¹ Awo olwaikire okulunaka lumwei okweezo yaali nga akwegesya abantu omu kanisa nga kubuuliira enjiri abakabona abakulu nabawandiiki amwe nabakaire nebamwizira. ² Nibabaza nga bamukoba nti tukobere buyinza ki abukulesya bini? Oba naani eyakuwaaire obuyinza obwo? ³ Nairamu nakoba nti njeena kambabuulye kimwei munkobere. ⁴ Okubatizibwa kwa Oyokaana kwazwire mwiiguru kaanda mu bantu. ⁵ Nibateesa boonkai na boonkai, nga bakoba bati nitwaakoba nti baazwire mwiiguru yakoba nti kiki ecabagaine okumwiikiriza? ⁶ Naye nitwaakoba nti kwaazwire mu bantu, abantu boona baatukubba amabbale kubanga baikiririza muno omu Yokaana okubba omulaguli. ⁷ Nibaairamu nti tibamaite jikwaazwiire ⁸ Oyesu nabakoba nti ale nanje tinabakobere nnywe obuyinza obukunkolesya bini jibwaazwiire. ⁹ Nasookere okobera abantu olugero luni nti omuntu omwei yasimbire olusuku lwamizabbibu, nalusigira abalumi, nayaba omunsi ejindi nalwaayo. ¹⁰ Awo omubiro byamwaaka abalumi nabatumira omwiru bamuweerye oku bibala bya mulusuku lwamizabbibu, naye abalumi nibamukubba ni bamuswaaza nibamusindika nga talina kutwi. ¹¹ Niyengera okutuma omwiru owondi, nooyo nibamukubba nibamuswaaza nibamusindika nga talina kutwi. ¹² Niyeyongera okutuma owakasatu, nooyo yeena nibamusumita ni bamupeka. ¹³ Oyo Omukama walusuku lwamizabbibu namukoba nti nakola ntyai? Ka ntume omwaana wange ayendyebwa kaanda oyo baalimuteekamu ekitinisya. ¹⁴ Naye abalumi nibaamuboine, nibateesa boonkanaboonka ngabakoba bati nti oni niye musika tutamwiita, obusika bubbe bwaiswe. ¹⁵ Nibamupeka omu lusuku lwamizabbibu, nibamwita. Ale yaalibakoba atyai Omukama walusuku lwamizabbibu. ¹⁶ Aliiza amulewo obalumi abo, nolusuku lwamizabbibu, yaali luwerya abaandi. Nibaawulire, nibakoba nti bitabbaawo. ¹⁷ Naye ye nabaloleera nabakoba nti ale kiki kini ecaawandiikibwe nti eibbaale aboomboki libaagaine, eryo niryo lyaacuukiremu omutwe gw'ansonda? ¹⁸ Buli agwa okwiibbaale eryo yaliyendekayendeka, naye oyo gweryaaligwaaku lyaalimufuumuula nkocuucu. ¹⁹ Awo abawandiiki nebakabona abakulu nibasala amagezi okumutaaku emikono omu biro ebyo, nibatiina abantu, kubbanga beetejerye nti okwaabo niko agereirye olugeero olwo. ²⁰ Nibamubuuliira, nibatuma abakessi nga bakwefuula abaikirire balandire okubigambo byaamwe, balyooke bamuweryeeyo edi okufuga okwawassaza needi obuyinza bwaamwe. ²¹ Nibamubuulya nga bakkoba nti omwegesya, tumaite ngobaza era ng'oyegesya byamazima nolweekyo tasosola mubantu naye oyegesya mazima enzira ya nnyamwanga. ²² Kisai iswe okuweryaanga okayisaali omusolo, kaanda bbe? ²³ Naye netejerye obukuusa bwaabwe, nabakoba nti mudange o eddinaali, ²⁴ '' Ekifaanani ekiruku nobuwandikeku byanaani?'' Bo nibakoba nti bya kayisaali. ²⁵ Nabakoba nti ale ebya kayisaali mu bisasulenge nnyamwanga. ²⁶ Nibatasobola kwiiya nsonga mu kigambo ecoo omumaiso gabantu ni yewuunya cairemu, ni basirika. ²⁷ Abasaddukaaya abamwe nibayiza jaali okubakoba nti ndoowo kuzuukira, nibamubuulya. ²⁸ Nga bakoba nti omwegesya Omusa yatuwandiikiire nti omuganda w'amuntu nafaanga ng'alina omukali naye nga talina mwaana omuganda waamwe abandule omukali oyo ailiryeewo omugaande ezzadde. ²⁹ Ale waaluwo abaluganda musanju, akusooka nabandula omukali, nafa nga talina mwaana. ³⁰ n'owakabiri. ³¹ N'owakasatu namubandula era batyo abaali omusaanju ni bafa nibataleka baana. ³² Olwamaale omukali nafa. ³³ Ale omukuzuukira mukanaani okwaabo kubbanga boona omusanju baamubandwiire. ³⁴ Oyesu nakoba nti abaana bansi eni babandula, bafumbirwa. ³⁵ Naye badi aba saanyiziibwe okwiika omunsi eyo nomukuzuukira okwamu bafu tibabaandulenge ate tibafumbirwenge. ³⁶ Kubbanga nokufa tibayiinza kufa era, kubbanga baali nkabamaleiyika, era nibo baana ba nnywmwanga nka nibali abaana bakuzuukira. ³⁷ Okumanyamanyanga bafu bazuukira, ne Omusa yakirangire kukibira niyamweetere Omukama nnyamwa nga wa OIbulayimu, era nnyamwa wa OIsaaka, era nnyamwanga wa Yakobo. ³⁸ Naye yeti nnyamwanga wa bafu naye waboomi kubanga boona babba boomi ku lwaamwe. ³⁹ Abawandiiki abamwe nibaairamu, nga bakoba bati omwegesya abazire okusai. ⁴⁰ Kubbanga tibaajjanganga kumubuulya kigambo coona era. ⁴¹ Nabakoba nti babaza batya nga Okristo niye mwaana wa Odawudi. ⁴² Kubbanga Odawudi omwenyenere abaza omukitabo cazabbuli nti Omukama yakobere. Omukama wange nti ikaala okumuno gwange ogwaddyo. ⁴³ Okwiica lwenaali cuusa abeilabe baamwe entebe yamagulu gaamu. ⁴⁴ Odawudi amweeta Mukama wamwei. Ale mwaana waamwe atyai? ⁴⁵ Awo abantu boona nibamuwuuraanga, nakoba abegesya baamwe nti. ⁴⁶ Mwekuumenga abawandiiki abakwendya okutambuuranga omungoye ezirai, abakwendya okulamucibwa nga omubatale, nentebe zampi omumakanisa ne bifo ebyakinisya okumbaga. ⁴⁷ Abawamba ennyumba za banamwandu, abasaba omuno omubunafuusi, abo baalisaalwa omusangu ogukusinga obukooto.