¹ Awo olwayikire Apollo niyaali e Kolinso, OPawulo bweyayakire omu mbaju eziri waiguru nayika omu Efeso nasanga Abayigirizwa abaamu. ² Nabakoba nti mwaweerebwe omwooyo omututukuvu numwaikitiize? Nibamwiiramu nti bbe! Gonze nokuwuura tetuwuuranga walowo omwooyo omutukuvu. ³ Nabakoba kale mwabatizibwe kwingiramu kiki? Nibamukoba nti omukubatizwa kwa Yokaana. ⁴ OPawulo nasimoola nakoba nti OYokaana yabatiize okubatiza okwa kwenenya ng'akoba abantu baikirize akwaaba okwiiza enyuma waamwe, niye OYesu. ⁵ Bwe bawuliire nibabatizibwa okwingira omu ibara lya mukama waiswe OYeesu. ⁶ OPawulo niyabataireku emikono omwooyo omutukuvu naiza oku bo, nibasimoola enimi nibalagula. ⁷ Abantu boona baali bayika nga eikumi n'ababiri. ⁸ Naigira omu Ikumbaaniro nasimoolanga n'obuvumu okumala emyeezi esatu nga awakananga era ngabasenda senda olw'ebigambo eby'obwakabaka obwa katonda. ⁹ Naye abandi bwe bakakanyaire nibalawuure nga bazuma enzira eya Yeesu omu maiso gekibiina; n'azwa gye bali nayawula Abayigirizwa nawakanira nabo omu isomero lya Tulano buli lunaku. ¹⁰ Ebyo nibimala emyaaka ngeibiri boona abaali baikala omu Asiya nibawuura ekigambo kya mukama waiswe, Abayudaaya n'Abayonaani. ¹¹ Awo buli lunaku OKatonda nakolanga ebyamagero ebitabonwangaku omu mikono gya Pawulo. ¹² Nabalwaire ni babaleeteranga ebitambaala ne ngoye ezoku mubiri gwaamwe, endwaire nizibazwangaku. ¹³ Naye abantu Abayudaaya abakireereese nga tebaaliiku waabwe nibeetulinkiirya Inibatandika okugobanga dayimooni okutu omu ibara lya Yeesu OMukama waiswe nga bakoba nti mbalayirya OYeesu OPawulo gwabuulira. ¹⁴ OLwayikire ne wabbawo abaana musanju abataan ba Sukeewa Omuyudaaya okabona omukulu, boona mbakola balyo. ¹⁵ Odayimooni nabaairamu nti OYeesu mutegeera, n'OPawulo mmumaite; naye nnywe ninywe banaani? Ah! ¹⁶ Omuntu eyaluku odayimooni nabagulukira nabagwaaku nabasingya amaani n'okuluka nabairuka maseezere nga bali bwereere; taaku n'ebi wundu. ¹⁷ Ekyo nikitegeerwa abantu boona abaikalanga omu Effeso Abayudaaya n'Abayonaani entiisa nekwaata abantu boona, eibara lya Mukama waiswe OYeesu neligulumizibwa. ¹⁸ Era baingi ku abo abaikirize ni baiza nibaikala nibategeeza ebikolwa byabwe. ¹⁹ Era baingi, ku abo, abaakolanga ogwa bufumu nibakumbaanya ebitabo, ensiriba, nebyamalogo bingi nibabyookya omu maiso gabantu boona. Nibabala omuwendo gwabyo nibona nga guyika ebitundu bya Efeeza emitwalo obukumi etaana. ²⁰ Kityo ekigambo kya mukama waiswe nikyeyongera amaani ni kiwangula. ²¹ Ebyo mbyaweeire, OPawulo nalowooza omu mwooyo gwaamwe okwakala ku e Makedooniya ne Akaya n'okwaba e Yerusaalemi nga akukoba nti nindimala okubbaaku eyo, era kigwanira okubona n'e Ruumi. ²² Natuma e Makedooniya, babiri