¹ Awo bwe yafulumire mu yeekaalu, omumu ku bayigirizwa be n'amukoba nti Omwegeresya, bona, amabbaale gano bwe gali, n'enzimba eno bw'eri. ² Yesu n'amukoba nti Obona enzimba eno enene? teririrekebwa wano eibbaale eriri ku ibbaale eritalisuulibwa wansi. ³ Bwe yabbaire atyaime ku lusozi olwa Zeyituuni ng'ayolekeire yeekaalu, Peetero no Yakobo n Yokaana no Andereya ne bamubuulya mu kyama nti ⁴ Tukobere, ebyo biribbaawo di? n'akabonero ki ak'ebyo nga byaaba okutuukirizibwa byonabyona? ⁵ Yesu n'asooka okubakoba nti Mwekuume, omuntu yenayena tabagotyanga. ⁶ Bangi abaliiza mu liina lyange nga batumula nti Niinze oyo; era baligotya bangi. ⁷ Awo bwe muwuliranga entalo n'eitutumu ly'entalo; temweraliikiriranga: kibigwanira okubaawo; naye enkomerero ng'ekaali. ⁸ Kubanga eigwanga lirirumba eigwanga liinaye, n'obwakabaka obw'akabaka bwinaabwe: walibbaawo ebikankanu mu bifo bingi; walibaawo enjala: ebyo niilwo luberyeberye lw'okulumwa. ⁹ Naye mwekuume mwenka: kubanga balibawaayo mu nkiiko: mulikubbirwa no mu makuŋaaniro; era mulyemerera mu maiso g'abaamasaza na bakabaka ku lwange, okubba abajulizi mu ibo. ¹⁰ Enjiri kigigwanira okumala okubuulirwa amawanga gonagona. ¹¹ Era bwe babatwalanga okubawaayo, temusookanga kweraliikirira bwe mwatumula: naye kyonakyona kye muweebwanga mu kiseera ekyo, ekyo kye mutumulanga, kubanga ti niimwe mutumula, wabula Omwoyo Omutukuvu. ¹² Ow'oluganda yawangayo mugande okumwita, ni itaaye w'omwana yamuwangayo; abaana bajeemeranga ababazaire, babaitisyanga. ¹³ Mwakyayibwanga bonabona olw'eriina lyange: naye agumiinkiriza okutuusia enkomerero oyo niiye alirokoka. ¹⁴ Naye bwe mulibona eky'omuzizo ekizikiririzia nabbi Danyeri kye yatumwireku nga kyemereire awatakisaanira (asomamu ategeere), kale abali mu Buyudaaya bairukire ku nsozi; ¹⁵ ali waigulu ku nyumba taikanga, so tayingiranga kutoolamu kintu mu nyumba ye: ¹⁶ n'ali mu lusuku tairanga kutwala lugoye lwe. ¹⁷ Naye giribasanga abali ebida; n'abayokya mu naku egyo. ¹⁸ Musabe bireke okutuukira mu biseera eby'empewo. ¹⁹ Kubanga enaku egyo giribba gyo kuboneramu naku, nga tegibbangawo giti kasookede Katonda atonda ebyatondeibwe okutuusia atyanu, so tegiribba. ²⁰ So singa Mukama teyasalire ku naku egyo, tewandirokokere mubiri gwonagwona: naye olw'abalonde be yalondere yagisalireku enaku. ²¹ Mu biseera ebyo omuntu bw'abakobanga nti Bona, Kristo ali waano; oba ali eyo; temwikiriryanga: ²² kubanga bakristo ab'obubbeyi na banabbi ab'obubbeyi baliyimuka, balikola obubonero n'ebyewuunyo, okugotya, oba nga kisoboka abalonde. ²³ Naye mwekuume imwe: bona, mbakobeire byonabyona nga bikaali kubbaawo. ²⁴ Naye mu nnaku egyo, okubona enaku okwo nga kuweire, eisana lirizikizibwa n'omwezi tegulyaka musana gwagwo, ²⁵ n'emunyenye giribba nga gigwa okuva mu igulu, n'amaani ag'omu igulu galitengera. ²⁶ Kale kaisi ne babona Omwana w'omuntu ng'aizira mu bireri n'amaani amangi n'ekitiibwa. ²⁷ Awo kaisi n'atuma bamalayika be, alikuŋaanya abalonde be okuva mu mpewo eina okuva ku nkomerero y'ensi okutuusia ku nkomerero y'eigulu. ²⁸ Era mwegere ku mutiini olugero lwagwo: eitabi lyagwo bwe ligeiza n'ebikoola ne bitojera mutegeera ng'omwaka guli kumpi ²⁹ era mweena mutyo, bwe mwabonanga ebyo nga bituukire; mutegeere ng'ali kumpi, ku lwigi. ³⁰ Mazima mbakoba nti Emirembe gino tegiriwaawo n'akatono okutuusia ebyo byonabyona lwe birituukirira. ³¹ Eigulu n'ensi biriwaawo, naye ebigambo byange tebiriwaawo n'akatono. ³² Naye eby'olunaku olwo oba ekiseera ekyo wabula amaite, newaire bamalayika abali mu igulu, waire Omwana, wabula Iitawange. ³³ Mwekuumenga, mumogenga, musabenga: kubanga temumaite biseera we birituukira. ³⁴ Ng'omuntu eyalekere enyumba ye n'atambula mu nsi egendi ng'awaire abaidu be obuyinza, buli muntu omulimu gwe n'alagira omwigali okumoga. ³⁵ Kale mumoge: kubanga temumaite mukama w'enyumba w'aliizira, oba lweigulo, oba itumbi, oba ng'enkoko ekolyooka, oba makeeri; ³⁶ atera okwiza mangu ago n'abasanga nga mugonere. ³⁷ Era kye mbakoba imwe mbakoba bonabona nti Mumoge.