¹ Tafarany gny reo raha ndraiky asam-patokia reo, la niavy voho nilitsy ta Joda ao i Sankeriba, mpanjakan'i Asyria. Nitoby hanafiky gnany reo tana mivala ie, nikasainy ho baboina. ² Lafa hitan'i Hezekia fa avy i Sankeriba voho ie nikasa hialy amin'i Jerosalema, ³ la nifampandiniky tami-gny reo mpitarikiny ndraiky gny reo johariny manam-pahefa ie gny hampijano gny ranony reo loharano tam-balikiny tana; la nagnampy gnazy hanao gnany zay rozy. ⁴ Olo maro ro nivory ndraiky nampijano gnany reo loharano iaby ndraiky gny rano mandeha namakivaky agnivony gny tany. Hoy rozy hoe: " Nagnino gny mpanjakan'i Asyria ro avy hila rano be?" ⁵ Be herim-po i Hezekia ka nagnamboatsy gny vala iaby rava. Nagnamboatsy gnany reo tilikambo ho abo abo, ndraiky gny vola hafa ambaliky agny avao koa ie. Nagnafatratry gny Milo tami-gny tanan'i Davida ao avao koa ie, voho nagnamboatsy fitaovam-pialia ndraiky apinga maro. ⁶ Nametraky mpifehy miaramila tami-gny vahoaky teo ie. Namory gnan-drozy ho agnaminy tami-gny tany malalaky teo ami-gny vavahadiny gny tana ie ka nisafa tamim-pahereza tamin-drozy. Hoy ie hoe: ⁷ " Mahereza ndraiky mahatanjaha. Ka mavaka na kivy nohony gny mpanjakan'i Asyria ndraiky gny reo tafika iaby niaraky agnaminy nareo, fa misy olo miaro gnantsika bevata mandilatsy nohony reo miaro gnazy. ⁸ Sandriny gny nofotsy avao ro miaro gnazy, fa i Yaveh, Ndranagnaharintsika, koa ro miaro gnantsika, mba hagnampy gnantsika, ndraiky hialy gny alintsika." Ka la nampahery gny vatan-drozy tami-gny reo safan'i Hezekia, mpanjakan'i Joda gny reo vahoaky. ⁹ Tafarany zay, la nagniraky gnany reo mpanompony ho a Jerosalema agny i Senkeriba, mpanjakan'i Asyria ( teo agnatrehan'i Lakisa ie, sady gny tafiny iaby nomba gnazy,) ho agny amin'i Hezekia, mpanjakan'i Joda. voho gny vahoaky iaby zay tagny Jerosalema. Hoy ie hoe: ¹⁰ " Zao ro nivinolan'i Sankeriba, mpanjakan'i Asyria: Ino ro hianteherenareo mba hiereta fahirano a Jerosalema agny? ¹¹ Moa tsy namitaky gnanareo va Hezekia, mba ahavy gnanareo ho matiny gny mosary ndraiky gny hetaheta, lafa mivola agnaminareo ie hoe: " Yaveh Ndranagnaharintsika ro hagnavotsy gnantsika an-tagnany gny mpanjakan'i Asyria eo.'? Sa va tsy Hezekia io avao va ro nangalaky gnany reo fitaova abony ndraiky gny reo alitarany voho nibaiko gny Joda ndraiky Jerosalema hoe: ' Agnaminy alitara raiky eo ro tsy maintsy hanompoanareo, gny saronareo'? ¹³ Hainareo va fa nataoko ndraiky gny reo razambeko tami-gny reo vondron'olo iaby baka ami-gny reo tany hafa? Sa afaky nandomba gny tanin-drozy tam-bany fahefako teo tami-gny fomba iaby va gny reo Ndranagnahariny reo vondron'olony gny tany? ¹⁴ Tami-gny reo Ndranagnahariny reo firenena iaby nirinavany gny razambeko gny reo, sa nisy Ndranagnahary afaky nandomba vahoakany hiala tan-tagnako eo va? Nagnino gny Ndranagnaharinareo ro tokony hahalomba gnanareo ami-gny fahefako eo? ¹⁵ La ka enga handiso fagnantena ndraiky hitao gnanareo ami-gny alalany zay i Hezekia. Ka mino gnazy, fa tsy nisy Ndranagnahariny gny firenena na fanjakana afaky nandomba gny lony tsy ho an-tagnako eo, na nanaisotry tsy ho an-tagnany reo razambeko eo. Ka sandraky fa Ndranagnahary ro hahalomba gnanareo ami-gny tagnako?" ¹⁶ Mbo nisafa raty manohitsy gnan'i Yaveh Ndranagnahary ndraiky nanohitsy gnan'i Hezekia mpanompony aza gny reo mpanompon'i Sankeriba. ¹⁷ Nanoratsy taratasy avao koa i Sankeriba mba handratia gnan'i Yaveh, Ndranagnaharin'Israely, voho nisafa raty tagnaminy. Hoy ie hoe: " Manahaky gnany reo Ndranagnahariny regny firenena gny tagny regny