¹ Era natandika okwegeseryanga okulukeitto lwannyaanja, ekibiina ekikooto omunno nekikumbaanira waali, nokusomoka nasomoka omukaato, naikaara omunnyaanja; ekibiina kyoona nekyibba oku nnyaanja okumutala. ² Nabegesya bingi omungeero, nabakoba omukwegesya nti; ³ muwuliirye, bonna omusigi yawulukire okusiga: ⁴ awo olwaikire naiyaali nga akusiga, ezimwei nizigwa okuntaando wanzira, ennyonyi niziiza nizzizirya. ⁵ Neziindi niziggwa awaali omwandaara awataali itakali liingi, amangu ago nezimera, kubba eittakali tiryaali rirai; ⁶ eisana niryayakire, nizootoka, olwakubba nti tizaalina mmizi, nezikala. ⁷ ezindi niziggwa awaali amawa, amawa nigaroka, nigaziita nizitabala bibala ⁸ eziindi nizigwa okwitakali erisai, nizeera nibikula nibyeeyongera nizibyaala okwiikya amakumi assatu era okwikya enkaaga era okwikya ekyikumi. ⁹ Nabakoba nti alina amatwi agakuura, awure; ¹⁰ olwo niiyaali yenkai, abo abaali bamwetooloire neikumi nababiri nibamubuulya okungeero ezo. ¹¹ Nabakoba ntii nnywe mwaawebweibwe ekyaama ekyabukama bwaNnyamwanga; naye baddi abanzai, byoona bibbenge byangeero. ¹² Nibabona babona naye tibeetegereza; era nibawura bawura naye tebategeera; era baleke okukyuuka okusasirwa. ¹³ Nabakoba nti, temumaite lugero luni? ale mwaalitegeera mutyai engeero zoona? ¹⁴ omusigi asiga kigambo. ¹⁵ Bani nibo abakuntaando yaanzira, ekigambo nekisigibwa, olwo nibaawura, amangu ago o sitaani naiza naiyamu ekigambo ekyaasigiibwe omwaabo. ¹⁶ Nabani batyo abaali basigiibwe eddi omwandaara, abo, nibawura ekigambo amangu ago baikiriza nokusemeerwa okwingi; ¹⁷ nibatabba mmizi omu bo, naye baamaare obwiire budooli, awo niwabbaawo okubona obujjune oba okwaisaisainibwa olwa kigambo, amangu ago nibenyinyala. ¹⁸ Nabandi abaalii basigiibwe awaali amawa, nibaawuliire ekigambo, ¹⁹ awo emiteeru jansi n'obubeyegi bwabuguuda, n'okwegomba kwabindi byoona nebingira bizikya ekigambo ni kitayala. ²⁰ Naabo abasigiibwe ewaali eitakali erisai, abawura ekigambo, abakyiikiriza, abeerya ebibala amakumi assatu, n'enkaaga n'ekikuumi. ²¹ Nabakoba nti ettaala ereetebwa okutekebwa omunda wakiibbo, oba ansi wa kitanda netateekebwa aiguru okukikondo. ²² Olwokubba ndoowo kibbisibwa, naye kiryetejebwa gonze ekyaabbisiibwe naye kyaaliboneka mu lwaatu. ²³ Buli alina amatwi agakuura, awuliirye. ²⁴ Nabakoba nti mwekuume kyamukuura, mu kippimo jje muppimira naanywe nimwo mwaali ppimirwa era mulyongerwaaku. ²⁵ Kubba, alina aaliweebwa, natalina aliyiibwaaku neekyo kyalinakyo. ²⁶ Nabakoba nti obukama bwa Nnyamwanga buli buti; nk'omuntu miisa ensigo okwitakali; ²⁷ nabbasya naimuka ebwiire n'omuiyangwe n'ensigo nemera nekula y'engatamaite niyameere. ²⁸ Ensi ebalya yonkai, okusooka kalagala, ate kirimbi ate engano ejikulu omu kirimba. ²⁹ Naye emmere neyengera, amagu ago ataaku olusolobyo, kubba amakungula gaikire. ³⁰ Nakoba nti twabiisanisya tutyai obukama bwa Nnyamwanga? Nandi ki twabunyonyoora ku kifaananyi ki? ³¹ Bukwiisana nka appekke aka kaladaali, ako nikasigibwa omwitakali, yadde nga niko kadyooli okusinga ensigoo zoona eziri omunsi, ³² naye nikasigibwa nga kakulu, kabba kakooto okusiinga omukubi gwoona, kanaga amataagi agakooto kale era ennyonyi zamwibbaanga nezisobola okwiikaara ansi wakiituuru kyaagwo. ³³ Nabakoba ekigambo omungeri ziingi nkeezo, nka nibayinza okuciwuura, ³⁴ tiyabazire nabo nga ndoowo ngeero, naye namanyisyanga abegesebwa baamwei niye byoona mukyaama. ³⁵ Awo olunaku olwo nibwaali bukusweka, nabakoba nti tusomoke twiike enseeri weedi. ³⁶ Nibaleekere ekibiina, nibamutwaara omubwatto era nobwaato obundi bwaali naye. ³⁷ Awoo ekiwuungo kiingi nekiiza, amayengo gaingi negasenseka omu bwaato, nakaato kaali nga kakwaaba kwizula. ³⁸ Ye omwenyenere yaali abasirye omu kiwenda oku kigugu, nibamwiimula nibamukoba nti omwegesya tokufaayo nga tukufa? ³⁹ Naimuka, nabwoigoora ompuungo, nakoba ennyaanja nti Sirika, weteeke. ompuungo naggwa, nebba jiteeki munno. ⁴⁰ Nabakoba nti kiki ekibatinisya? Mucaali kubba nakwikiriza? ⁴¹ Nibatiina okutiina okukooto, nibakkobangana nti ale oni ye niye nani, kubba ompuungo n'ennyaanja bimuura?