¹ Bwe babbaire abangi abaatandika okuwandiika amakulu g'ebigambo ebyatuukiriziibwe mu ife, ² nga bwe baabitubuuliire, abo abaasookere okuva ku luberyeberye okubba abajulirwa era abaweereza b'ekigambo, ³ awo bwe naliraanyizirye dala byonabyona okuva ku luberyeberye, era nzeena naboine nga kisa okukuwandiikira iwe, Teefiro omusa einu, nga bwe byaliraine; ⁴ kaisi omanye amazima g'ebigambo bye wayegereseibwe. ⁵ Awo mu mirembe gya Kerode, kabaka We Buyudaaya, wabbairewo kabona, eriina lye Zaakaliya, wo mu lulyo lwa Abiya: era yabbaire n'omukali ow'omu bawala ba Alooni, eriina lye Erisabesi. ⁶ N'abo bombiri babbaire batuukirivu mu maiso ga Katonda, nga batambulira mu biragiro byonabyona ne mu by'obutuukirivu ebya Mukama nga babulaku kabbiibi. ⁷ So tebabbaire no mwana, kubanga Erisabesi yabbaire mugumba, boona bombiri babbaire bakairiwire mu myaka gyabwe. ⁸ Awo olwatuukire, bwe yabbaire ng'akola omulimu ogw'obwa kabona mu maiso ga Katonda ng'oluwu lwe bwe lwaliraine, ⁹ awo akalulu ne kamugwaku ng'empisa ez'obwa kabona bwe gyabbaire okuyingira mu yeekaalu ya Mukama okwotererya obubaani. ¹⁰ Awo ekibiina kyonakyona eky'abantu kyabbaire nga kisabira wanza mu kiseera eky'okwotereryamu. ¹¹ Awo malayika wa Mukama n'amubonekera ng'ayemereire ku luuyi olw muliiro olw'ekyoto eky'okwotereryaku. ¹² Awo Zaakaliya bwe yamuboine ne yeeraliikirirya, n'atya. ¹³ Naye malayika n'amugamba nti Totya, Zaakaliya; kubanga okwegayirira kwo kuwuliirwe, mukazi wo Erisabesi alikuzaalira omwana ow'obulenzi, olimutuuma eriina Yokaana. ¹⁴ Olisanyuka, era olijaguza, era bangi abalisanyukira okuzaalibwa kwe. ¹⁵ Kubanga aliba mukulu mu maiso ga Mukama, so talinywa mwenge waire ekitamiilya; era alijjuzulibwa Omwoyo Omutukuvu, okuva mu kida kya maye. ¹⁶ Era bangi mu baana ba Isiraeri alibairya eri Mukama Katonda waabwe. ¹⁷ Alibatangira mu maiso ge: mu mwoyo n'amaani ge Eriya aliryawo emyoyo gya bazeiza eri abaana, n'abatawulira okutambuliranga mu magezi g'abatuukirivu; okutegekera Mukama abantu abateekeibweteekeibwe. ¹⁸ Awo Zaakaliya n'akoba malayika nti Nakimanyire ntya ekyo? kubanga nze ndi mukaire, no mukali wange akairikire mu myaka gye. ¹⁹ Awo malayika n'airamu n'amukoba nti Ninze Gabulyeri, ayemerera mu maiso ga Katonda; era natumiibwe okutumula naiwe n'okukukobera ebigambo ebyo ebisa. ²⁰ Kale, bona, olisirika era nga tosobola kutumula, okutuusia ku lunaku lwe biribbaawo ebyo, kubanga toikirirye bigambo byange, ebirituukirizibwa mu kutuuka kwabyo. ²¹ Awo abantu babbaire balindirira Zaakaliya, ne beewuunya bw'alwire mu yeekaalu. ²² Awo bwe yafulumire n'atasobola kutumula nabo: ne bategeera nti aboine okwolesebwa mu yeekaalu: n'alwawo ng'abawenya n'omukono ng'akaali