¹ Naweresewa esibya esifwana nge’kadda nga esipiimo syo’khukerera khandi nawolerwa nti, “Cha okere enyumba ya Weere nende alutaari, khandi obale abasaba bali awo. ² Naye otatakho esisenge sye’rwanyi; otasikera, khu lwokhuba syayeresewa abateende. Balisenakirira esifwo syolerefu okhumala embaka ye’myeesi 42. ³ Nja okhuwa abajjulisi bange babiri owunyala, bamale balakule okhumala endaalo 1260, nibali mu byambalo byamaguniya.” ⁴ Chino nje’misaala mituli chibiri khandi ne bisindi bibiri ebya’mataara akeema mu moni cho’mwami owo’khusyalo. ⁵ Nisiba mbo omutu yeesi akesakho okhubakholakho esibi, omuliro kutula mu minwa chawe chamalawo abasuku bawe. Yino nje engeri omutu yeesi odakha okhubakholakho abo owubi atekwa okhufwa. ⁶ Bano baatu bali no’wunyala okhwikala ekulu enfula yikhaye okhukwa mu bikha bibaba balakula; khandi bali no’wunyala okhukalukhaniya amaachi kafukha amabaanga khandi bali no’wunyala owukhubba esyalo no’lumbe lwe mbya olwa wuli nkholo mu bikha bibadakhiyemo. ⁷ Wunanu nibaba ni bamalire okhuwuulira emboosi, okusolo kucha okhutula yikwekhala kubaseete, kubakhise amaani, khandi kubeete. ⁸ Emilambo chawe chicha okhukona khu makira ke’siko sikhongo, esifanirisiwa wusa syalangiwa Sodoma nende Misiri, eyo yosi Omwami wawe yibamukhomerera. ⁹ Okhumala endaalo chidatu ne’situndu abasaacha okhutula mu batu boosi, ebikha, enimi, ne’byalo bicha okhwelolera emibiri chawe, khandi bachikayire okhusikhiwa. ¹⁰ Abaatu bo’khusyalo bacha wusa okhusangalira okhufwa bakowolayo batawo omuyumo no’khuweresaniya ebiyanwa, khulwokhuba ba nabbi bano babiri basandiya abo abali abamenya khu syalo. ¹¹ Naye endaalo chidatu nesitundu ni chiweye omuuya kwo’wulamu okhutula eyiri Weere kwabengiramo, bema khu makulu kawe, okhutenga khwa’khubba abo abali ni babawene. ¹² Awo bawulira ekono khongo eritula mukulu niribawoola liiti, “Mwiche amukulu ano.” Bamala banina mukulu mu sireesi, abasiku baawe nibabewunjire. ¹³ Mu saawa yene eyo aliwo embukuma yamaani nende eweema ye siko sikali yakwa. Abaatu elifu musaanfu betewa mu mbukuma eyo, nabawonamo batenga lukali boola bawa Weere wo’mukulu oluyaali, ¹⁴ engisa yo’khubiri yiweeye; engisa yo’khudatu yiicha wangu wene. Eturumbete Yo’musaanfu. ¹⁵ Malayika wo’musaanfu kakhubba eturumbete yaye, abawo amakono makhongo mukulu, kawoola ati: “Owene’ngo wo’khusyalo wufukhire owene’ngo w’Omwami wefwe khandi owa Kuristo waye, khandi alifuka endaalo ne’ndaalo.” ¹⁶ Khandi abakhulutu amakhumi kabiri nabane, abali nibekhaye khu bisaala byawe byo’wutuki mu moni cha Weere, benama oweeni wawe benamira Weere, ¹⁷ nibawooola baati: “Khuwa okhwebasa yuli, Omwami Weere owamaani, oyo oliwo khandi owaliwo, khulwokhuba oyirire owunyala wawo wa’maani khandi ochakire okhutuka. ¹⁸ Ebyalo byali netima; khandi etima lyawo lichire. Ebikha byolire ebyo’khukhengera abafwa, n’okhuwa abakhosi bawo akhasiimo ba nabbi nabolerefu bawo nende abo abaweresanga eriita lyawo oluyaali, abatono nabakali__ no’khusikhirisa abo abasikhirisa esyalo.” ¹⁹ Olwo enyumba ya Weere mukulu yekuliwawo, khandi mukati we nyumba ya Weere eryato lye’ndakano yaye lyawonekhana. Khandi wechawo okhumyensukha khwe’khubba, no’khwaddulukhana khwe’khubba, okhudengana khwe’syalo namakina kenfula masito ka’maani.