¹ Okusooka kw'enjiri ya Yesu Kristo, Omwana wa Katonda. ² Nga bwe kyawandiikiibwe mu nabbi Isaaya nti Bona, nze ntuma omubaka wange mu maiso go, Alirongoosia oluguudo lwo; ³ Eidoboozi lye atumulira waigulu mu idungu nti Mulongoosie oluguudo lwa Mukama, Muluŋamye amangira ge; ⁴ Yokaana yaizire eyabatizire mu idungu n'abuulira okubatizibwa okw'okwenenya olw'okutoolebwaku ebibbiibi. ⁵ N'ensi yonayona ey'e Buyudaaya n'ab'e Yerusaalemi bonabona ne bavaayo ne baiza gy'ali ne babatizibwa iye mu mwiga Yoludaani nga baatula ebibbiibi byabwe. ⁶ No Yokaana yavaalanga byoya bya ŋamiya, n'olukoba lw'ekiwu mu nkende ye, ng'alya enzige n'omujenene gw'enjuki egy'omu nsiko. ⁷ N'abuulira ng'akoba nti Aiza enyuma wange niiye ansinga amaani, so tinsaanira kukutama kutagulula lukoba lwe ngaito gye. ⁸ Nze nababatizire n'amaizi, naye oyo alibabatiza n'Omwoyo Omutukuvu. ⁹ Awo olwatuukire mu naku egyo Yesu n'ava e Nazaaleesi eky'e Galiraaya n'aiza okubatizibwa Yokaana mu Yoludaani. ¹⁰ Amangu ago bwe yaviire mu maizi, n'abona eigulu nga likanukire, n'Omwoyo ng'ali ng'eiyemba ng'aika ku iye: ¹¹ n'eidoboozi ne lifuluma mu igulu erikoba nti Niiwe Mwana wange gwe ntaka, gwe nsanyukira einu. ¹² Amangu ago Omwoyo n'amubbingira mu idungu. ¹³ N'amalayo mu idungu enaku ana ng'akemebwa Setaani; n'abba wamu n'ensolo; bamalayika ne bamuweereza. ¹⁴ Awo oluvanyuma Yokaana ng'amalire okuweebwayo, Yesu n'aiza e Galiraaya, ng'abuulira enjiri ya Katonda, ¹⁵ ng'akoba nti Ekiseera kituukire, obwakabaka bwa Katonda busembeire, mwenenye, mwikirirye enjiri. ¹⁶ Bwe yabbaire ng'abita ku lubalama lw'enyanza ey'e Galiraaya n'abona Simooni no Andereya mugande wa Simooni nga basuula obutiimba mu nyanza, kubanga babbaire bavubi. ¹⁷ Yesu n'akoba nti Mwize mubite nanze, ndibafuula abavubi b'abantu. ¹⁸ Amangu ago ne baleka awo obutiimba ne baaba naye. ¹⁹ Bwe yasembeireyo mu maso katono, n'albona Yakobo omwana wa Zebbedaayo n Yokaana mugande, abo bombiri babbaire mu lyato nga bayunga obutiimba. ²⁰ Amangu ago n'abeeta: ne baleka awo itawabwe Zebbedaayo mu lyato ng'ali n'abo abakoleire empeera, ne bamusengererya. ²¹ Ne bayingira e Kaperunawumu; amangu ago ku lunaku lwa sabbiiti n'ayingira mu ikuŋaaniro n'ayegeresya. ²² Ne bawuniikirira olw'okwegeresya kwe: kubanga yabegereserye nga niiye mwene buyinza, so ti ng'abawandiiki. ²³ Amangu ago mu ikuŋaaniro lyabwe mwabbairemu omuntu aliku dayimooni omubbiibi; n'akunga ²⁴ ng'akoba nti Otuvunaana ki, Yesu ow'e Nazaaleesi? oizire kutuzikirizia? nkumaite iwe, oli Mutukuvu wa Katonda. ²⁵ Yesu n'amubogolera ng'akoba nti Sirika, muveeku. ²⁶ Dayimooni n'amutaagula n'akunga eidoboozi inene n'amuvaaku. ²⁷ Ne beewuunya bonabona, ne beebuulyagana nga bakoba nti kiki kino? okwegeresya kuyaaka! alagira n'obuyinza dayimooni ne bamuwulira. ²⁸ Amangu ago eitutumu lye ne libuna ensi yonayona eriraine Galiraaya. ²⁹ Amangu ago bwe baafulumire mu ikuŋŋaaniro ne baaba wamu no Yakobo no Yokaana mu nyumba ya Simooni ne Andereya. ³⁰ Awo maaye wamuka Simooni yabbaire ng'agalamiire ng'alwaire omusujja; amangu ago ne bamukobera bw'ali: ³¹ n'aiza n'amukwata ku mukono n'amugolokosia, omusuja ne gumuwonaku, n'abaweereza. ³² Awo olweigulo, eisana nga ligwire, ne bamuleetera abalwaire bonabona, n'abo abaliku dayimooni. ³³ N'ekibuga kyonakyona ne kikuŋaanira ku wankaaki. ³⁴ N'awonya bangi ababbaire balwaire endwaire nyingi, n'abbinga dayimooni bangi n'atabaganya kutumula kubanga baamumanyire. ³⁵ Awo amakeeri einu, nga bukaali bwire, n'agolokoka n'afuluma n'ayaba mu idungu, n'asabira eyo. ³⁶ Simooni n'abo ababbaire naye ne bamusengererya; ³⁷ ne bamubona ne bamukoba nti Bonabona bakusaagira. ³⁸ N'abakoba nti Twabe awandi mu bibuga ebiri okumpi mbuulire n'eyo; kubanga ekyo nookyo naiziriire. ³⁹ N'ayingira mu makuŋaaniro gaabwe mu Ggaliraaya yonayona, ng'abuulira ng'abbinga dayimooni. ⁴⁰ Omugenge n'aiza gy'ali, ng'amwegayirira ng'amufukaamirira ng'amukoba nti Bw'otaka, oyinza okunongoosia. ⁴¹ N'amusaasira n'agolola omukono gwe n'amukwataku n'amukoba nti Ntaka; longooka. ⁴² Amangu ago ebigenge bye ne bimuwonaku n'alongooka. ⁴³ N'amukuutira inu amangu ago n'amusindika ⁴⁴ n'amukoba nti bona tokoberaku muntu; naye yaba weerage eri kabona, oweeyo olw'okulongooka kwo Musa bye yalagiire okubba omujulirwa gye bali. ⁴⁵ Yeena n'afuluma, n'asooka okukibuulira einu n'okubunya ekigambo, n'okuyinza n'atasobola Yesu okwegeresya ate mu kibuga mu lwatu, naye yabbaire wanza mu malungu; ne baiza gy'ali nga bava wonawona.