¹ Gny vahoakan'i Joda iaby nangalaky gnan'i Ozia, folo enin'amby tao, voho nanao gnazy ho mpanjaka ami-gny polasin'i Amazia rainy. ² Ie ro nagnamboatsy gnan'i Elota indraiky voho nagnampoly nagnamboatsy gnany zay ho gnan'i Joda. Tafarany zay la nimaty tamigny reo razambeny tagny mpanjaka. Folo enin'amby tao i Ozia ro nanomboky nanjaka. Nanjaka tagnainy limam-polo roe amby tao ta Jerosalema tao ie. Jekolia ro agnaran-dreniny; baka Jerosalema agny ie. ⁴ Nanao gny to tamason'i Yaveh ie, nagnaraky gny ohatsy namean'i Amazia, rainy, tami-gny raha-iaby. ⁵ Nagnomea gny vatany mba hila gnan-Dranagnahary tami-gn'andron'i Zakaria, nagnomea gnazy gny reo torolala tami-gny fankatoava gnan-Dranagnahary ie. Laha mbo nila gnan'i Yaveh ie la nagnamboatsy gnazy Ndranagnahary. ⁶ Niaboaky i Ozia voho nialy tami-gny Filistina. Nirinavany gny valany gny tana ta-Gita ao, Jabne voho Asdoda; nagnambatsy tana-bevata tami-gny tanan'i Asdoda tao ndraiky tami-gny reo Filistina ie. ⁷ Nampian-Dranagnahary nanohitsy gnany reo Filistina ie, nanohitsy gny Arabo nipetraky ta Gorabala tao, voho nanohitsy gnany reo Meonita. ⁸ Nandoa Fagnomezam-boninahitsy ho gnan'i Ozia gny Amorita, voho niparitaky gny lazany, na la zisiky ami-gny filiran'i Egypta aza, fotony nihanatajaky ie. ⁹ Fagnampiny zay, nagnamboatsy tilikambo ta Jerosalema tao i Ozia tami-gny vavahady an-jerony teo, tami-gny vavahadin-dohasaha, ndraiky tami-gny fiodihany gny manda voho nagnafatratry fagnamboara gny reo. ¹⁰ Nagnamboatsy tilikambo fandignasa tagn'efitsy tagny ie voho nagnaly fipetrahan-drano maro, fotony nana biby fihary maro ie, tami-gny tany le tagny ndraiky tami-gny iva tagny. Nana mpihary ndraiky mpamboly voaloboky tami-gny saha namokatsy tagny ie, fotony teany gny fiharea ndraiky fambolea. ¹¹ Fagnampiny zay, nana miaramila johary mpialy, Ozia niboaky isam-bondrona mba hialy voalamy araky gny isakiny nisahin'i Jeiela, mpanora-dalagna, ndraiky Mahaseia, manam-pahefa; tambany fahefan'i Hanania, raiky tami-gny reo mpifehiny gny mpanjaka. ¹² Gny fitambarany gny isakiny reo lohany gny longon-draza, johary mpialy, la 2600. ¹³ Tambany fahefan-drozy la nisy miaramila 307 500 johary nialy tan-kery bevata mba hagnampy gny mpanjaka hanohitsy gny fahavalo. ¹⁴ Nomagnin'i Ozia ho gnan-drozy__ho gnany gny miaramila iaby__gny reo apinga, lefo, fiarovan-doha, fiarovan-tratra vy, tsipiky, ndraiky vato ampiasay ami-gny antsamotady. ¹⁵ Nagnamboarany masiny maro ta Jerosalema tao, niforogniny reo johary manam-pahaiza, natao tami-gny tilikambo tegny ndraiky tan-dohany gny vala tegny, andefasa gnana-tsipiky ndraiky vato bevata. Niely zisiky ami-gny tany lavitsy gny lazany, fotony nahazo fagnampia goava ie zisiky hiaviany ho tena mahery. ¹⁶ Fa lafa niha-natanjaky i Ozia, la nieboebo gny fony ka nanao gny tsy to ie, mivaliky tamin'i Yaveh, Ndranagnahariny ie, fotony nagnan-tragnon'i Yaveh mba hagnoro ditin-kazo magnitsy tami-gny alitara gny ditin-kazo magnitsy. ¹⁷ Azaria, mpisoro, la nilitsy nagnaraky gnazy, mbami-gny mpisoron'i Yaveh valo-polo, johary be herim-po. ¹⁸ Nanohitsy gnan'i Ozia, mpanjaka rozy, voho nisafa tagnaminy hoe: " Tsy anjaranao, ry Ozia, ro magnoro gny ditin-kazomagnitsy ho gnan'i Yaveh, fa gnany reo mpisoro, reo gnanaky lahin'i Arona, voamasy ro magnoro gny ditin-kazo magnitsy. Miboaka tami-gny fitoera masy tao, fa tsy natoky iha voho tsy homean'i Yaveh Ndranagnahary voninahitsy. ¹⁹ La nasiaky i Ozia. Nitanjaky tan-tagnany tegny ie mba hagnoroa gny ditin-kazo magnitsy, voho laha mbo masiaky tami-gny mpisoro ie, la nisy haboka nipoitsy tami-gny handriny teo nagnatriky gnany reo mpisoro tan-tragnon'i Yaveh tao, tagnilany gny alitara ho gnany gny ditin-kazo magnitsy. ²⁰ Azaria mpisoro be ndraiky gny reo mpisoro iaby la nagnenty gnazy, voho ingo, lasa boka tami-gny handriny teo ie. Nirinoakin-drozy malaky teo ie. Ka la niboaky malaky vatany ie, fotony namango gnazy Yaveh. ²¹ Ozia, mpanjaka, la boka zisiky ahafatezany ka nipetraky tami-gny fipetraha mitoka tao liany nahaboka gnazy, fotony nala tami-gny tragnon'i Yaveh tao ie, Jotama, gnanany lahy, ro tan-dapany gny mpanjaka tao voho nanapaky gny vahoakany gny tany. ²² Voho laha gny ami-gny raharaha hafa mikasiky gnan'i Ozia, voalohany voho farany, la ao ami-zay nisinorats'i Isai gnanak'i Amosa, mpagnambara hafatsy. ²³ Voho nimaty tami-gny razambeny tagny i Ozia; nalevin-drozy niaraky tami-gny reo razambeny tami-gny tany fandevegna zay gnany reo mpanjaka tao ie, fa hoy rozy hoe: " Boka ie." Jotama, gnanany lahy ro lasa mpanjaka nilimby gny polasiny.