¹ Nitandry gny Paska ho gnan'i Yaveh ta Jerosalema ao i Josia, voho nivinonon-drozy tami-gn'andro faha folo efatsy amby vola voalohany gny reo aondriny gny Paska. ² Napetrany tami-gny fitoerany tegny gny reo mpisoro ka nampahereziny tami-gn'asa fanompoa gny tragnon'i Yaveh rozy. ³ Hoy ie tami-gny reo Levita nampianatsy gny Israely iaby ndraiky voatoka ho gnan'i Yaveh hoe: " Apetrako ami-gny tragno namboarin'i Solomona gnanak'i Davida ao, mpanjakan'Israely gny fiara masy. Ka lanjay ami-gny sorokareo egny sasy zay. Voho rengeo Yaveh Ndranagnagnaharinareo, voho Tompo Israely vahoakany. ⁴ Mifandamina nareo araky gny agnarany gny fizaranareo ndraiky gny firazagnanareo, araky gny reo toromariky nisinoratsin'i Davida, mpanjakan'Israwely, ndraiky gny reo gnan'i Solomona, gnanany lahy. ⁵ Mijoroa ami-gny fitoera masy egny, rambeso gny polasinareo ndraiky gny fizaranareo ami-gny avorohota reo rahalahinareo ao, gny reo avorohota gny vahoaky, voho alao gny toeranareo ndraiky gny fizaranareo ami-gny avorohotany gny razambeny reo Levita ao. ⁶ Vono gny aondriny gny Paska, hamasigno gny vatanareo, hentsegno ho gnany reo rahalahinareo gny aondry, mba hatao gny safan'i Yaveh namea tami-gny alalany gny tagnan'i Mosesy." ⁷ Nagnomea aondry, telo aly ho gnany gny vahoaky iaby Josia voho gnanak'aosy tami-gny reo aondry voho aosy ho ami-gny fagnatitsy gny Paska, ho gnany reo iaby nagnatriky. Nagnomea aomby telo arivoavao koa ie; gny reo la baka ami-gny fanagnany gny mpanjaka. ⁸ Reo mpitariky la nagnomea fagnatitsy sitrapo ho gnany gny vahoaky, gny reo mpisoro, voho gny reo Levita. Hilkia, Zakaria, voho Jehiela, manan-boninahitsy niandraikitsy gny tragnon-Dranagnahary, la nagnomea gnanaky biby fihary 2.600 ndraiky aomby telonjato ho fagnatitsy gny Paska ho gnany reo mpisoro. ⁹ Kanania, ndraiky Semahia voho Natanaela, rahalahiny, ndraiky Hasabia, Jehiela, voho Jozaboda, gny reo beny reo Levita avao koa, la nagnomea biby fihary maliniky dimy arivo ndraiky aomby diman-jato ho fagnatitsy gny Paska ho gnany reo Levita. ¹⁰ Ka la vonona gny fanompoa, voho nipetraky ami-gny fipetraha egny gny reo mpisoro, niaraky tami-gny reo Levita araky gny fizaran-drozy, ho solony gny liliny gny mpanjaka. ¹¹ Nivinonon-drozy gny aondriny gny Paska, voho gny reo Levita nangalaky gny holitsy reo gnanak'aondry. ¹² Nalan-drozy gny fagnatitsy oroa, mba hizara gnany reo ho gnany reo ho gnany reo fizarany gny taranaky vahoaky, mba hanolora gnany reo ho gnan'i Yaveh, araky gny voasoratsy tami-gny bokin'i Mosesy ao. Nataon-drozy manahaky gnany zay koa gny reo aomby. ¹³ Nataon-drozy tami-gny bolo araky gny toromariky gny gnanak'aondriny gny Paska. Laha gny ami-gny reo fagnatitsy nihamasigny, la nampandevezin-drozy tagnainy valagny tao, valagnibe, ndraiky fagnendasa gny reo, voho nilinanjan-drozy malaky tami-gny vahoaky tagny zay. ¹⁴ Tafarany zay la nagnoma fagnatitsy ho gnan'ny vatan-drozy ndraiky ho gnany reo mpisoro rozy, fotony gny reo mpisoro, taranak'i Arona, la sahira tami-gny fanolora gny fagnatitsy oroa