okwabo abaamuweerezanga OTimoseewo no Eraasito ye onanyere n'alwaayo ebiro ti bingi omu Asiya. ²³ Omu kiseera ekyo ni wabbaawo akacwano ka kooto olu nzira. ²⁴ Kubanga omuntu eibara lyaamwe Demeteriyo omu weesi waffeeza; eyakolanga obusabo bwa Ffeza nga bwa lubaale ayetebwa Atemis nafuniranga abaweesi amagoba maingi. ²⁵ Nakumbanya abo, n'abakolanga emirimu egyo, nakoba nti Basaiza nywe bairange; mumaite nti omulimo ogwo, obugaiga bwaiswe numwo buzwa. ²⁶ Mukubona era mukuwuura nga ti mu Efeso mwonkai; naye nga n'omu Asiya yoona yoona OPawulo oyo Agisenseere nasendasenda era akyuusirye ekibiina kikooto ng'akoba nti Abakolebwa n'emikono ti babba bakatonda. ²⁷ Naye ti niiswe iswenkai tuboine akabbi komulimo gwaiswe okunyoomebwanga, era n'eisabo lya Atemis OKatonda omukulu omukali okulowoozebwanga nga ti kintu nokutoolwa natoolebwamu ekitiibwa kyaamwe oyo asinzibwa Asiya yoona nensi yoona. ²⁸ Abawuliire ekyo nibaizula obusungu, nibasimoora waiguru nti Atemis! Ow'Abefeso Omukulu! ²⁹ Ekibuga kyoona nikiizula okutabuka kunu boona nibagugumuka nomwooyo gumwe okuyika omu (Theater) sweeta bwe bamaare okukwata OGaayo n'O'Alisutaluuko ab'e Makedooniya abatambulanga n'OPawulo. ³⁰ OPawulo niyatakire aingire omu bantu, Abayigizwa ni bamugaana. ³¹ Era abakulu abamwe abaali omu Asiya abaali emikwaano gyaamwe, nibamutumira nga bamwegayiira aleme kwewaayo omu Teyateero (Theater). ³² Abamwe nibasimoora awaiguru bundi; n'abandi bundi, olw'okubba ekibiina kyaali kyetabwiire. So nabandi baigi ni batategeera nsonga e bakumbaanirye. ³³ Nibatoola Alegezanda omu kibiina, Abayudaaya nga baku musiindikiirya Alegezanda n'awenya n'omukono nataka okwennyonyola eri abantu. ³⁴ Naye mbamutegeire nga Muyudaaya, boona boona nibaleekaanira awa iguru omudoboozi limwe erikoota nti Atemi! Wa Abeefeso! Mukulu! Okumala esaawa ibiri. ³⁵ Omuwandiisi ni yasirikirye ekibiina, nakoba nti Abasaiza Abeefeso, muntu ki atategeera nga ekibuga kya Abeefeso nikyo kikuuma eisabo lya Atemi Omukulu ne kifaananyi ekya zwiire eri OZewu!! ³⁶ Kale olw'okubba ebyo tibyegaanika kibagwaniire nywe okwikaikana nobutakola kintu kyoona nga mwanguyiirya. ³⁷ Kubanga muleetere abantu banu abatanyagire bya mw'isabo, so tebaivoire OKatonda waiswe omukali. ³⁸ Kale oba ng'ODemeteriyo nabaweesi aba iraamwe baali nabo nga balina ekigambo oku muntu; enkiiko, zirowo, aba masaza balowo, eli balopengane! ³⁹ Naye oba nga mukuswagana bindi, byasalibwawo omwikumbaaniro eribbaawo obuliizo, ez'amateeka. ⁴⁰ Kubanga dala tuyinza n'okuyikibwaaku akabbi, olw'akegugungo kani a leero; ol'okubba ndoowo nsonga gye tulisobola kuwozya olw'okukumbaana kunu. ⁴¹ Bwe yamaare okusimoola atyo nagumbulula ekibiina mbaba.