¹ Nimaty ami-gny reo razambeny tagny i Abia nalevin-drozy ami-gn'i tanan'i Davida tao ie. ² Asa, gnanaky lahiny, ro lasa mpanjaka nilimby gny polasiny. Tami-gn'androany la nitsy tagnainy gny folotao gny tany. Nanao soa ndraiky to tamason'i Yaveh Ndranagnahariny i Asa, ³ fotony nalany gny reo alitara vahiny ndraiky gny reo fipetraha agnabo. Nirinavany gny reo andrim-bato voho nitinapakiny gny reo baon'Aseraha. ⁴ Nibaiko gnan'i Joda ie mba hila gnan'i Yaveh, Ndranagnahariny gny razamben-drozy, ndraiky hagnantanteraky gnany reo lily voho lalagna. ⁵ Nalany avao koa gny reo fipetraha agnabo ndraiky gny reo alitarany gny ditin-kazo magnitsy baka ami-gny reo tanan'i Joda iaby. Nijano tam-baniny teo gny fanjaka. ⁶ Nagnamboatsy tana mivala ta Joda tagny ie, fotony nitsy gny tany, voho tsy nana gn'aly ie tami-gny reo tao reo, fotony nagnomea fiadana gnazy i Yaveh. ⁷ Fa Asa nivola tamin'i Joda hoe: " Ao tsika hagnamboatsy gnany reo tana reo voho hagniry vala magnodidy gnany reo, ndraiky tilikambo, vavahady voho hidrotso lavalava; mbo gnantsika gny tany fotony fa mila gan'i Yaveh Ndranagnaharintsika tsika. Fa nila Gnazy tsika,voho nagnomea fidina gnantsika tami-gny lafiny iaby ie." Ka la nagnamboatsy rozy voho nalavagno. ⁸ Nana tafiky raiky nitanjaky apinga ndraiky lefo i Asa; baka amin'i Joda la nana johary 300 000 ie, voho baka ami-gny Benjamina, johary 280 000 nila apinga ndraiky tsipiky. Natanjaky gny reo iaby reo, johary be herim-po. ⁹ Voho Zera Etiapiana avy nanohitsy gnan-drozy niaraky tami-gny tafiky miaramila ray tapitrisa ndraiky kalesy telon-jato; avy ta Maresa tagny ie. ¹⁰ La niboaky hitsena gnazy i Asa, voho nandany gny laharan'aly tan-dohasahan'i Zefata ta Maresa tagny rozy. ¹¹ Nitaray tamin'i Yaveh, Ndranagnahariny i Asa, voho nanao hoe:" Ry Yaveh, tsy misy laha tsy Iha ro hagnampy ze tsy manan-kery lafa miatriky raha maro ie. Ampio rahay, ry Yaveh Ndranagnaharinay, fotony miantehitsy agn'Aminao rahay, voho ami-gn'Agnaranao ro ahavianay enga ho resiny gnolo Iha. ¹² Ka la nagnisy gnany reo Etiopiana tagnatrehan'i Asa ndraiky Joda i Yaveh, ka nilay gny reo Etiopiana. ¹³ Nagnendriky gnan-drozy avao Jerara i Asa ndraiky gny reo miaramila niaraky tagnaminy nohony zay la Etiopiana maro ro lavo ka tsy afaky narovany rozy, fotony rava tanteraky tsy natrehan'i Yaveh ndraiky gny tafiny rozy. Nanday babo maro gny tafiky. ¹⁴ Naravany gny tafiky gny reo tana iaby magnodidy gnan'i Jerara, fotony niavy tami-gny reo olo an-tana gny horohoron'i Yaveh. Niboboiny gny tafiny gny reo tana iaby, ka nisy babo maro tamin-drozy tao. ¹⁵ Naringany tafiky avao koa gny reo fipetrahan-dainy reo mpiamby mpifalo tana; nanday aondry maro, ndraiky rameva rozy, sady bakeo nimpoly tagny Jerosalema.