gny ndraiky gny sabora zisiky ahalign'andro, ka la nagnomea gnany reo fagnatitsy ho gnazy gny reo ndraiky gny mpisoro, taranak'i Arona, reo Levita. ¹⁵ Reo mpihira, taranak'i Asafa, la tami-gny toeran-drozy ao, araky gny torolalan'i Davida, Asafa, Hemana, voho Jedotona mpagnambara hafatsiny gny mpanjaka, voho gny reo mpiamby la tami-gny vavahady iaby tegny. Tsy nahazo nagnenga gny toerany rozy, fotony gny reo Levita rahalahin-drozy la nana fagnomana ho gnan-drozy. ¹⁶ Nohony zay, tami-zay fotoa zay gn'asa fanompoa gnan'i Yaveh iaby la nitanterahy ho ami-gny fagnalaza gny Paska ndraiky hanolora fagnatitsy oroa ami-gny alitaran'i Yaveh eo, araky gny mbaikoan'i Josia mpanjaka. ¹⁷ Gny vahoakan'Israely nagnatriky la nitandry gny Paska tami-zay fotoa zay, voho bakeo gny Firavoravoa ami-gny Mofo tsy misy Masirasira tagnatiny fito andro. ¹⁸ Mbo tsy nisy fagnalaza gny Paska manahaky gnany zay ta Israely tao nanomboky tami-gn'andron'i Samoela mpangnambara hafatsy, voho tsy nisy mintsy tami-gny reo mpanjakan'Israely hafa nagnalaza gny Paska manahaky gny nataon'i Josia, niaraky tami-gny reo mpisoro, Levita, ndraiky gny vahoakan'i Joda ndraiky Israely iaby nagnatriky gny reo olo ta Jerosalema tao. ¹⁹ Nitandrova zay Paska zay tami-gny faha folo valo amby tao nanjakan'i Josia. ²⁰ Tafarany zay iaby zay, tafarany gny nametrahan'i Josia gny tempoly tami-gny polasiny, la miakatsy mba hialy ami-gny reo Karkemisy tami-gny ony Eofrata tao i Neko, mpanjakan'i Egypta, voho Josia nandeha nialay tagnaminy. ²¹ Fe nandefa masoivoho tagnaminy tagny i Neko, nivola hoe: " Ino ro tokony hataoko gnanao, ry mpanjakan'i Joda? Tsy avy hanohitsy gnanao zaho androany, fa hanohitsy gny tragno hialako. Nivolagnin-Dranagnahary nandeha malaky zaho, ka manindria fo ami-gny fanohera gnan-Dranagnahary, miaro gnahy, laha tsy zay handrava gnanao Ie." ²² Ndra zay aza, la nanda gny hagnenga gnazy Josia. Nanao sary nagnova tarehy ie mba ahafahany mialy agnaminy. Tsy nijanjy gnany reo safan'i Neko baka ami-gny vavan-Dranagnahary ie; ka la nandeha nialy tami-gny Lohasahan'i Megido tegny ie. ²³ Nitinifitsiny gny mpandefa gnana-tsipiky i Josia mpanjaka, voho hoy gny mpanjaka tami-gny reo mpanompony hoe: " Andeso zaho fa lavatany mafery mare." ²⁴ Ka la naboakiny reo mpanompony baka ami-gny kalesy tao ie, voho napetrany tami-gny fagnampikalesy tao. Nandesin-drozy ta Jerosalema tagny, tami-gny nahafaty gnazy. Nalevy tami-gny lolony reo razambeny tao ie. Nisaona gnan'i Josia gny Joda ndraiky Jerosalema iaby. ²⁵ Nanao hira fisaora ho gnan'i Josia i Jeremia; gny mpihira johary ndraiky ampela iaby la misaora gnan'i Josia zisik'androany. Gny reo hira la lasa fomba ta Israely tao; ingo, voasoratsy ami-gny hira fisaora ao reo. Laha gny ami-gny reo raha hafa mikasiky gnan'i Josia, ndraiky gny reo asa soa nataony tami-gny fankatoava voasoratsy tami-gny lalagnan'i Yaveh tao__ ²⁷ Voho gny reo asany, nanomboky tam-boalohany tagny ka la zisiky ami-gny fiafara, la voasoratsy ami-gny bokiny reo mpanjakan'i Joda ndraiky Israely.