¹ Bino nibyakhawa nawona ba malayika bane nibemire mu nsoonda chine eche’syalo, nibadiririye amabewo kane ake’syalo okhukayira embewo yoosi okhutawuucha khusyalo, oba khu kuyanja oba khu musaala kwoosi. ² Awo nawona malayika wundi natulira ewutula lyuba, nali no’mukhuuru kwa Weere mulamu. Kalanga mu kono khongo bamalayika bano bane abali nibayeresewa owunyala wo’khunyaasa esyalo nende okuyanja: ³ “Mutanyasa esyalo oba okuyanja oba emisaala nikhutata omukhuuru khu weeni wa bakhosi aba Weere wefwe omulamu.” ⁴ Khandi nawulira owungi wabo abali nibatewakho omukhuuru: 144,000 okhutula mu nyanyi choosi echa Yisirayiri. ⁵ Okhutula mu lwanyi lwa Yuda bali 12,000 abalikho omukhuuru, okhutula mu lwanyi lwa Leubbeni 12,000, okhutula mu lwanyi lwa Gadi 12,000, ⁶ okhutula mu lwanyi lwa Asheri 12,000, okhutula mu lwanyi lwa Nafutali 12,000, okhutula mu lwanyi Manase 12,000, ⁷ okhutula mu lwanyi lwa Simoni 12,000, okhutula mu lwanyi lwa Lefwi 12,000, okhutula khu lwanyi lwa Isaka 12,000, ⁸ ohutula mu lwanyi lwa Sebulooni 12,000, okhutula mu lwanyi lwa Yosefu 12,000, okhutula mu lwanyi lwa Benyamini 12,000. Okudiikha kwamaani mu Maganjuula Malafu. ⁹ Bino nibyawa ne’wuunja emutwe wange aliwo okudiikha kwamaani eyiwuma onyala kakubala, okhutula mu wuli syalo, wuli gwanga, abaatu no’lulimi, nibemire emutwe w’esisaala syo’wene’ngo nende emutwe w'omwaana wekoondi. Bali bambaye amaganjuula malafu nibadiiye amasaga ke’misaasa mu makhono kawe. ¹⁰ Ngabalira mukono lya’mukulu baati: “Okhuwonesewa khwa Weere weefwe, owikhala khu sisaala sy’owene’ngo, nende eyiri Omwaana wekoondi.” ¹¹ Bamalayika bosi boosi bali bemire nibewodokhanisye esisala sy’owen’engo no’khwewodokhana abakhuluutu nende ebiitu Weere bikalonga bine. Bakwa khu makulu n’oweeni wawe emutwe we sisaala sy’owen’engo nibamwinamira Weere, ¹² nga bawoola baati: “Amiina! Enfuma no’luyaali na’makesi no’khwebasa no’khukinisiwa owunyala namaani bibe khu Weere weefwe endaalo choosi Amiina!” ¹³ Awo mulala khu bakhuluutu kanteeba ati, “Nibano abali mu maganjula malafu__ nje ba nanu, khandi batula yeena?” ¹⁴ Nakowoolamo nti, “Ssebo, omanyire.” Naye kawoola ati, “Bano nje abo abatulire mu khusandisiwa khwa’maani; bosise amaganjuula kaawe banyala okhukalabya bakakhola kalafuwa okhubita mu mabaanga k’omwaana wekoondi. ¹⁵ Nolwesyo, “bali mu moni chesisaala sy’owene’ngo wa Weere khandi bamuweresa esideete nesiro mu nyumba yaye; khandi ye owikhala khu sisaala sy’owen’engo kecha okhubabambulirakho eweema yaye. ¹⁶ Si balikowolamo khandi okhuwulira enjala; si balikowolamo khandi okhuwulira owuluwo. Omubasu si kulibakhubba, Oba owubafu wusaamba lukali. ¹⁷ Olwokhuba omwaana wekoondi oli akati w’esisaala sy’owen’engo nje oliba omwaayi wawe; alibatangirira eyiri ensulo cha’maachi ko’wulamu. Nende Weere alibasimuula wuli sika khu moni chawe.”