¹ Ekigambo kya Mukama ekyaiziire Zefaniya mutaane wa Kuusi, mutaane wa Gedaliya, mutaane wa Amaliya, mutaane wa Kezeekiya, mu mirembe gya Yosiya mutaane wa Amoni, kabaka wa Yuda. ² Ndizikiririrya dala byonabyona okuva ku maiso g'ensi, bw'atumula Mukama. ³ Ndimalawo omuntu n'ensolo; ndizikirirya enyonyi egy'omu ibbanga n'ebyenyanza ebiri mu nyanza, n'enkonge wamu n'ababbiibi: era ndimalawo abantu okuva ku maiso g'ensi, bw'atumula Mukama. ⁴ Era ndigololera ku Yuda omukono gwange no ku abo bonabona abali mu Yerusaalemi; era ndimalawo ekitundu kya Babbaire ekifiikirewo okuva mu kifo kino, n'eriina lya Bakemali wamu na bakabona; ⁵ n'abo abasinzizirye eigye ery'omu igulu ku nyumba waigulu; n'abo abasinza, abalayiriire Mukama nga balayira Malukamu; ⁶ n'abo abairire enyuma obutasengererya Mukama; n'abo abatasagiranga Mukama waire okumubuulya. ⁷ Sirika awali Mukama Katonda: kubanga olunaku lwa Mukama luli kumpi: kubanga Mukama ategekere sadaaka, atukuzirye abageni be. ⁸ Awo olulituuka ku lunaku Mukama kw'aliweerayo sadaaka ndibonereza abakungu n'abaana ba kabaka n'abo bonabona abavaire ebivaalo ebinaigwanga. ⁹ Awo ku lunaku olwo ndibonereza abo bonabona ababuuka ku mulyango, abaizulya enyumba ya mukama waabwe ekyeju n'obubbeyi. ¹⁰ Awo ku lunaku ludi, bw'atumula Mukama, walibbaawo eidoboozi ery'okuleekaana eriva ku mulyango ogw'ebyenyanza, n'okuwowogana okuva mu luuyi olw'okubiri, n'okubwatuuka okunene okuva ku nsozi. ¹¹ Muwowogane, imwe abali mu Makutesi, kubanga abantu bonabona aba Kanani gibasangire: n'abo abeebbinikanga feeza bazikiriire. ¹² Awo olulituuka mu biseera ebyo nditaganjula Yerusaalemi n'etabaaza; era ndibonereza abasaiza abatesengezerye eibbonda lyabwe, abatumula mu mwoyo gwabwe nti Mukama talikola kusa so talikola kubbiibi. ¹³ N'obugaiga bwabwe bulifuuka munyago, n'ennyumba gyaabwe matongo; niiwo awo, balizimba enyumba naye tebalizituulamu; era balisimba ensuku egy'emizabbibu naye tebalinywa mwenge gwamu. ¹⁴ Olunaku olukulu olwa Mukama luli kumpi, luli kumpi era lwanguwa mangu inu, eidoboozi ery'olunaku lwa Mukama; omusaiza ow'amaani alikungira eyo ng'aliku obwinike bungi. ¹⁵ Olunaku olwo lunaku lwo busungu, lunaku lwo bwinike n'okubona enaku, lunaku lwa kuziikiraku n'okulekebwawo, lunaku lwe ndikirirya n'ekikome, lunaku lwa bireri n’endikirirya ekwaite, ¹⁶ lunaku lwe ikondeere n'okulawa, eri ebibuga ebiriku enkomera n'eri ebigo ebigulumivu. ¹⁷ Era ndireeta obuyinike ku bantu, batambule ng'abaduka b'amaiso, kubanga bayonoonere Mukama: n'omusaayi gwabwe gulifukibwa ng'enfuufu, n'omubiri gwabwe ng'obusa. ¹⁸ Efeeza yaabwe terisobola kubawonyerya ku lunaku olw'obusungu bwa Mukama waire ezaabu yaabwe; naye ensi yonayona omusyo ogweiyali bwe guligyokya: kubanga alimalawo, niiwo awo, alimalirawo dala n'entiisya abo bonabona abali mu nsi.