¹ Binno nibiweye natingaala, nawona emutwe wange omulyango ni kwemire nga mwikule mwikulu. Khandi nende ekono linawulira olwamberi nirinomalomera ng’eturumbeete niriwoola liiti, “Yicha eno, male nkhwekese ebiri n’okhulondakho bino nibiweeye.” ² Wangu weene nali mumwoyo, ne mu moni wange yaliyo esisaala esy’owen’engo mukulu nende owali nasikhaayekho. ³ Khandi oyo owasiikhalakho kali afwana, nga amakina akamekhamekhana aka Yasepi nende Sadiyo. Lufudu, ofwaana nende ekina lilangiwa mbo Sunalidi niryewodokhanisye esisaala syo’wen’engo. ⁴ Okhwewodokhaniya esisaala sy’owen’engo byaliyo ebisaala bindi amakhumi kabiri nende bine eby’owen’engo, nga ababikhaayekho bali abakhuluutu amakhumi kabiri nende bane. Bali bambaaye ebirafu nende engule che Sabbu khu mitwe chawe. ⁵ Okhumyesukha okhwekhubba khwatula mu bisaala by’owen’engo, amakono nende okhwadulukha khwe’nfula. Emutwe wesisaala sy’owenengo, yaliyo amataara musaanfu akali nikamekhamekhana chino nje emyoyo musaanfu echa Weere. ⁶ Khandi emutwe we’sisaala sy’owen’engo yaliyo esyali ne’fwaana nga okuyanja okwegiraasi, niyimekhamekhana nga’makina akenfula. Akati weene, okhwewodokhoniya esisaala esy’owen’engo, yaliyo ebiitu ebyalongewa ebiramu bine, khandi nga bichuuye emoni, emutwe nende emukongo. ⁷ Esironge esiramu esyamberi syali nga edalaηηi, esy’okhubiri syali nga esirusi, esyo’khudatu syali no’weeni nga omutu, esyokhune syali nga enkhokhotole eribburukha. ⁸ Nawuli sirala khubironge bine syali nende embaya mukaaga khandi nga siwikhiiwe nende emoni syosi syoosi, ata nende mukati w’embaya. Esideete nende esiro sibyakhayanga okhuwoola biiti: “Omwolerefu, omwolerefu, omwolerefu nje Omwami Weere owo’wunyala wosi woosi, Owali, khandi oliwo, khandi oliicha.” ⁹ Nawuli biramu bironge ni byawanga oluyaali, okhwinamirwa nende okhwebasa eyiri oyo owikhala khu sisaala sy’owen’engo khandi oliwo emirembe n’emirembe, ¹⁰ abakhuluutu amakhumi kabiri nende bane bakwa assi wooyo owikhala khu sisaala sy’owen’engo, khandi bamwekalikhira oyo obaawo emirembe ne’mirembe. Baala engule chawe mu moni ch’esisaala sy’owen’engo ni bawoola baati: ¹¹ “Okhoyera, Omwami wefwe khandi Weere, okhufuna oluyaali nende okhwinamirwa nende owunyala, olwokhuba walonga ebiitu byoosi, khandi no’khudakha khwawo byalongewa khakira biriwo.”