asiriwaire. ²³ Awo olwatuukire, enaku egy'okuweereza kwe bwe gyaweireyo, n'airayo eika ewuwe. ²⁴ Awo enaku egyo bwe gyabitirewo omukali we Erisabesi n'abba ekida: ni yegisirara emyezi itaanu, ng'akoba nti ²⁵ Atyo Mukama bw'ankolere mu naku gye yaningiririremu okuntoolaku ensoni mu bantu. ²⁶ Awo mu mwezi ogw'omukaaga malayika Gabulyeri n'atumibwa Katonda mu kibuga eky'e Galiraaya eriina lyakyo Nazaaleesi, ²⁷ eri omuwala atamaite musaiza eyabbaire ayogerezeibwe omusaiza eriina lye Yusufu ow'omu nyumba ya Dawudi; n'eriina ly'omuwala Malyamu. ²⁸ Awo n'ayingira omumwe, n'akoba nti Mirembe iwe aweweibwe einu ekisa, Mukama ali naiwe. ²⁹ Naye iye ne yeeraliikirira ekigambo ekyo, n'alowooza okulamusa okwo bwe kuli. ³⁰ Awo malayika n'amukoba nti Totya, Malyamu; kubanga oboine ekisa eri Katonda. ³¹ Era, bona, olibba kida, olizaala omwana ow'obulenzi, olimutuuma eriina Yesu. ³² Oyo alibba mukulu, alyetebwa Mwana w'Oyo Ali waigulu einu. Era Mukama Katonda alimuwa entebe ya Dawudi zeizawe: ³³ era yafuganga enyumba ya Yakobo emirembe n'emirembe, so obwakabaka bwe tebuliwaawo. ³⁴ Awo Malyamu n'akoba malayika nti Kiribba kitya ekyo, kubanga timaite musaiza? ³⁵ Ne malayika n'airamu n'amukoba nti Omwoyo Omutukuvu alikwizira, n'amaanyi g'Oyo Ali waigulu einu galikusiikirizia: era ekyo ekirizaalibwa kyekiriva kyetebwa ekitukuvu, omwana wa Katonda. ³⁶ Bona, Erisabesi mugande wo, era iye ali kida kyo mwana wo bulenzi mu bukaire bwe; guno niigwo mwezi gwe ogw'omukaaga eyayetebwanga omugumba. ³⁷ Kubanga wabula kigambo ekiva eri Katonda kiribulwa maani. ³⁸ Malyamu n'akoba nti Bona, nze ndi muzaana wa Mukama; kibbe ku nze nga bw'okobere. Awo malayika n'ava gy'ali. ³⁹ Awo mu naku egyo Malyamu n'ayimuka n'ayaba mangu mu nsi ey'ensozi, mu kibuga kya Yuda; ⁴⁰ n'ayingira mu nyumba ya Zaakaliya n'alamusa Erisabesi. ⁴¹ Awo olwatuukire Erisabesi bwe yawuliire okulamusa kwa Malyamu, omwana n'abuukabuuka mu kida kye; Erisabesi n'aizulibwa Omwoyo Omutukuvu; ⁴² n'atumulira waigulu n'eidoboozi inene n'akoba nti Oweweibwe omukisa iwe mu bakali, n'ekibala eky'omu kida kyo kiweweibwe omukisa. ⁴³ Nzeena kale ekigambo kino kiviire wa, maye wa Mukama wange okwiza gye ndi? ⁴⁴ Kubanga bona, eidoboozi ly'okusugirya kwo bwe liyingiire mu matu gange, omwana n'abuukabuuka mu kida kyange, olw'eisanyu. ⁴⁵ Aweweibwe omukisa eyaikirirye; kubanga birituukirizibwa ebyo bye wakobeibwe Mukama. ⁴⁶ Malyamu n'akoba nti Emeeme yange etendereza Mukama, ⁴⁷ N'omwoyo gwange gusanyukiire Katonda Omulokozi wange. ⁴⁸ Kubanga aboine obunaku bw’omuzaana we: Kubanga, bona, okusooka atyanu ab’emirembe gyonagyona banjetanga Aweweibwe omukisa. ⁴⁹ Kubanga Omuyinza ankoleire ebikulu; N'eriina ly'eitukuvu. ⁵⁰ N'ekisa