¹ N'ayeta abayigirizwa be eikumi n'ababiri, n'abawa obuyinza ku dayimooni omubbiibi, okumubbinganga, n'okuwonyanga endwaire gyonagyona n'obunafu bwonabona. ² Abatume abo eikumi n'ababiri, amaina gaabwe niigo gano: eyasookere niiye Simooni, ayetebwa Peetero, no Andereya mugande we; Yakobo omwana wa Zebbedaayo, no Yokaana mugande we; ³ Firipo, no Batolomaayo; Tomasi, no Matayo omuwooza; Yakobo omwana wa Alufaayo, no Sadayo; ⁴ Simooni Omukananaayo, no Yuda Isukalyoti, niiye yamuliiremu olukwe. ⁵ Yesu n'abatuma abo eikumi n'ababiri n'ababuulirira, ng'akoba nti Temwabanga mu mangira g'ab'amawanga, so temuyingiranga mu bibuga by'Abasamaliya; ⁶ naye waakiri mwabe eri entama egyagotere egy'omu nyumba ya Isiraeri. ⁷ Bwe munbanga mutambula mubuulirenga nga mukoba nti Obwakabaka obw'omu igulu bulikumpi okutuuka. ⁸ Muwonyenga abalwaire, muzuukizienga abafu, mulongoosenga abagenge, mubbingenga dayimooni: mwaweweibwe buwi, mweena muwenga buwi. ⁹ Temubbanga ne zaabu, waire efeeza, waire ebikomo mu nkoba gyanyu; ¹⁰ so n'ensawo etambula, waire ekanzo eibiri, waire engaito, waire omwigo: kubanga akola emirimu asaanira okuweebwa emere ye. ¹¹ Naye buli kibuga kye mwayingirangamu, oba mbuga, musagirengamu omuntu bw'ali asaana; mugonenga omwo okutuusya lwe mulivaayo. ¹² Bwe mwayingiranga mu nyumba, mugisugiryenga. ¹³ Enyumba bw'esaananga, emirembe gyanyu gisenga ku iyo: naye bw'etasaananga, emirembe gyanyu giirenga gye muli. ¹⁴ Era omuntu bw'atabasemberyanga waire okuwulira ebigambo byanyu bwe muvanga mu nyumba eyo oba mu kibuga ekyo, mukunkumulanga enfuufu ey'omu bigere byanyu. ¹⁵ Dala mbakoba nti ensi ye Sodoma ne Gomola eribba n'okubonyaabonyezebwa okuligumiinkirizika ku lunaku olw'omusango, okusinga ekibuga ekyo. ¹⁶ Bona, nze mbatuma ng'entama wakati mu misege: kale mubbanga n'amagezi ng'emisota, era mubanga ng'amayemba obutabba no bukuusa. ¹⁷ Naye mwekuumanga abantu: kubanga balibawaayo mu nkiiko, no mu makuŋaaniro gaabwe balibakubbiramu; ¹⁸ era mulitwalibwa eri abaamasaza n'eri bakabaka okubalanga nze, okubba obujulizi eri ibo n'ab'amawanga. ¹⁹ Naye bwe babawangayo, temweraliikiranga nti Twakoba tutya? nti Twatumula ki? kubanga muliweebwa mu kiseera ekyo bye mulitumula. ²⁰ Kubanga ti niimwe mutumula, wabula Omwoyo gwa Itawanyu niiye atumulira mu imwe. ²¹ Ow'oluganda yawangayo mugande we okufa, no itaaye omwana: n’abaana bajemeranga ababazaala, n’okubaitisya. ²² Mwkyayibwanga abantu bonabona okubalanga eriina lyange: naye alinyiikira okutuuka ku nkomerero, niiye alirokoka. ²³ Bwe bababbinganga mu kibuga ekyo, mwirukira mu ky'okubiri: kubanga dala mbakoba nti Temulibunya bibuga bya Isiraeri, okutuusya Omwana w'omuntu lw'aliiza. ²⁴ Omuyigirizwa tasinga amwegeresya, so n'omwidu tasinga mukama we. ²⁵ Kimumala omuyigirizwa okubba ng'amwegeresya, n'omwidu okubba nga mukama we. Oba nga beetere mwene nyumba Beeruzebuli, tebalisinziawo abo abali mu nyumba ye? ²⁶ Kale temubatyanga: kubanga wabula kigambo ekyabikiibwe, ekitalibikkulibwa, waire ekyagisiibwe, ekitalimanyibwa. ²⁷ Kye mbakobera mu ndikirirya, mukitumuliranga mu musana: kye muwulira mu kitu, mukibuuliriranga waigulu ku nyumba. ²⁸ So temubatyanga abaita omubiri, naye nga tebasobola kwita bulamu: naye mumutyenga asobola okuzikirizya obulamu n'omubiri mu Geyeena. ²⁹ Enkalyaluya eibiri tebagitundamu eipeesa limu? era tewalibba n'eimu ku igyo erigwa wansi Itawanyu nga tamaite: ³⁰ era n'enziiri gyanyu egy'oku mutwe gyabaliibwe gyonagyona. ³¹ Kale temutyanga; imwe musinga enkalyaluya enyingi. ³² Kale buli muntu yenayena alinjatulira mu maiso g'abantu, nzeena ndimwatulira mu maiso ga Itawange ali mu igulu. ³³ Naye yenayena alineegaanira mu maiso g'abantu, nzeena ndimwegaanira mu maiso ga Itawange ali mu igulu. ³⁴ Temulowooza nti naizire kuleeta mirembe ku nsi: ti naizire kuleeta mirembe, wabula ekitala. ³⁵ Kubanga naizire kwawukanya omwana no itaaye, omuwala no maye, omugole no nazaala we; ³⁶ abalabe b'omuntu baabbanga bo mu nyumba ye. ³⁷ Ataka itaaye oba maye okubasinga nze, tansaanira; ataka mutane oba muwala we okubasingya nze, tansaanira. ³⁸ N'oyo atakwata musalaba gwe n'ansengererya enyuma wange, tansaanira. ³⁹ Abona obulamu bwe alibugotya; agotya obulamu bwe ku lwange alibubona. ⁴⁰ Aikirirya imwe ng'aikiriirye niinze, aikirirya nze ng'aikirirye eyantumire. ⁴¹ Aikirirya nabbi mu liina lya nabbi aliweebwa empeera ya nabbi; naye aikirirya omutuukirivu mu liina ly'omutuukirivu aliweebwa empeera y'omutuukirivu. ⁴² Era buli amuwa okunywa omumu ku abo abatono ekikompe ky'amaizi amawoolu kyoka, mu liina ly'omuyigirizwa, mazima mbakoba nti empeera ye terimugota n'akatono.