1
Oluvanyuma lw'ebyo ne nembona era, bona, olwigi olwigwirwewo mu igulu, n'eiddoboozi lye nnasookere okuwulira, ng'ery'akagombe, nga litumula nanze, ng'atumula nti niina okutuuka wano, nzena naakulaga ebigwanira okubbawo oluvannyuma lw'ebyo.
2
Amangu ago Nabbaire mu Mwoyo: era, bona entebe ey'obwakabaka yabbaire ng'eteekeibwewo mu igulu, era nga waliwo eyabbaire atyaime ku ntebe;
3
naye eyabbaire atyaime yabbaire afaanana nga eibbaale erya yasepi n'erya sadio okuboneka: era nga waliwo ne musoke okwetooloola entebe eyabbaire afaanana nga zumaliidi okuboneka.
4
Entebe ey'obwakabaka yabbaire yeetooloirwe entebe ejo'bwakabaka abiri na ina ne ku ntebe kwabbaireku abakaire abiri na bana nga batyaime, nga bavaaire engoye enjeru; ni ku mitwe jabwe engule eja zaabu.
5
Ne ku ntebe nga kuvaaku okumyansia n'amadoboozi n'okubwatuuka. N'etabaaza omusanvu egy'omusio nga jaaka mu maiso g'entebe, nijo emyoyo omusanvu eja Katonda;
6
ne mu maiso g'entebe ng'enyanza ey'endabirwamu, efaanana nga kulusitalo; ne wakati w'entebe n'okwetooloola entebe ebiramu bina ebizwire amaiso mu byeni n'enyuma.
7
N'ekiramu eky'oluberyeberye kyabbaire kifaanana ng'empologoma, n'ekiramu eky'okubiri, ng'enyana, n'ekiramu eky'okusatu kyabbaire na amaiso ng'ag'omuntu, n'ekiramu eky'okuna kyabbaire kifaanana ng'empungu ebuuka.
8
N'ebiramu ebina, nga birina buli kimu ebiwaawa mukaaga, bizwire amaiso enjuyi jonajona ne ne mukati: so bibulaku kuwumula emisana n'obwire nga bitumula nti Omutukuvu, Omutukuvu, Omutukuvu, Mukama Katonda Omuyinza w'ebintu byonabyona, eyabbairewo era abbaawo era aiza okubbaawo
9
Era ebiramu bwe birimuwa ekitiibwa n'eitendo n'okwebalya oyo atyaime ku ntebe, omulamu emirembe n'emirembe,
10
abakaire
abiri na bana balifukamira mu maaso g'oyo atyaime ku ntebe, era balisinzia oyo omulamu emirembe n'emirembe, era balisuula engule jabwe mu maiso g'entebe, nga batumula nti
11
Osaaniire iwe, Mukama waisu, Katonda waisu, okuweebwanga ekitiibwa n'eitendo n'obuyinza: kubanga iwe wabitondere byonabyona, era byabbairewo lwo kusiima kwo, era byatondeibwe