¹ Oluvanyuma lw'ebyo Yesu n'atambula mu Galiraaya: kubanga teyatakire kutambula mu Buyudaaya kubanga Abayudaaya babbaire basala amagezi okumwita. ² Naye embaga y'Abayudaaya yabbaire erikumpi okutuuka, niiyo ey'ensiisira. ³ Awo bagande ne bamukoba nti va wano, oyabe e Buyudaaya, abayigirizwa ibo boona babone emirirnu gyo gy'okola. ⁴ Kubanga wabula akolera kigambo mu kyama wabula nga yeena omwene ataka amanyike mu lwatu. Bw'okola ebyo, weeyoleke eri ensi. ⁵ Kubanga na bagande be tebamwikiriirye. ⁶ Awo Yesu n'abakoba nti Ekiseera kyange kikaali kutuuka; naye ekiseera kyanyu enaku gyonagyona kibbeerawo nga kyeteekereteekere. ⁷ Ensi tesobola kukyawa imwe; naye ekyawa ninze, kubanga nze ntegeeza ebyayo nti emirimu gyayo mibbiibi. ⁸ Imwe mwambuke ku mbaga: nze nkaali kwambuka ku mbaga eno; kubanga ekiseera kyange kikaali kutuukirizibwa. ⁹ Bwe yamalire okukoba ebyo n'asigala e Galiraaya. ¹⁰ Naye bagande be bwe baamalire okwambuka ku mbaga, yeena n'ayambuka, ti lwatu, naye nga mu kyama. ¹¹ Awo Abayudaaya ne bamusagira ku mbaga, ne bakoba nti Ali waina? ¹² Ne wabba okumuunyamuunya kungi mu bibiina. Abandi ne bakoba ku iye nti Musa; abandi ne bakoba nti Bbe, naye agotya ekibiina. ¹³ Naye tebabbaire yamutumwireku lwatu kubanga baatiire Abayudaaya. ¹⁴ Awo mu mbaga wakati Yesu n'ayambuka ku yeekaalu, n'ayegeresya. ¹⁵ Abayudaaya ne beewuunya ne bakoba nti Ono amanya atya okusoma nga tayigirizibwangaku? ¹⁶ Awo Yesu n'abairamu n'akoba nti Okwegeresya kwange ti kwange, naye kw'odi eyantumire. ¹⁷ Omuntu bw'ataka okukola odi by'ataka, alitegeera okwegeresya kuno oba nga kwaviire eri Katonda, oba nga nze ntumula bya magezi gange. ¹⁸ Atumula eby'amagezi ge, asagira ekitiibwa kye iye: naye asagira ekitiibwa ky'oyo eyamutumire, oyo wa mazima, so obutali butuukirivu bubula mu iye. ¹⁹ Musa teyabawaire mateeka, so mu imwe akwata akwata amateeka? Musalira ki amagezi okungita? ²⁰ Ekibiina ne bairamu nti Oliku dayimooni: yani asala amagezi okukwita? ²¹ Yesu n'airamu n'akoba nti Nakola omulimu gumu, naimwe mwenamwena mwewunya. ²² Musa kyekyaviire abawa okukomola (ti kubanga kwa Musa naye kwa bazeiza); no ku sabbiiti mukomola omuntu. ²³ Omuntu bw'akomolebwa ku sabbiiti, amateeka ga Musa galeke okusoba; munsunguwalira kubanga nafuula omuntu omulamu dala ku sabbiiti? ²⁴ Temusalanga musango okusinziira ku mboneka, naye musalenga omusango ogw'ensonga. ²⁵ Awo abamu ab'omu Yerusaalemi ne bakoba nti Imwe basagira okwita ti niiye oyo? ²⁶ Naye, bona, atumula lwatu, so babulireku kye bamukoba. Abakulu bamanyire dala ng'ono niiye Kristo? ²⁷ Naye ono timaite gy'ava: naye Kristo bw'aiza, wabula