¹ Awoo nibaali nga balaampi okwikka eYerusaalemi nga baikire eBesufaage ne Bessaniya, okulusozi lwa Zeyituuni natuma abegesebwa bwaamwei babiri. ² Nabakoba mwaabe omumbuuga ebali omumaiso amangu ago nimwaingira omwo mukwaaba okubona omwana wa ndogoyi abbwebweibwe ataikarwaangaku muntu nakadyooli; mumusindabule mumuleete. ³ Omuntu nabakoba nti mukukolaki ekyo? mukobe nti omukama waiswe akumwendya; amangu ago akwiza kumuweereza eni. ⁴ Nibaaba nibasaanga omwaana wa ndogoyi nga ayemereire okumulyango enzai okunzira; nibamusindabula. ⁵ Abamwei okubaali beemeereire awo nibabuulya nti mukukolaki okusindabula omwana wa ndogoyi. ⁶ Nibabakoba nka oYesu niyabakobere nibabaleka ⁷ Nibaleeta omwana wa ndogoyi ewa Yesu, nibagunagaku engoye zaabwe; naikalaku. ⁸ Baingi nibaala ngole zaabwe okunziira; abandi nibaaliira ebikoola byamisaale bibatemere omundimiro. ⁹ Abaali bekeereire n'abazwangaku emabega nibabazira aiguru nti Ozaana; oweewebeibwe omukisa aiza omwibara lya mukama. ¹⁰ muwebweibwe omukisa obukama obukwiiza obwazeiza waiswe o Dawudi: Ozaana aiguru munno. ¹¹ Naika eYerusaalemi naingira omuYekaalu; nayamaare okweruguurya amaiso okubona byoona, obwire bwali nga bukusweeka, nawuluka nayaba eBessaniya ne eikumi nababiri. ¹² awoo nibwakeire okumambyamambya nibaali bazwiire omu Bessaniya nalumwa enzala. ¹³ Awoo niyalengeire omutiini nga guliku ebikoola nagwikaku abone oba ayiinza okufunaku ekintu; awo niyagwikireku, natabonaku kintu wabula ebikoola kubanga tinibyo byaali biro bya ttiini. ¹⁴ Nairamu nagukoba nti okuzwa eleero okwikya emirembe n'emirembe omuntu talaanga kubibala ebyo. Abegesebwa baamwei nibawura. ¹⁵ Awo nibaika eYerusaalemi, naingira omu yeekaalo nasooka okuppeka abaali bakutuunda n'abakuguura omu yeekaali, nagalamya emeenza eza baingiisyaanga effeeza, n'entebe zaabo abatuundanga engiiwa. ¹⁶ nataikiriza muntu kwakalya kitaabbu omu Yeekaalo. ¹⁷ Nayegesya, nakoba nti tikyawanddiikibwe nti enyumba yaange yakweetebwanga nyumba yakusabiramu amaanga goona? naye nywe mujifwiire mpuku ya banyagi. ¹⁸ Abakabona abakulu n'abawandiiki nibakiwulire, nibasala amagezi aga kumwitta: kubanga baamutinire kubba ebibiina byoona byawuninkirire olwa kwegesya kwaamwei. ¹⁹ Awoo buli kasweeko yawulukaanga ekibuga. ²⁰ Awoo nibwakeire emambya nga bakwakala nibabona omutiini nga gukukala okuzweera okukyitina. ²¹ Opeteero niyaizuukire namukoba nti Labbi, bona, omutiini guwaceenere gukaare. ²² O Yesu nairamu namukoba nti mubbe n'okwikiriza omu Nyamwanga. ²³ Mazuma nkubakoba nti buli alikoba olusozi luni nti kuuliibwa, onagibwe omunyanja; nga takugulukyagulukya mumwoyo gwaamwei, naye nga akwikiriza kyakubazza kikolebwe, yaalikiweebwa. ²⁴ Nikyo nzwa mbakoba ebigambo ebyo byoona byoona bye mukusaba n'okwegayiira, mwikirize nga mubibweirwe. ²⁵ Awoo niyeemeranga nga mukusaba, musonyiweenga, nimwabbaanga nekigambo okumuntu; n'oitowaanywe ali omwiguru abasasire ebibbi byanywe. ²⁶ Naye nywe nimutasonyiwenge, n'oitewaanywe ali omwiguru tiyasasirenge bibbi byaanywe. ²⁷ Nibaika eYerusaalemi; awo niyaali nga akutambula omu Yeekaalo nibaiza jaali abakabona abakulu n'abawandiiki n'abakaire. ²⁸ Nebamukoba nti buyinza ki obukukolesya bini? oba nani ayakuwaire obuyinza buni okukola bini? ²⁹ Awo oYesu nakoba nti Nanje kambabulye ekigambo kimwei, munyiremu, nanje nabakobera nywe obuyinza bwaamwei obukukolesya bini. ³⁰ Okubatiza kwa Yokaana kwizwiire mwiguru, oba mu baantu? munyiremu. ³¹ Nibeebulyangana bonkai na bonkai nti nitukoba nti kwazwiire mwiguru; yakoba nti kale kiki ekyabagaine okumwikiriza? ³² naye nitwakoba nti kwazwiire mubaantu, batyai abantu; kubanga boona balowooza mazuma okubba omulaangi. ³³ Nibairamu o Yesu nti tetumaite. o Yesu nabakoba era njeena tinabakobere obuyinza bwaamwei obukunkolesya bini.