kye kiri mu bamutya; Emirembe n'emirembe. ⁵¹ Alagire amaani n'omukono gwe; Asaansaanyirye abalina amalala mu kuteerera kw'omu mwoyo gyabwe. ⁵² Abbingire abafuzi abeekudumbalya ku ntebe gyabwe, Agulumizirye abeetoowazia. ⁵³ Abalina enjala abaikutirye ebisa; N'abagaiga ababbingire nga babula kintu. ⁵⁴ Abbereire Isiraeri omwidu we Aijukire ekisa kye. ⁵⁵ (Nga bwe yakobere bazeiza baisu) Eri Ibulayimu n'eizaire lye, emirembe gyonagyona. ⁵⁶ Awo Malyamu n'amalayo emyezi ng'aisatu, n'aira ewuwe. ⁵⁷ Awo ebiseera bya Erisabesi ne bituuka okuzaala: n'azaala omwana wo bulenzi. ⁵⁸ Abaliraanwa be n'ab'ekika kye ne bawulira nga Mukama amugulumiririzirye ekisa kye, ne basanyukira wamu naye. ⁵⁹ Awo olwatuukire ku lunaku olw'omunaana, ne baiza okukomola omwana; babbaire bataka okumutuuma eriina lya Itaaye Zaakaliya. ⁶⁰ Maye n'airamu nakoba nti Bbe, yeena anaatuumibwa Yokaana. ⁶¹ Ne bamukoba nti Wabula wo mu kika kyo ayetebwa eliina eryo. ⁶² Ne bawenya Itaaye, bw'ataka okumutuuma. ⁶³ N'ataka ekipande eky'okuwandiikaku, n'awandiika, n'akoba nti Eriina lye Yokaana. Ne beewuunya bonnabona. ⁶⁴ Amangu ago omunwa gwe ne kazibuka, n'olulimi lwe ne lusumulukuka, n'atumula nga yeebalya Katonda. ⁶⁵ Bonnabona ababbaire balirainewo ne batya. N'ebigambo ebyo byonabyona ne bibuna mu nsi yonayona ey'ensozi ey'e Buyudaaya. ⁶⁶ Ne bonnabona abaabuwuliire ne babiteeka mu myoyo gyabwe, ne bakoba nti Kale omwana oyo alibba ki? kubanga omukono gwa Mukama gwabbaire wamu naye. ⁶⁷ Itaaye Zaakaliya n'aizulibwa Omwoyo Omutukuvu, n'alagula, ng'akoba nti ⁶⁸ Atenderezebwe Mukama, Katonda wa Isiraeri; Kubanga akyaliire abantu be, era abanunwire, ⁶⁹ Era atuyimusirye eiziga ery'obulokozi Mu nyumba y'omwidu we Dawudi. ⁷⁰ (Nga bwe yatumuliire mu munwa gwa banabbi be abatukuvu, ababbairewo kasookedde ensi ebbaawo), ⁷¹ Okulokolebwa mu balabe baisu; no mu mikono gy'abo bonnabona abatukyawa; ⁷² Okutuukirirya ekisa kye yasuubizirye bazeiza baisu, N'okwijukira endagaanu ye entukuvu. ⁷³ Okutuukirirya ekirayiro kye yalayiriire Zeiza waisu Ibulayimu, ⁷⁴ Okukituwa ife; ife bwe tulokolebwa mu mikono gy'abalabe baisu, Kaisi tumuweereze nga tubulaku kye tutya, ⁷⁵ Mu butukuvu no mu butuukirivu mu maiso ge enaku gyaisu gyonagyona. ⁷⁶ Weena, omwana, okyetebwa naabbi w'Oyo Ali waigulu einu: Kubanga olitangira Mukama okulongoosia amangira ge; ⁷⁷ Okumyansia abantu be obulokozi, Ebibbiibi byabwe bibatoolebweku ⁷⁸ Olw'ekisa kya Katonda waisu ekisa eŋamba kyeviire etusalira eva mu igulu, ⁷⁹ Okwakira abatyama mu ndikirirya, no mu kiwolyo ky'olumbe, Okuluŋamya ebigere byaisu mu ngira ey'emirembe. ⁸⁰ Omwana n'akula, n'ayongerwaku amaani mu mwoyo; n'abba mu malungu okutuusia ku lunaku lwe yayoleseibwe eri Isiraeri.