¹ Okutaka ab'oluganda kubbengawo. ² Temwerabiranga kusembezia bageni: kubanga olw'okwo wabbairewo abaasembezerye bamalayika nga tebamaite. ³ Mwijukirenga abasibe, ng'abasibirwa awamu nabo; era n'abandi enaku, kubanga mwena muli mu mubiri. ⁴ Okufumbirwagana kwe kitiibwa eri bonabona, n'ekitanda kirongoofu; kubanga abakaba n'abenzi Katonda alibasalira omusango. ⁵ Mubbenga n'empisa ey'obutatakanga bintu; bye mulina bibamalenga: kubanga iye yakobere nti Tindikuleka n'akatono, so tindikwabulira n'akatono. ⁶ N'okwaŋanga ni twaŋanga okutumula nti Mukama niiye mubeezi wange; Tinditya: Omuntu alinkola ki? ⁷ Mwijukirenga abo abaabafuga, abaababuulira ekigambo kya Katonda; era nga mulingirira enkomerero y'empisa gyanyu, musengereryenga okwikirirya kwabwe. ⁸ Yesu Kristo eizo ne atyanu abba bumu n'okutuusia emirembe n'emirembe. ⁹ Temutwalibwatwalibwang'okwegeresya okw'engeri enyingi okuyaaka: kubanga kisa omwoyo okunywezebwa n'ekisa; so ti kunywezebwa ne mpisa egy'okulyanga, ezitagasa abo abagitambuliramu. ¹⁰ Tulina ekyoto abaweereza eby'omu weema kye batalagiirwe kuliirangaku. ¹¹ Kubanga ebisolo bidi, ebitwalibwamu omusaayi gwabyo kabona asinga obukulu mu kifo ekitukuvu olw'ekibbiibi, emibiri gyabyo gyokerwa wanza wo lusiisira. ¹² Era ne Yesu kyeyaviire abonabonera ewanza wa wankaaki, kaisi atukulye abantu n'omusaayi gwe iye. ¹³ Kale tufulume okwaba gy'ali ewanza w'olusiisira nga twetiikire ekivumi kye. ¹⁴ Kubanga wano tubula kibuga ekibbeererawo, naye tusagira ekyaba okwiza. ¹⁵ Kale mu oyo tuweereyo eri Katonda buliijo sadaaka ey'eitendo, niikyo ekibala eky'eminwa egyatula eriina lye. ¹⁶ Naye okukola obusa n'okwikaikana temwerabiranga: kubanga sadaaka egiri ng'egyo gisanyusia inu Katonda. ¹⁷ Muwulirenga abo ababafuga mubagonderenga: kubanga abo bamoga olw'obulamu bwanyu, ng'abaliwozia bwe baakola; kaisi bakolenga batyo n'eisanyu so ti na kusinda: kubanga ekyo tekyandibagasirye imwe. ¹⁸ Mutusabirenga: kubanga tumanyiire dala nga tulina omwoyo omusa, nga tutaka okubbanga n'empisa ensa mu byonabyona. ¹⁹ Era okusinga einu mbeegayirira okukolanga mutyo, kaisi ngirizibwewo mangu gye muli. ²⁰ Naye Katonda ow'emirembe, eyairiryewo okuva mu bafu omusumba w'entama omukulu olw'omusaayi ogw'endagaano ey'olubeerera, niiye Mukama waisu Yesu, ²¹ abatuukirize mu buli kigambo ekisa okukolanga by'ataka, ng'akolera mu ife ekisiimibwa mu maiso ge, ku bwa Yesu Kristo; aweebwenga ekitiibwa emirembe n'emirembe. Amiina. ²² Naye mbabuulirira, ab'oluganda, muguminkirizenga ekigambo eky'okubuulirira: kubanga mbawandiikiire mu bigambo bitono. ²³ Mumanye nga mugande waisu Timoseewo yalekwirwe; bw'aliiza amangu, ndibabonera wamu naye. ²⁴ Musugirye bonabona abafuga, n'abatukuvu bonabona. Ab'omu Italiya babasugiirye. ²⁵ Ekisa kibbenga naimwe mwenamwena. Amiina.