¹ Ku lunaku olwo Yesu n'afuluma mu nyumba, n'atyama ku mbali kw'enyanza. ² Ebibiina bingi ne bimukuŋaaniraku, n'okusaabala n'asaabala mu lyato, n'atyama; ekibiina kyonakyona ne kyemerera ku itale. ³ N'atumulira naibo bingi mu ngero, ng'akoba nti Bona, omusigi yafulumire okusiga; ⁴ bwe yabbaire ng'asiga, ensigo egindi ne gigwa ku mbali kw'engira, enyonyi ne giiza ne jigirya: ⁵ egindi ne gigwa awali enjazi, awabula itakali lingi amangu ago ne gimera, kubanga tegyabbaire n'eitakali iwanvu: ⁶ eisana bwe lyaviireyo, ne giwotookerera kubbanga tegyabbaire n'emizi, ne gikala. ⁷ Egindi ne gigwa ku mawa; amawa ne gamera, ne gagizikya: ⁸ egindi ne gigwa ku itakali eisa, ne gibala emere, egindi kikumi, egindi nkaaga, egindi asatu ⁹ Alina amatu, awulire. ¹⁰ Abayigirizwa ne baiza ne bamukoba nti Kiki ekikutumulya nabo mu ngero? ¹¹ N'airamu n'abakoba nti Imwe muweweibwe okumanya ebigambo eby'ekyama eby'obwakabaka obw'omu igulu naye ibo tebaweweibwe. ¹² Kubanga buli alina, aliweebwa, era alisukirirawo: naye buli abula alitoolebwaku ne ky'ali nakyo. ¹³ Kyenva ntumula nabo mu ngero kubanga bwe babona tebabona, bwe bawulira, tebawulira, so tebategeera. ¹⁴ Naye Isaaya bye yalagwire bibatuukiririire, ebyatumwirwe nti Muliwulira buwulili, naye temulitegeera; Mulibona buboni, naye temulyetegerezia: ¹⁵ Kuba omwoyo gw'abantu bano gusavuwaire, N'amatu gaabwe gawulira kubbiibi, N'amaiso gaabwe bagazibire; Baleke okubona n'amaiso, n'okuwulira n'amatu, N'okutegeera n'omwoyo, N'okukyuka, Ne mbawonya. ¹⁶ Naye amaiso ganyu galina omukisa, kubanga gabona; n'amatu ganyu, kubanga gawulira. ¹⁷ Kubanga mazima mbakoba nti Banabbi bangi n'abantu abatuukirivu abegombanga okulana bye mulingirira, so tebabiboine; n'okuwulira bye muwulira, so tebabiwuliire. ¹⁸ Kale imwe muwulire olugero lw'omusigi. ¹⁹ Buli awulira ekigambo eky'obwakabaka, nga takitegeire, omubbiibi oyo aiza, n'akwakula ekisigiibwe mu mwoyo gwe. Oyo niiye yasigiibwe ku mbali kw'engira. ²⁰ N’oyo eyasigiibwe awali enjazi, niiye oyo awulira kigambo, amangu ago n'aikirirya n'eisanyu; ²¹ naye abula mizi mukati mu iye, naye, alwawo katono; bwe wabbaawo enaku n’okuyigganyizibwa olw'ekigambo, amangu ago yeesitala. ²² N'oyo eyasigiibwe mu mawa, niiye oyo awulira ekigambo; naye okweraliikirira kw'ensi, n'obubbeyi bw'obugaiga bizikya ekigambo, era tabala. ²³ N'oyo eyasigiibwe ku itakali eisa, niiye oyo awulira ekigambo, n'akitegeera; oyo dala abala dala ebibala, ogondi aleeta kikumi, ogondi nkaaga, ogondi asatu. ²⁴ Awo n'abaleetera olugero olundi n'atumula nti Obwakabaka obw'omu igulu bufanaanyizibwa n'omuntu eyasigire ensigo ensa mu nimiro ye: ²⁵ naye abantu bwe babbaire bagonere omulabe we n'aiza n'asigamu eŋaanu ey'omu nsiko mu ŋaanu ensa, n'ayaba. ²⁶ Naye bwe yamerukire, bwe yayanyire, n'eboneka n'eŋaanu ey'omu nsiko. ²⁷ Abaidu be ne baiza ne bakoba omwami nti Sebo, tewasigire nsigo ensa mu nimiro yo? kale yabbaire etya okubaamu eŋaanu ey'omu nsiko? ²⁸ N'abakoba nti Omulabe niiye yakolere atyo. Abaidu ne bamukoba nti Kale otaka twabe tugizubemu? ²⁹ Yeena n'abakoba nti Bbe; mkoizi bwe mwabba muzubamu eŋaano ey'omu nsiko, mwatokeramu n'eŋaano yeene. ³⁰ Muleke bikule byombiri bituukye amakungula: mu biseera eby'amakungula ndibakoba abakunguli nti Musooke mukuŋaanye eŋaanu ey'omu nsiko, mugisibe emiganda eyokyebwe: naye eŋaano yeene mugikuŋaanyirye