ategeera gy'ava. ²⁸ Awo Yesu n'atumulira waigulu mu yeekaalu ng'abegeresya n'akoba nti Nze mumaite, era ne gye nva mumaiteyo; nzeena tinaizire ku bwange nzenka, naye odi eyantumire niiye wa mazima, gwe mutamaite imwe. ²⁹ Nze mumaite; kubanga Naviire gy'ali, era niiye yantumire. ³⁰ Awo badi ne basala amagezi okumukwata, naye tewabbaire eyamuteekereku omukono, kubanga ekiseera kye kyabbaire nga kikaali kutuuka. ³¹ Naye bangi ab'omu kibiina ne bamwikirirya; ne bakoba nti Kristo bw'aliza, alikola obubonero bungi okusinga ono bwe yakolere? ³² Abafalisaayo ne bawulira ekibiina nga bamwemuunyamuunyaamu batyo; bakabona abakulu n'Abafalisaayo ne batuma abambowa okumukwata. ³³ Awo Yesu n'akoba nti Esigaireyo eibbanga itono nga nkaali naimwe, kaisi njabe gy'ali eyantumire. ³⁴ Mulinsagira, so temulimbona; era gye ndi, imwe temusobola kwizayo. ³⁵ Awo Abayudaaya ne batumulagana bonka na bonka nti Ono ataka kwaba wa, waisu gye tutamubonera? ataka kwaba eri abo abaasaansaaniire mu Bayonaani, ayegeresye Abayonaani? ³⁶ Kigambo ki ekyo ky'akoba nti Mulinsagira, so temulimbona; era gye ndi, imwe temusobola kwizayo? ³⁷ Naye ku lunaku olw'enkomerero, niilwo lukulu olw'embaga, Yesu yayemerera n'atumulira waigulu, n'akoba nti Omuntu bw'alumwa enyonta, aize gye ndi anywe. ³⁸ Aikirirya nze, ng'ekyawandiikibwa bwe kikoba nti emiiga gy'amaizi amalamu girifuluma mu kida kye. ³⁹ Ekyo yakiwuliire ku Mwoyo, gwe babbaire baaba okuweebwa abamwikirirye; kubanga Omwoyo yabbaire akaali kugabibwa; kubanga Yesu yabbaire akaali kugulumizibwa. ⁴⁰ Awo ab'omu kibiina bwe baawuliire ebigambo ebyo ne bakoba nti Mazima, ono niiye nabbi odi. ⁴¹ Abalala ne bagamba nti Ono niiye Kristo. Naye abandi ne bakoba nti Bbe, Kristo ava mu Galiraaya? ⁴² Ekyawandiikiibwe tekikoba nti Kristo ava mu izaire lya Dawudi, mu Besirekemu, embuga Dawudi mwe yabbaire? ⁴³ Kityo ne wabbaawo okwawukana mu kibiina ku lulwe. ⁴⁴ Abandi ne bataka okumukwata, naye wabula eyamuteekereku emikono. ⁴⁵ Awo abambowa ne bairayo eri bakabona abakulu n'Abafalisaayo; boona ne babakoba nti Ekibalobeire ki okumuleeta? ⁴⁶ Abambowa ne bairamu nti wabula muntu eyali atumwire atyo. ⁴⁷ Awo Abafalisaayo ne babairamu nti Era mweena abagoterye? ⁴⁸ Aliwaina mu bakulu Eyamwikiriirye, oba mu Bafalisaayo? ⁴⁹ Naye ekibiina kino abatategeire mateeka bakolimiirwe ⁵⁰ Nikoodemu (ye yajja gy'ali eira, Niiye mwinaabwe) n'abakoba nti ⁵¹ Ye mpisa yaisu okusalira omuntu omusango nga bakaali kuwulira bigambo bye n'okutegeera ky'akolere? ⁵² Ne bairamu ne bamukoba nti weena waviire Galiraaya? Sagira, obone, nabbi tava mu Galiraaya, ⁵³ Buli muntu n'airayo eika.