¹ N'asaabala, n'awunguka, n'atuuka mu kibuga ky'ewaabwe. ² Awo ne bamuleetera omulwaire akoozimbire, ng'agalamiziibwe ku kitanda: naye Yesu bwe yaboine okwikirirya kwabwe, n'akoba oyo akoozimbire nti Mwana wange, guma omwoyo, ebibbiibi byo bikutoleibweku. ³ Kale, bona, abawandiiki abandi ne batumula mu myoyo nti Ono avoola Katonda. ⁴ Naye Yesu bwe yamanyire ebirowoozo byabwe, n'akoba nti Kiki ekibalowoozesya obubbiibi mu myoyo gyanyu? ⁵ Kubanga ekyangu kiriwaina okukoba nti Ebibbiibi byo bikutooleibweku, oba okukoba nti Golokoka otambule? ⁶ Naye mutegeere ng'Omwana w'omuntu alina obuyinza ku nsi okutoolaku ebibbiibi n'akoba oyo akoozimbire nti Yemerera, ositule ekitanda kyo, oireyo mu nyumba yo. ⁷ N'agolokoka, n'ayaba ewuwe. ⁸ Naye ebibiina bwe byaboine ne bitya, ne bigulumizia Katonda, eyawaire abantu obuyinza obwenkaniire awo. ⁹ Yesu bwe yaviireyo n'abona omuntu, ayetebwa Matayo, ng'atyaime mu igwooleryo: n'amukoba nti Bita nanze. N'agolokoka, n'abita naye. ¹⁰ Awo olwatuukire bwe yabbaire ng'atyaime mu nyumba ng'alya, bona, ne waiza abawooza bangi, n'abantu ababbiibi bangi, ne batyama wamu no Yesu n'abayigirizwa be. ¹¹ Abafalisaayo bwe baboine, ne bakoba abayigirizwa be nti Omwegeresya wanyu kiki ekimuliisia n'abawooza n'abantu ababbiibi? ¹² Naye bwe yawuliire, n'akoba nti Abalamu tebeetaaga musawo, wabula abalwaire. ¹³ Naye mwabe mwege amakulu g'ekigambo kino nti Ntaka kisa, so ti sadaaka kubanga tinaizire kweta batuukirivu, wabula abantu ababbiibi. ¹⁴ Kaisi ne waiza w'ali abayigirizwa ba Yokaana ne bakoba nti Kiki ekitusiibya ife n'Abafalisaayo emirundi emingi, naye abayigirizwa bo tebasiiba? ¹⁵ Yesu n'abakoba nti Abaana ab'omu mbaga ey'obugole bayinza batya okunakuwala akweire omugole ng'akaali nabo? naye enaku gyaba okwiza akweire omugole lw'alibatoolebwaku, kaisi ne basiiba. ¹⁶ Wabula muntu atunga kiwero ekiyaka mu kivaalo ekikaire; kubanga ekyo ekitungibwamu kikanula ekivaalo, n'ekituli kyeyongera okugaziwa. ¹⁷ So tebafukire mwenge musu mu nsawo gya mawu enkaire; kubanga bwe bakolere batyo, ensawo egy'amawu gikanuka, n'omwenge guyiika, n'ensawo egy'amawu gifaafaagana: naye bafuka omwenge omusu mu nsawo egy'amawu enjaaka, byombiri birama. ¹⁸ Bwe yabbaire ng'akaali akoba ebigambo ebyo, ne waiza omwami omumu, n'amusinza n'agakoba nti Omuwala wange atyanu afiire: naye iza omuteekeku omukono, yalamuka. ¹⁹ Yesu n'agolokoka n'amusengererya, n'abayigirizwa be. ²⁰ Awo omukali eyabbaire alwaliire ekikulukuto ky'omusaayi emyaka ikumi n'eibiri, n'aiza enyuma we, n'akoma ku lukugiro lw'ekivaalo kye: ²¹ kubanga yatumwire mu mwoyo gwe nti Bwe nakwata obukwati ku kivaalo kye naawona. ²² Naye Yesu bwe yakyukire n'amubona, n'akoba nti Mwana wange, guma omwoyo; okukwikirirya kwo kukuwonyerye. Omukali n'awona okuva mu kiseera ekyo. ²³ Yesu bwe yatuukire mu nyumba y'omwami oyo, n'abona abafuuwa endere, n'ekibiina nga bakubba ebiwoobe, ²⁴ n'akoba nti Muveewo: kubanga omuwala tafiire, agonere bugoni. Ne bamusekerera inu. ²⁵ Naye ekibiina bwe kyamalire okubbingibwawo, n'ayingira, n'amukwata ku mukono; omuwala n'agolokoka. ²⁶ Ebigambo ebyo ne bibuna mu nsi edi yonayona. ²⁷ Naye Yesu bwe yaviireyo, abazibe b'amaiso babiri ne bamusengererya, nga batumulira waigulu nga bakoba nti Tusaasire, igwe omwana wa Dawudi. ²⁸ Bwe yatuukire mu nyumba, abazibe b'amaiso ne baiza gy'ali: Yesu n'abakoba nti Mwikirirya nga nsobola okukola kino? ne bamukoba nti Niiwo awo, Mukama waisu. ²⁹ Kaisi n'akwata ku maiso gaabwe ng'akoba nti Nga bwe mwikiriirye kibbe gye muli kityo. ³⁰ Amaiso gaabwe ne gazibuka. Yesu n'abakuutira ng'akoba nti Mubone tewabba muntu amanya. ³¹ Naye ne bafuluma, ne babunya ebigambo bye mu nsi edi yonayona. ³² Awo bwe baabbaire bafuluma ne bamuleetera kasiru, ng'aliku dayimooni. ³³ N'abbinga dayimooni, kasiru n'atumula; ebibiina ne byewuunya, ne bikoba nti Eira n'eira tewabonekanga kiti mu Isiraeri. ³⁴ Naye Abafalisaayo ne bakoba nti Abbinga dayimooni ku bwa mukulu wa dayimooni. ³⁵ Yesu n'abitabita mu bibuga byonabyona, n'embuga gyonana, ng'ayegeresya mu makuŋaaniro gaabwe, ng'abuulira enjiri ey'obwakabaka, ng'awonya endwaire gyonagyona n'obunafu bwonabwona. ³⁶ Bwe yaboine ebibiina, n'abisaasira, kubanga babbaire bakoowere inu nga basaansanire, ng'etaama egibula musumba. ³⁷ Kaisi n'akoba abayigirizwa be nti Eby'okukungula niibyo ebingi, naye abakozi niibo abatono. ³⁸ Kale musabe Omwami w'eby'okukungula, asindike abakozi mu by'okukungula bye.