¹ Pawulo, omwidu wa Yesu Kristo, eyayeteibwe okubba omutume, eyayawuliirwe enjiri ya Katonda, ² gye yasuubizirye eira mu banabbi be mu byawandiikiibwe ebitukuvu, ³ ebigambo ebitumula ku Mwana we, eyazaaliibwe mu izaire lya Dawudi mu mubiri, ⁴ eyalagiibwe okubba Omwana wa Katonda mu maani, mu mwoyo gw'obutukuvu, olw'okuzuukira kw'abafu, Yesu Kristo Mukama waisu, ⁵ eyatuweeserye ekisa n'obutume olw'okuwulira okuva mu kwikirirya mu mawanga gonagona, olw'eriina lye; ⁶ era mweena muli mu ibo, abayeteibwe okubba aba Yesu Kristo: ⁷ eri bonabona abali mu Rooma, abatakibwa Katonda, abayeteibwe okubba abatukuvu: ekisa kibbe naimwe n’emirembe ebiva eri Katonda Itawaisu no Mukama waisu Yesu Kristo. ⁸ Okusooka, nebalya Katonda wange ku bwa Yesu Kristo ku lwanyu mwenamwena, kubanga okwikirirya kwanyu kubuulirwa mu nsi gyonagyona. ⁹ Kubanga Katonda niiye mujulizi wange, gwe mpeerezia mu mwoyo gwange mu njiri y'Omwana we, bwe ntumula ku imwe obutamala, ¹⁰ nga neegayirira buliijo mu kusaba kwange kaisi ntambulibwe kusa ne atyanu, Katonda bw'ataka, okwiza gye muli. ¹¹ Kubanga mbalumirwa okubabona, kaisi mbawe ku kirabo eky'omwoyo, kaisi munywezebwe: ¹² niikwo kusanyukagana awamu naimwe olw'okwikirirya kwanyu n'okwange. ¹³ Era, ab'oluganda, tintaka muleke kumanya ng'emirundi mingi nalowoozanga okwiza gye muli (ne nziyizibwanga okutuusia atyanu), era kaisi mbeeku n'ebibala mu imwe, era nga mu mawanga agandi. ¹⁴ Abayonaani era na banaigwanga, ab'amagezi era n'abasirusiru, bamanja. ¹⁵ Era kyenva ntaka okubabuulira enjiri mweena abali mu Rooma nga bwe nyinza. ¹⁶ Kubanga enjiri tenkwatisia nsoni: kubanga niigo amaanyi ga Katonda olw’okulokola eri buli aikirirya okusookera Muyudaaya era n'eri Omuyonaani. ¹⁷ Kubanga mu iyo obutuukirivu bwa Katonda bubikuliwa obuva mu kwikiriya okutuusia mu kwikirirya: nga bwe kyawandiikibwe nti Naye omutuukirivu yabbanga mulamu lwo kwikirirya. ¹⁸ Kubanga obusungu bwa Katonda bubikuliwa okuva mu igulu ku butatya Katonda bwonabwona n'obutabba no butuukirivu obw'abantu abaziyiza amazima mu butabba no butuukirivu; ¹⁹ kubanga ebya Katonda ebimanyika biboneka eri ibo: kubanga Katonda yababoneserye. ²⁰ Kubanga ebibye ebitaboneka okuva ku kutonda ensi bibonekera dala nga bitegeererwa ku bitonde, obuyinza bwe obutawaawo n'obwakatonda bwe; babbe nga babula kyo kuwozya: ²¹ kubanga, bwe baamanyire Katonda, ne batamugulumizianga nga Katonda waire okumwebalyanga, naye ne basengereryanga ebibulamu mu mpaka gyabwe, omwoyo gwabwe omusirusiru ne guzikirizibwa. ²² Bwe beeyetere ab'amagezi, so nga baasiriwala, ²³ ne bawaanyisia ekitiibwa kya Katonda atawaawo okufaanana ekifaananyi ky'omuntu awaawo, n'eky'ebibuuka n'eky'ebirina ebigere ebina n'eky'ekuusa. ²⁴ Katonda kyeyaviire abawaayo eri obugwagwa mu kwegomba kw'emyoyo gyabwe, okwonoonanga ekitiibwa ky'emibiri gyabwe bonka na bonka: ²⁵ kubanga amazima ga Katonda baagawaanyisiamu obubbeyi, ne basinzanga ne baweerezanga ekitonde okusinga Omutondi, eyeebazibwa emirembe n'emirembe, Amiina. ²⁶ Katonda kyeyaviire abawaayo eri okukwatibwa okw'ensoni: kubanga abakali baabwe baawaanyisa ekikolwa kyabwe eky'obuzaaliranwa ne bakifuula ekitali kyo buzaaliranwa: ²⁷ era n'abasaiza batyo, bwe baaleka ebikolwa eky'omukali eky'obuzaaliyanwa, ne baikanga mu kwegomba kwabwe bonka na bonka, Abasaiza na'basaiza nga bakolagananga ebitasaana, era nga baweebwanga mu ibo bonka empeera eyo eyasaaniire akwonoona kwabe. ²⁸ Era nga bwe bataikirilya kubba no Katonda mu magezi gaabwe, Katonda yabawaireyo eri omwoyo ogutaikirizibwa, okukolanga ebitasaana; ²⁹ nga baizwire obutabba no butuukirivu bwonabwona, obubbiibi, okwegomba, eitima; nga baizwire eiyali, obwiti, okutongana, obukuusa, enge; abageya, ³⁰ abalyolyoma, abakyawa Katonda, ab'ekyeju, ab'amalala, abeenyumirizia, abayiiya ebigambo ebibbiibi, abatawulira bazaire baabwe, ³¹ ababula magezi, abaleka endagaanu, abatatakagana, ababula kusaasira: ³² abamanyire omusango gwa Katonda, nti abakola ebyo basaaniire kufa, tebabikola bukoli, era naye basiima ababikola.