¹ Awo omubiro ebyo, ebibiina nibyeyongeire obwingi, nibatabba nammere, nayeta abegesebwa baamwei nabakoba nti; ² Nkusasira ebibiina, kubanga eleero ebiro bisattu nga bali naanje, so tibalina mmere. ³ ninabasiibula okwirayo nga basiibire nzala, bwakakusaanawo omwanda, nabamwe bakuzwa alai. ⁴ Abegesebwa baamwei nebamwiiramu nti omuntu asobola atyai okwikutisya, abantu bani ⁵ Nabuulya nti Mulina emigaati jiingai? nebamukoba nti musanju. ⁶ Naduumira ekibiina okwikaara ansi, nakwatta emigaati omusanju, niyeebalya, nagiwa abegesebwa baamweim okujiiya omumaiso gaabwe, bajiteeke omumaiso gakibiina. ⁷ Era baabaire no bunage budyooli, nabwebalya nabalagira bwoona okubuteeka omumaiso gaabwe. ⁸ NNibalya nibaikutta, nibakumbaania obumulungukire ebiggega musanju. ⁹ baabaire enkumi inai, nabasiibula. ¹⁰ Amangu ago naseeyeya okuryato n'abegesebwa baamwei, naiza enseeri wa Dalumanusu ¹¹ . Abafalisaayo nibawuluka nibaiza, nibatandika okumusosoidya, nga bakwendya akamanyisyo okuzwa omw'igguru nga bakumukema. ¹² Nasiinda omumwoyo gwamwei, nakoba nti nywe abamirembe jjini mukutooryaki akamanyisyo? Amananu nkubakoba nti abamirembe jjini tibakuweebwe kamanyisyo. ¹³ Nbaleka, naseeyeya ate, nayaba enseeri weedi. ¹⁴ Awo nebeebwa okutwalana emigaati, so tibabaire najjo muryato wabula omugaati gumwei. ¹⁵ Nabanatira ng'akubakoba nti mugume, mweekume ekizimbulukusya eky'Abafalisaayo nekizimbulukusya kya Kerode. ¹⁶ Nibabuulyangana bonkai na bonkai nga bakukoba nti tetulina miggaati? ¹⁷ O Yesu niyategeire nabakoba nti kiki ekikubabuulyanganisya olwabutabba na migaati? mukyali kubona, so temukutegeera? emyoyo jaanywe jikakanyali. ¹⁸ Mulina amaiso, temukubonia? mulina amatwi, temukuura? so temukwizukira? ¹⁹ Ninamenyeire enkumi eitaanu emigaati etaanu, ebiibbo bimekai ebyaizwiire obukunkumukwa bwe mwakumbainie? Nibamukoba nti ikumi nabibiri. ²⁰ "era ninamenyere omusanju enkumi inai mwakumbainie ebigegga bimekai?" Nibamukoba nti musanju. ²¹ Nabakoba nti mukyaalikutegeera? ²² Nibaiza nibaika e Bususayida, nibamuleetera omwigali wa maiso nibamwegaiira okumukwataku. ²³ Nakwata omwigali wa maiso okumukono, namuwulukya enzai wambugga; awo niyacwiire ebicwantyai okumaiso gaamwei, namuteekaku emikono, namukoba nti oliku kyokubona? ²⁴ Naloleera aiguru, nakoba nti "nkubona abantu, kubba nkubona bwakwisana emisaale, nga bakutambula" ²⁵ Ate namuteekaku engalo oku maiso gaamwei nagakundula okubona, nawona, nabona byoona kusai. ²⁶ Namusindika ewaamwei, ng'akumukoba nti Toingiranga mu mbugga muni. ²⁷ O Yesu naimuka nayaba n'abegesebwa baamwei omubyaalo bya Kayisaliya ekya Firipo. Nibaikire omwanda, nabuulya abegesebwa baamwei, nga akukoba nti abantu banyetta naani? ²⁸ Nibamukoba nti, Yokaana omubatiza; n'abaandi nti Eriya; naye abaandi nti omwei okubalaangi. ²⁹ Ye nababuulya nti naye nnywe munyetta nani? o Peteero nairamu namukoba nti Niiwe Kristo. ³⁰ Nabakanja obutakobera muntu bigambo byaamwei. ³¹ Natandika okubeegesya nti kimusaaniire omwana wamuntu okubonabonesebwa ebingi, nokugaanibwa abakaire, n'abakabona abakulu, nabawandiiki no kwitibwa no kwakalyawo ebiro bisatu okuyimbooka. ³² Nabazira ekigambo ekyo kaangura. O Peteero namutwala, natandika okumunenya ³³ Naye nayinduka, nabona abegesebwa baamwei, nanenya o Peteero ng'akukoba nti ira emabega wange sitaani, kubanga tokulowooza bya Nyamwanga, wabula byabantu. ³⁴ Nayetta ekibiina n'abegesebwa baamwei nabakoba nti, omuntu nalyendya okunseengerya, yeelekeerye, yeetiike omusalaba gwamwei, ansengeerye. ³⁵ Kubanga buli ayendya okununula obwomi bwamwei alibubulya, nabuli'omwei alibulya obwomi, bywaamwei okulwange nokulwa ngiri alibununula. ³⁶ Kubanga kimugasaki omuntu okulya ensi yoona, n'okufweerwa obwomi bwaamwei? ³⁷ Kubanga omuntu yakuwaireyo ki okununula obwomi bwaamwei? ³⁸ Kubanga buli akwatibwa ensoni, nje nebigambo byaange omumirembe jini ejja bweenzi are ejibbi, n'omwana wamuntu alimukwatirwa ensoni oyo niyaliizira omukitiinisya kya'Itowamwei n'abamalaika abaikiiri.