¹ Malayika wo’khutaanu kakhubba eturumbete yaye, khandi nawona eηiniηini eyali niyikwiye okhutula khu kulu paka khu syalo. Eηiniηini yayeresewa olusumuluso lwe’syalo assi ekotero. ² Nikekulawo esyalo syawasi kotero, omwoosi kwatulamo okuli nga mwoosi kwafudumukha nga okutula khu kuliro kukhongo eryuba nende amukulu bya maliyisiwa no’mwoosi okutula assi kotero. ³ Ne mu mwosi mwatulamo ensike chekha khu syalo chaweresewa owunyala owakakana nende ow’otweere cho’khu syalo. ⁴ Chakaniwa okhutawumisa enyasi lyo’khu syalo oba esyaamo ata omusaala kwoosi, naye abaatu abo boηηene abatalikho omukhuuru kwa Weere khu weeni wawe. ⁵ Sichayeresewa owunyala okhubeeta, naye okhubasandiya khwoηηene okhumala emyesi chitaanu. Ne’ngisa chabakaana chali ngo’khuwochewa khw’otweere niyiwochire omutu. ⁶ Mu ndaalo echo abaatu balyekomba okhufwa, ne sibali khwakana; balyekomba okhufwa, naye nga okhufwa khuliberukha. ⁷ Ensike chali oti fwana ensukhiri echitekekhirwe eye. Khu mitwe chacho chambala esiitu siri nge’ngule ye’feesa, no’weeni wacho nga wufwana oweeni owabaatu. ⁸ Efwiiri lyacho lyali nge’fwiri lya’bakhasi, khandi na’meeno kacho kali nga ake’dalaŋηi. ⁹ Chali nebyuma byambaliwa khu sirifu ebyali nge’bibya, khandi no’lukhero lwe’mbaya lwali nge’nkhubba ye’nsukhiri nyingi echikingire abalwani abeyuna okhucha okhulwana. ¹⁰ Chali n’emikhinga chalikho entununu ngo’tweere, khandi mu mikhinga chacho chali n’owunyala ow’okhusandiya abaatu okhumala emyesi chitaanu. ¹¹ Chali nende owali nga omwene’ngo obakhulira malayika wa assi ekotero, owali ne’riita mu lwe’Bulaniya nga nje Abadooni, ne mu Luyonaani nga nje Apolyooni. ¹² Esiwonereso sisokha siweye; bibiri biriyo biicha. ¹³ Malayika wo’mukaga kakhubba eturembete yaye, khandi nawulira ekono niritula mu njika chine echa olutaari ye’fweesa eyali mu moni cha Weere. ¹⁴ Lyawolera malayika wo’mukaaga owali ne turumbeete liiti, “Lekhula ba malayika bane bala abawoyewa khu mwalo mukali okwa Yufeerete.” ¹⁵ Ne ba malayika bano bane abali nibabikhirwe nibetekefu khu lwe’saawa yene yino, no’ludaalo khandi no’mwesi no’mwaka balekhuliwa okhwita esitundu syo’khudatu esyo’mutu yeesi. ¹⁶ Owungi wabo abali baninire khu nsukhiri bali emilyoni emya chibiri. Nawulira owungi wawe. ¹⁷ Ensukhiri nabachirusya banawona mu khuwonekherwa bafwana baati: ebyuma byo’khusirifu byali ebya mabanga, nga cha rabboki, nende namuki ngo’khwadukha khwe’sibiriiti. Emitwe ch’ensukhiri nga chifana nge’mitwe che’dalanηi, ne mu minwa chacho nga chitulamo omuliro, no’mwosi no’muliro. ¹⁸ Sirala syo’khudatu syo’mutu syetewa nende endwaye chino chidatu echo’muliro, omwosi nende omuliro kwe’sibiriti okutula mu minwa chacho. ¹⁹ Amaani ak’ensukhiri kali mu minwa chacho nende mu mikhinga chacho; khuba emikhinga chacho chali nge’njokha, echirikho emitwe chi chakhosesanga okhuwumisa abaatu. ²⁰ Abaatu boosi abali basikaye nibatetewa n’endwaye chino basikala nibateyolobisye emirimo cha makhono kawe; basikala nibatalekheye okhwinamira emisambwa nebilongalonge ebyakholewa mu feesa, saabu, mu mugasa, mu makina ne’mbaawo__ ebifwananyi ebitanyala khuwona, okhuwulira oba okhukenda. ²¹ Ata sibanyala okhweyolobya owiiti wawe, owukholi wa mayiya kawe, owudaamba wawe oba owiibi wawe.