekitry gny mpiondra aminy!" La tsy nihitany sasy Elia, ka nalany gny salony voho tinatany roe rozy. ¹³ Nalany gny sekin'i Elia ze nilatsaky baka amin'egny, voho nimpoly ka nitsanga tan-tsisin'i Jordana teo ie. ¹⁴ Vinangony tamy gny sikin'i Elia ze nilatsaky gny rano, ka hoy ie: " Aia Yaveh, Ndranagnaharin'i Elia?" Lafa vinangony gny rano, la nivaky roe gny renirano ka roso nagnan-tety tegny Elisa. ¹⁵ Lafa nahitaky gnazy gny anaky gny mpagnambara hafatsy ze baka Jeriko tao, magnolotsy gnan-drozy teo, la hoy rozy: " Mipetraky amin'i Elisa ao gny fagnahin'i Elia!" Avy rozy mba hanegnategna gnazy, noho niankohoky tamy gny tany tan-katrehany teo. ¹⁶ La hoy rozy tagnaminy: " Ingo henanizao, misy lihy mahery dimampolo gn'amin-drozy mpanomponao. Engao rozy handeha, manao ragnandria rahay, mba hiala gny tomponao, tsy noho nampiakary ndraiky natolaky gny fagnahin'i Yaveh am-bohitsy agny, na koa am-baibo agny ie." La hoy Elisa hoe: " Aha, ka magniraky gnan-drozy nareo". ¹⁷ Fe lafa namporisin-drozy Elia, traky hahamegnatsy gnazy, la hoy ie: " Iraho rozy." La nagniraky lihy dimampolo rozy, voho nila tagnatiny telo andro rozy, fe la tsy nahita gnazy. ¹⁸ Nimpoly tamin'i Elisa tagny rozy, laha mbo nipetraky ta-Jeriko tao ie, la hoy ie tamin-drozy hoe: " Tsy fa nisafagniko taminareo va hoe: ' Ka mandeha?". ¹⁹ Rozy olo an-tana nisafa tamin'i Elisa hoe: " Ingo, mangataky gnanao rahay, gny raha misy amy tana toy eto la mahavariake, laha gny hitan-gny tompoko zao, fe raty gny rano noho tay mamokatsy gny tany." ²⁰ La namaly Elisa hoe: " Agnandeso finga vao zaho voho asio sira agnatiny ao," la nandesin-drozy tamin'eo zay. ²¹ Niboaky voho nagnan-doharano tagny Elisa, nagnajobo sira tagnatin'izay tao; ka hoy ie hoe: " Zao gny safagnin'i Yaveh: ' Fa nijangagniko rano reo. Mamototsy henanizao, la tsy hisy gny faty, ndra gny tany tsy mahavokatsy sasy." ²² Ka la janga vatra rano reo trak'androany, tamy gny safa ze nisafagnin'i Elisa. ²³ La niakatsy bakao hagna Betela agny Elisa. Lafa roso tan-dala tegny Elisa nisy mpamaraky niboaky baka an-tana tao, ka nikizakizaky gnazy; hoy rozy taminy hoe: " Miakara iha, lihy sola ety! Miakara iha, lihy sola ety!" ²⁴ Nitoliky nagnafara agny Elisa sady nahita gnan-drozy; kinainy Yaveh, mba hagnozo gnan-drozy. La nisy vavim-bera roe niboaky baka agn'ala tao voho namery gny efapolo roamby tamy mpamaraky reo. ²⁵ La nenga bakeo, hagn'ambohitsy Karmela, Elisa, voho bakeo ro nimpoliany hagna Samaria agny.