¹ Nazwayo naiza omunsi yawabwe, abegesebwa nibaaba naye. ² Awo ssabbiiti niyaikire, natandika okwegesya. Omwikumbaaniro: abaingi nibamuwuliire nibewunaica, nga bakoba nti oni ebyo yabiyire ayi? are nti magezi ki gani geyaweirwe oni, era ebyamagero ebyenkaniire ani bikoleibwe omukono jaamwei. ³ Tiniye oni omubaizi, omwana wa Maliyamu, muganda wa Yakobbo, n'oYose, n'oYuda, n'oSimooni? nabagande abaala tetulinabo ani ewaiswe? nibamwesittalaku. ⁴ Oyesu nabakoba nti omulangi tabulwa kitinisya okuyaku omwiyaanga yaabo, n'omukikka kyamwei, n'omunyumba yamwei. ⁵ Naye tiyasobweire kukolaye kyamagero kyoona naye yateekere emikono jjamwei okubalwaire abadooli n'abatamba. ⁶ Niyewuunya olwabutaikiriza bwabwe. Niyerugurya omumbaju nembaju zoona nga akwegesya. ⁷ Nayetta jaali eikumi nababiri, natandika okubatuma babiri babiri, nabawa obuyinza oku dayimooni. ⁸ Nabalabula obutatwala kintu kyoona kyoona omunzira okwiyaku omwigo gwonkai, timmere, wade ensawu, wade ekyikomo omunkobba zaabwe, ⁹ Naye ngabananikire enkaito, era temuzwaalanga kanzu ibiri. ¹⁰ Nabakoba nti buli nyumba yoona jemwakwingiranga mubeenge omwo okwikya lwemwaazwaayo. ¹¹ Buli kyiffo kyona ekyitalibaikiriza, obutabawura, nimwazwangawo, mukubbaigulyanga ocucu ali okumagulu gaanywe abibba omujjuurwa gyebali. ¹² Nibaaba nibakoberaabantu okweinenya. ¹³ Nibappeka emizumu jiingi, nibasiiga amafutta okubalwaire baingi nibabatamba. ¹⁴ Awo omukama oKerodi namuwura, kubba eibara ryamwei ryatikiriire, nakoba nti oYokaana omubatizza ayimbookere omubafu, amaani goona jigazwiire gakoora muniye. ¹⁵ Naye abaandi nibakoba nti niye Eriya, abandi nibakoba nti mulangi omwei okubalaangi. ¹⁶ Naye o Kerodi, niyawuliire nakoba nti o Yokaana gunatemereku omutwe nje, niye ayimbookere. ¹⁷ Kubanga o Kerode okenyini yatumire, nakwaata oYokaana, namubbwa, namuteeka omukoomera olwa Kerodiya, omukali wa muganda waamwei o Filipo: kubaanga yamuswoire. ¹⁸ Kubaanga o Yokaana yakobere o Kerode nti kibba kyamuzizo gwamwei okubba n'omukka mugaande. ¹⁹ N'oKerodiya ciyazwiremu namulaalika nayeendya okumwiita, natayiinza. ²⁰ Kubanga oKerode yatiinire o Yokaana, nga amumaite nti musai, mwikiiri namwetegekera. Yayendyaanga munno okuura byakubaza, nayete byamulekere nga takumanya calina kukola. ²¹ Awo olunakku olusai nilwaikire,oKerode nilwo yasuumbiire abakukunali bamwei; nabakukunali ba basirikale, nabaami ba Ggaliraaya: ²² Awo omwaara wa Kerodiya omwenyini niyaizire nabina, o Kerode naabo beyaali aikaire nabo nga bakulya nibamusiima, awo omukama nakoba omwala nti nssaba kyoona kyokwendya nacikuweerya. ²³ Namulairira nti kyoona kyoona kiwasaba, nacikuweerya yade ekitundu kyabukama bwange. ²⁴ Awo nawuluka, nakoba onyiina nti nssaabe kiki? namukoba nti omutwe gwa Yokaana omubatizza. ²⁵ Amangu ago nalabuka naiza ewa mukama, nasaba, ng'akukoba nti nkwendya ompeere mpani ati okulusania omutwe gwa Yokaana omubatiza. ²⁶ Awo omukama nanakuwala munno, naye olwabirayiro byamwei, naabo abaali baikaire naye nga bakulya natayendya kumwiima. ²⁷ Amangu ago omukama natuma omusirikale omwambala nsaale, namulagira okuleeta omutwe gwamwei; nayaba namuttemaku omutwe omukomera, ²⁸ naleeta omutwe gwamwei okulusaniya, naguwa omwaala, n'omwaala naguwa omamwei. ²⁹ Awo abegesebwa bamwei nibawuliire, nibaiza nibatwaala omutumbi gwamwei, nibaguteeka omuumbi. ³⁰ Abakwena nibakumbanire awali o yesu, nibamukoba ebigambo byoona byebakoore, nebyebayegeserye. ³¹ Nabakoba nti mwize nywenkai nywenkai mukyaama omukifo omutali baantu muwumulemuku kadooli. Kubaanga waliwo baingi abakwiiza nibaaba, ate nibatabba naibaanga yade awakuliira. ³² Nibaaba omuryato mukyaama omukifo awattali baantu. ³³ Nibabona nga bakwaba, baingi nibabamanya naabo abazwiire omubibuga byoona nibairuka nokulukalu nibabasookayo. ³⁴ Niyazwiire omuryaato nabona ebibiina nabasasiira kubanga baali nk'etaama ezitalina muliisya, natandika okubeegesya ebigambo bingi. ³⁵ Awo obwiire nibwaali bwakaire abegesebwa bamwei nibaiza weyaali nibakoba nti ekifo kini irungu, naati obwire bwakaire: ³⁶ Basiibule, baabe omubyaalo n'omubibuga bya kumbajju zoona beguure emmere. ³⁷ Naye nairamu nabakoba nti "nnywe mubawe emmere". Nibamukoba "nti twabe tugule emigaati ja dinaali ibiri tujibaweerye? ³⁸ Nabakoba nti mulina emigaati jiingai? mwaabe mubone. Nibaategeire nibakoba nti itaanu nebinagge bibiri. ³⁹ Nabalagira baikale boona bibiina bibiina okwisubi. ⁴⁰ Nibaikaara nyiriri nyiriri, ekikumi n'ataanu. ⁴¹ Nakwaata emigaati etaanu nebinagge bibiri nalola aiguru niyebalya, namenyamu emigaati nawwa abegesebwa baamwei babiteeke omumaiso gabaddi nebinagge ebibiri nabigabira boona. ⁴² Nibalya boona nibaikutta. ⁴³ Nibakumbaania obumulunguki nibwizula ebiibbo ikumi nabibiri, nebinage. ⁴⁴ Abo abaalire emigaati baali abasaiza enkuumi itaanu ⁴⁵ Amangu ago nawaliriza abegesebwa baamwei okuseyeeya okuryato basookeyo enseeri wamitala e Besusayida leke ye amale okusiibula ebibiina. ⁴⁶ Awo niyamaare okubasiibula nayaba okulusozi nasaba. ⁴⁷ Awo nibwali bukuswekeerya eryato ryali akati munnyaanja yete ng'ali yenkai okulukalu. ⁴⁸ Awo niyabweine nga bakugadda okugiimba kubanga ompuungo yaali nga akuwuluka mumaiso, omukisusumuko ekyakanai naiza jebaali okunyaanja nga akutambula; yaali akwaba kubaakalya: ⁴⁹ naye bo nibamubweine ng'akutambuura okunyaanja, nibalowooza nti kifaanaanyi, nibakuunga; ⁵⁰ Kubanga boona boona baamubweine, nibatuntura naye amangu ago nabaza nabo nabakoba nti "Ninje oni, mutatiina". ⁵¹ Naniina omuryato mwebaali, ekiwuungo nikiffa nibewunaija munno omunda yaabwe; ⁵² Kubanga ebyamigaati tibabitegeeranga naye emyoyo jaabwe jaali jikakanyali. ⁵³ Awo nibasomokere nibaiza omuunsi eya Genesaleti, nibaika okulukalu. ⁵⁴ Awo nibaazwire omuryato amangu ago nibamutegera. ⁵⁵ Nibairuka niberuguryamu omwo mwoona, nibatandika okwimuura abalaire okubitaanda okubaleeta webawuranga waali. ⁵⁶ Nabuli jiyayabanga, omumbuga, oba mubibuga, abamubyaalo, basangire abalwaire mubutale nebamwegaire bakwateku okumudalizo gwalugoye lwamwei; naabo abamwikangaaku nibawona.