mu kideero kyange. ³¹ N'abaleetera olugero olundi, ng'akoba nti Obwakabaka obw'omu igulu bufaanana n'akaweke ka kalidaali, omuntu ke yakwaite, n'akasiga mu nimiro ye: ³² koona nga niiko katono okusinga ensigo gyonagyona; naye bwe kaakulire, ne kabba kanene okusinga omwido gwonagwona, ne kaba omusaale, n'enyonyi egy'omu ibbanga nga giiza, nga gibba ku mbali gaagwo. ³³ N'abagerera olugero olundi nti Obwakabaka obw'omu igulu bufaanana n'ekizimbulukusia, omukazi kye yakwaite, n'akiteeka mu bwibo busatu obw'obwita, n'okuzimbulukuka ne buzimbulukuka bwonabwona. ³⁴ Ebigambo ebyo byonabyona Yesu yabikobeire ebibiina mu ngero; naye awabula lugero teyabakobere kigambo: ³⁵ kituukirire ekyatumwirwe mu nabbi, ng'akoba nti Ndyasamya omunwa gwange mu ngero; Ndireeta ebigambo ebyagisiibwe okuva ku kutondebwa kw'ensi. ³⁶ Awo n'asebula ebibiina, n'ayingira mu nyumba: abayigirizwa be ne baiza w'ali, ne bakoba nti Tutegeeze olugero olw'eŋaanu ey'omu nsiko eyabbaire mu nimiro. ³⁷ N'airamu n'akoba nti Asiga ensigo ensa niiye Mwana w'omuntu; ³⁸ enimiro niiye nsi; ensigo ensa, abo niibo baana b'obwakabaka; n'eŋaanu ey'omu nsiko niibo baana b'omubbiibi; ³⁹ omulabe eyagisigire niiye Setaani: amakungula niiyo enkomerero y'ensi; n'abakunguli niibo bamalayika. ⁴⁰ Kale ng'eŋaanu ey'omu nsiko bw'ekuŋaanyizibwa n'eyokebwa mu musyo; kityo bwe kiribba ku nkomerero y'ensi. ⁴¹ Omwana w'omuntu alituma bamalayika be, boona balitoolamu mu bwakabaka bwe ebintu byonabyona ebyesitazia, n'abo abakola okubbiibi, ⁴² balibasuula mu kikoomi eky'omusyo: niimwo mulibba okukunga amaliga n'okuluma onsaya. ⁴³ Kale abantu abatuukirivu balimasamasa ng'eisana mu bwakabaka bwa Itaaye. Alina amatu, awulire. ⁴⁴ Obwakabaka obw'omu igulu bufaanana n'eky'obugaiga ekyagisibwe mu lusuku; omuntu n'akibona, n'akigisa; n'olw'eisanyu lye n'ayaba n'atunda by'ali nabyo byonabyona, n'agula olusuku olwo. ⁴⁵ Ate, obwakabaka obw'omu igulu bufaanana omuntu omutundi asagira eruulu ensa: ⁴⁶ bwe yaboine eruulu eimu ey'omuwendo omungi, n'ayaba n'atunda by'ali nabyo byonabyona, n'agigula. ⁴⁷ Ate, obwakabaka obw'omu igulu bufaanana ekirezi, kye baswire mu nyanza, ne kikuŋaanya ebya buli ngeri: ⁴⁸ bwe kyaizwire, ne bakiwalulira ku itale; ne batyama, ne bakuŋaanyirya ebisa mu nkanga, ebibbiibi ne babisuula. ⁴⁹ Kityo bwe kiribba ku nkomerero y'ensi: bamalayika baliiza, balyawulamu abantu ababbiibi mu batuukirivu, ⁵⁰ balibasuula mu kikoomi eky'omusyo: niimwo mulibba okukunga amaliga n'okuluma ensaya. ⁵¹ Mubitegeire ebigambo bino byonabyona? Ne bamukoba nti Niiwo awo. ⁵² N'abakoba nti Buli muwandiiki eyayegereseibwe eby'obwakabaka obw'omu igulu, kyava afaanana n'omuntu alina enyumba ye, atoola mu igisiro lye ebintu ebiyaka n'ebikaire. ⁵³ Awo olwatuukire Yesu bwe yamalire engero gino, n'avaayo. ⁵⁴ Bwe yatuukire mu nsi y'ewaabwe n'abegeresya mu ikuŋaaniro lyabwe, n'okuwuniikirira ne bawuniikirira, ne bakoba nti ono yatoire waina amagezi gano, n'eby'amaani bino? ⁵⁵ Ono ti niiye mwana w'omubaizi? maye ti niiye gwe beeta Malyamu? ne bagande be Yakobo, no Yusufu, no Simooni, no Yuda? ⁵⁶ Na bainyina be bonabona tebali waife? Kale ono yatoire waina ebigambo bino byonabyona? ⁵⁷ Ne bamunyiigira. Naye Yesu n'abakoba nti Nabbi tabulwa kitiibwa, wabula mu nsi y'ewaabwe, no mu nyumba y'ewaabwe. ⁵⁸ So teyakolereyo bya magero bingi olw'obutaikirirya bwabwe.