¹ Pawulo, omusibe wa Kristo Yesu ne Timoseewo ow'oluganda, eri Firemooni omutakibwa era omukozi waisu, ² ne Apofiya ow'oluganda ne Alukipo mulwani munaisu, n'ekanisa eri mu nyumba yo: ³ ekisa n'emirembe ebiva eri Katonda Itawaisu ne Mukama waisu Yesu Kristo bibbenga gye muli. ⁴ Neebalya Katonda wange enaku gyonagyona, nga nkutumulaku mu kusaba kwange, ⁵ bwe nawuliire okutaka kwo n'okwikirirya kw'olina eri Mukama waisu Yesu n'eri abatukuvu bonabona; ⁶ okwikirirya ekimu okw'okwikirirya kwo Kaisi kukolenga omulimu, mu kutegeerera kimu buli kigambo ekisa ekiri mu imwe, olwa Kristo. ⁷ Kubanga najaguzire inu ne nsanyuka olw'okutaka kwo, kubanga emyoyo gy'abatukuvu wagiwumwirye, ow'oluganda. ⁸ Kale, waire nga nina obuvumu bwonabwona mu Kristo okukulagira ekisaana, ⁹ naye olw'okutaka nkwegayirira bwegayiriri, kuba nfaanana nga bwe ndi, Pawulo omukaire, era atyanu omusibe wa Kristo Yesu: ¹⁰ nkwegayirira olw'omwana wange, gwe nazaalire mu busibe bwange, Onnessimo, ¹¹ ateyakugasanga eira, naye atyanu atugasa iwe nanze: ¹² gwe ngirya gy'oli omwene, iye niigwo mwoyo gwange: ¹³ nze gwe mbaire ntaka okubba naye gye ndi, kaisi ampeereryenga mu kifo kyo mu busibe bw'enjiri: ¹⁴ naye tinatakire kukola kigambo nga toteeserye, kusa ibwo buleke okubba mu kuwalirizibwa, wabula mu kutaka. ¹⁵ Kubanga kweizi kyeyaviire nayawukana naiwe ekiseera, kaisi obbenga naye emirembe n'emirembe; ¹⁶ nga takaali mwidu kabite, naye okusinga omwidu, ow'oluganda omutakibwa, okusinga einu gye ndi, naye okusingira kimu eri iwe mu mubiri era ne mu Mukama waisu. ¹⁷ Kale oba ng'ondowooza nze okubba mwinawo, musemberye oyo nga nze. ¹⁸ Naye oba nga yakwonoonere oba abanjibwa, mbalira nze ekyo; ¹⁹ nze Pawulo mpandiikire n'omukono gwange, nze ndisasula: ndeke okukukoba nga nkubanja era weena wenka kabite. ²⁰ Kale, ow'oluganda, onsanyusie mu Mukama waisu: owumulye omwoyo gwange mu Kristo. ²¹ Nkuwandikiire nga neesiga obugonvu bwo, nga maite ng'olikola era okusinga bye ntumula. ²² Naye era ate onongoosererye aw'okugona: kubanga nsuubira olw'okusaba kwanyu muliweebwa okumbona. ²³ Epafula musibe munange mu Kristo Yesu, akusugiirye; ²⁴ ne Mako, Alisutaluuko, Dema, Luka, bakozi banange. ²⁵ Ekisa kya Mukama waisu Yesu Kristo kibbenga n'omwoyo gwanyu. Amiina.