¹ Ndyemerera we nkuumira ne neeteeka ku kigo, ne nengera okubona byeyatumula nanze, era bye mba ngiramu eby'okwemulugunya kwange. ² Awo Mukama n'angiramu n'atumula nti Wandiika okwolesebwa okwo, okwole kusa ku bipande, akusoma airuke mbiro. ³ Kubanga okwolesebwa okwo kukaali kwe ntuuko gyakwo egyalagiirwe, era kwanguwa okutuusya enkomerero, so tekulibbeya: waire nga kulwawo, kulindirirenga; kubanga tekulirema kwiza, tekulirwawo. ⁴ Bona, emeeme ye yeegulumizirye, ti ngolokofu mu iye: naye omutuukirivu aliba mulamu lwo kwikirirya kwe. ⁵ Weewaawo, era omwenge mulyazaamaanyi, musaiza wa malala, era atatyama waika; agaziya okwegomba kwe ng'amagombe, era ali ng'okufa, so tasobola kwikuta, naye n'akuŋaanyiya gy'ali amawanga gonagona, ne yeetuumira ebika byonabyona. ⁶ Abo bonabona tebalimugereraku lugero ne bamukokoleraku ekikooko ne batumula nti Gimusangire oyo ayalya ebyo ebitali bibye! alituusya waina? era eyeebbinika emisingo! ⁷ Tebaliyimuka nga tomanyiriire abo abalikuluma, tebalizuuka abalikweraliikirirya, naiwe n'obba munyale gye bali? ⁸ Kubanga wanyagire amawanga mangi, ekitundu kyonakyona ekifiikirewo ku mawanga balikunyaga; olw'omusaayi gw'abantu n'olw'ekyeju ekyagiriirwe ensi n'ekibuga ne bonabona abakibbamu. ⁹ Gimusangire oyo afunira enyumba ye amagoba amabbiibi, azimbe ekisu kye waigulu, awonyezebwe mu mukono gw'obubbiibi! ¹⁰ Oteesereirye enyumba yo ensoni, ng'omalawo amawanga mangi, era wasoberye emeeme yo iwe. ¹¹ Kubanga eibbaale liryogerera waigulu nga liyima mu kisenge, n'omusaale guliriramu nga guyima mu misekese. ¹² Gimusangire oyo azimba ekibuga n'omusaayi, n'anywezya ekibuga n'obutali butuukirivu! ¹³ Bona, tekyaviire eri Mukama w'eigye abantu okutengejera omusyo, n'amawanga okweyooyeserya obutaliimu? ¹⁴ Kubanga ensi eriizula okumanya ekitiibwa kya Mukama, ng'amaizi bwe gasaanikira ku nyanza. ¹⁵ Gimusangire oyo awa mwinaye ebyokunywa, n'oyongeraku n'obutwa bwo, n'okutamiirya n'omutamiirya kaisi olingirire ensoni gyabwe! ¹⁶ Oizwire ensoni awaabbanga ekitiibwa: weena nywa, obbe ng'atali mukomole: ekikompe eky'omu mukono gwa Mukama omulyo kirikyusibwa eri iwe, n'ensoni egy'obuwemu ziribba ku kitiibwa kyo. ¹⁷ Kubanga ekyeju ekyagiriirwe Lebanooni kirikubiikaku, n'okuzikirira kw'ensolo egyabatiisyanga; olw'omusaayi gw'abantu n'olw'ekyeju ekyagiriirwe ensi n'ekibuga ne bonabona abakityaimemu. ¹⁸ Ekifaananyi ekyole kigasa ki, omukozi waakyo n'okwola n'akyola; ekifaananyi ekisaanuukye n'omwegeresya w'eby'obubbeyi bigasa ki, omukozi w'omulimu gwe n'okwesiga n'akyesiga, okukola esanamu ensiru! ¹⁹ Gimusangire oyo akoba omusaale nti Zuuka; akoba eibbaale eisiru nti Golokoka! Kino kyayegeresya? Bona, kibiikibweku zaabu ne feeza, so wabula mwoka n'akamu konka wakati mu ikyo. ²⁰ Naye Mukama ali mu yeekaalu ye entukuvu: ensi gyonagyona gibunire mu maiso ge.