tsy nahalomba gny olon-drozy tan-tagnako teo, gny Ndranagnaharin'i Hezekia avao koa la tsy hahalomba gny olony hiala tsy ho an-tagnako ao. ¹⁸ Nikaiky mare gny vahoakan'i Jerosalema tami-gny rindry tami-gny safany gny jiosy tao rozy, hampitahora ndraiky hampihorohoro gnan-drozy, mba ahafehy gnan-drozy mambabo gny tana. ¹⁹ Niresaky momban-Dranagnaharin'i Jerosalema manahaky gny fisafagnan-drozy momba gnany reo Ndranagnahariny gny olony gny tany hafa firenena, asan-tagnany gny olo avao, rozy. ²⁰ Hezekia, mpanjaka, ndraiky Isaia, mpagnambara hafatsy, la nivavaky nohony zay ka nikaiky mare tan-dagnitsy tagny ie. ²¹ Nagniraky anjely i Yaveh, mba hamono gnany reo johary mpialy, gny reo mpifehy, voho manam-pahefany gny mpanjaka tan-toby ao. ami-gny tragnony gny Ndranagnahariny agny ie, la nivinonony gny sasany tami-gny reo gnanany tami-gny meso tagny ie. ²² Manahaky gnany zay ro nagnavotan'i Yaveh gnan'i Hezekia ndraiky gny reo olon'i Jerosalema tami-gny tagnan'i Sankerita, mpanjakan'i Asyria, voho tami-gny tagnany reo hafa iaby, ka nagnomea gnan-drozy fiadagna tami-gny fomba iaby. ²³ Maro gny nanday fagnatitsy ho gnan'i Yaveh ta Jerosalema tagny, ndraiky fagnomeza lafovily ho gnan'i Hezekia mpanjakan'i Joda, mba ahalasa gnazy hisondrotsy tamasony reo firenena iaby nanomboky tami-zay fotoa zay. ²⁴ Voho tagnaminy zay fotoa zay Hezekia la narary fa ho nimaty. Nivavaky tagnamin'i Yaveh ie, nisafa tagnaminy voho nagnomea famantara gnazy fa ho njanga ie. ²⁵ Fe Hezekia tsy mba namaly gnan'i Yaveh tami-zay soa namea gnazy, fa niavognavo gny fony. Ka la niavy tagnaminy, ndraiky tamin'i Joda mbamin'i Jerosalema gny siaky. ²⁶ Ndra zay aza, la nanetry tegna tami-gny avognavom-pony avao Hezekia, ie ndraiky gny reo olon'i Jerosalema, ka tsy niavy tamin-drozy gny siakin'i Yaveh tagnatiny gn'andron'i Hezekia. ²⁷ Nana hanagna marobe ndraiky voninahitsy vatany i Hezekia. Nanao efi-tragno fagnajaria ho gnany gny volafoty, volamena, vato fafovily, ndraiky ho gnany reo hagnitsy, voho koa ho gnany reo apinga ndraiky gny reo rahamanan-danja samby hafa parikarazany ie. ²⁸ Nana tragno fihinanam-bilo ho gnany reo biby vary, divay vaovao, diloilo, voho tragno fihinanam-bilo ho gnany reo biby fihary karazany iaby avao koa ie. Nana aondry voho aosy tam-balany ao avao koa ie. ²⁹ Fagnampiny zay, nanao tana ho gnazy avao koa ie voho nana aondry voho aosy ndraiky aomby marobe, fa Ndranagnahary nagnomea gnazy hanagna faratampony. ³⁰ Io Hezekia ia vao ro nanampy gny loharano baka agnabony tany Gihona agny, ndraiky nampandeha gnany zay ho ami-gny ilany andrefany gny tanan'i Davida agny. Nanjary tami-gny reo tetikasany iaby i Hezekia. ³¹ Ndra zay aza, gny ami-gny raha mikasiky gnany reo masoivohony reo andriandahin'i Babylona, nirahy nagna-gnaminy agny mba hametra-pagnotania momba gnany reo nahay, gny mombany gny famantara mahangoay fa natao tami-gny tany eo, la nagnenga gnazy raiky Ndranagnahary, mba hitsapa gnazy, voho ahaiza gny iaby tam-pony ao. ³² Laha gny ami-gny reo raha hafa mikasiky gnan'i Hezekia, agnainy zay ao gny reo asa tsy fivaliham-pagnenkea, ingo fa voasoratsy ami-gny Fahitan'Isaia ao Mpagnambara hafatsy gnanaky lahin'i Amosa reo, ndraiky ami-gny bokiny reo mpanjakan'i Joda ndraiky Israely ao. ³³ Nimaty tami-gny reo razambeny tagny i Hezekia, ka nalevin-drozy tami-gny havoa misy gnany reo lolony gny taranak'i Davida tagny ie. Nagnomea voninahitsy gnazy tami-gny fahafatesany gny Joda iaby ndraiky gny olon'i Jerosalema. Voho Manase gnanaky lahy ro lasa mpanjaka nilimby gnazy.