¹ Bwe yaviire ku lusozi, ebibiina bingi ne bimusengererya. ² Kale, bona, omugenge n'amusemberyerya n'amusinza, n'akoba nti Mukama wange, bw'otakala, oyinza okunongoosa. ³ N'agolola omukono, n'amukwataku, ng'akoba nti Ntaka; longooka. Amangu ago ebigenge bye ne birongooka. ⁴ Yesu n'amukoba nti Bona tokoberaku muntu; naye irayo weerage eri kabona, omutwalire ekitone Musa kye yalagiire, kibbe omujulizi gye bali. ⁵ Bwe yayingiire mu Kaperunawumu, omwami w'ekitongole Omurooma n'aiza gy'ali, n'amwegayirira, ⁶ ng'akoba nti Mukama wange, mulenzi wange agalamiire mu nyumba akoozimbire, abonaabona kitalo. ⁷ N'amukoba nti Naiza ne muwonya. ⁸ Omwami w'ekitongole Omurooma n'airamu n'akoba nti Mukama wange, tinsaanira iwe okuyingira wansi w'akasulya kange: naye tumula kigambo bugambo, mulenzi wange yawona. ⁹ Kubanga nzeena ndi muntu mutwalibwa, nga nina baserikale be ntwala: bwe nkomba oyo nti Yaba, ayaba: n'ogondi nti Iza, aiza; n'omwidu wange nti Kola oti, bw'akola. ¹⁰ Naye Yesu bwe yawuliire, ne yeewuunya, n'akoba ababitire naye nti Dala mbakoba nti Nkaali kubona kwikirirya kunene nga kuno, waire mu Isiraeri. ¹¹ Nzeena mbakoba nti Bangi abaliva ebuvaisana n'ebugwaisana, abalityama awamu no Ibulayimu, no Isaaka no Yakobo, mu bwakabaka obw'omu igulu: ¹² naye abaana b'obwakabaka balibbingirwa mu ndikirirya eyewanza: niiyo eribba okukunga n’okuluma ensaya. ¹³ Yesu n'akoba omwami w'ekitongole Omurooma nti Kale yaba; nga bw'oikiriirye, kibbe gy'oli kityo. Omulenzi n'awonera mu kiseera ekyo. ¹⁴ Yesu bwe yayingiire mu nyumba ya Peetero, n'abona maye wa mukali we ng'agalamiire alwaire omusuja. ¹⁵ N'amukwata ku mukono, omusuja ne gumuwonaku; n'agolokoka, n'amuweereza. ¹⁶ Obwire bwabbaire buwungeire; ne bamuleetera bangi abakwatiibwe dayimooni: n'abbinga dayimooni n'ekigambo n'awonya bonabona ababbaire balwaire: ¹⁷ ekigambo kituukirire ekyatumwirwe nabbi Isaaya, ng'akoba nti Iye mwene yatwaire obunafu bwaisu, ne yeetika endwaire gyaisu. ¹⁸ Awo Yesu bwe yaboine ebibiina bingi nga bimwetooloire, n'alagira nti Tuwunguke twabe emitala w'edi. ¹⁹ Omuwandiiki omumi n'aiza; n'amukoba nti Omwegeresya, nabitanga naiwe buli gy'ewaybanga yonayona. ²⁰ Yesu n'amukoba nti Ebibbe birina obwina, n'enyonyi egy'omu ibbanga girina ebisu; naye Omwana w'omuntu abula w'ateeka mutwe gwe. ²¹ Omuyigirizwa we ogondi n'amukoba nti Mukama wange, sooka ondeke njabe nziike Itawange. ²² Naye Yesu n'amukoba nti Bita nanze; leka abafu baziike abafu babwe. ²³ N'asaabala, abayigirizwa ne babaaba naye. ²⁴ Omuyaga mungi ne gwiza mu nyanza, amayengo ne gayiika mu lyato: naye yabbaire agonere. ²⁵ Ne baiza gy'ali ne bamuzuukya, nga bakoba nti, Mukama waisu, tulokole; tufa. ²⁶ N'abakoba nti Kiki ekibatiisia, abalina okwikirirya okutono? Kaisi agolokoka, n'akoma ku mpewo n'enyanza; n'eteeka inu. ²⁷ Abantu ne beewuunya, nga bakoba nti Muntu ki ono, empewo n'enyanza okumuwulira? ²⁸ Naye bwe yatuukire emitala w'edi mu nsi y'Abagadaleni, ne bamusisinkana abantu babiri ababbaireku dayimooni, nga bava mu ntaana, bakambwe inu, nga wanula na muntu ayinza okubita mu ngira eyo. ²⁹ Bona, ne batumulira waigulu ne bakoba nti otuvunaana ki, Omwana wa Katonda? oizire wano kutubonyaabonya ng'entuuko gyaisu gikaali kutuuka? ³⁰ Wabbairewo walaku ne we babbaire ekisibo ky'embizi nyingi nga girya. ³¹ Dayimooni ne gimwegayirira ne gikoba nti Bw'ewatubbinga, tusindike mu kisibo ky'embizi. ³² N'agikoba nti Mwabe. Ne gibavaaku, ne gyaba mu mbizi : kale, bona, ekisibo kyonakyona ne kifubutuka ne kiserengetera ku ibbangaibanga mu nyanza, ne gifiira mu maizi. ³³ N'ababbaire bagirunda ne bairuka, ne baaba mu kibuga, ne babakobera byonabyona n'ebigambo by'ababbaireku dayimooni. ³⁴ Bona, ekyalo kyonakyona ne kiiza okusisinkana Yesu: bwe baamuboine, ne bamwegayirira okuva mu nsalo gyabwe.