¹ Yakobo n'abbanga mu nsi itaaye mwe yatyamanga mu nsi ya Kanani. ² Okuzaala kwa Yakobo kuuno. Yusufu bwe yabbaire yaakamala emyaka ikumi na musanvu, yabbaire alisya ekisibo awamu ne bagande be: omulenzi n'abbanga wamu n'abaana ba Bira, n'abaana ba Zirupa, Abakali ba itaaye: Yusufu n'akoberanga itaaye ebigambo byabwe ebibbiibi. ³ Era Isiraeri yatakire Yusufu okusinga abaana be bonabona, kubanga gwe yazaaliirwe ng'akairikire: n'amutungira ekizibawo eky'amabala amangi. ⁴ Bagande be ne babona nga itaaye yamutakire okusinga bagande be bonabona; ne bamukyawa, ne batasobola kutumula naye wabula eby'okutongana. ⁵ Yusufu n'aloota ekirooto, n'akibuulira bagande be: ne beeyongera ate okumukyawa. ⁶ N'abakoba nti Mbeegayiriire, muwulire ekirooto kino kye ndootere: ⁷ kubanga, bona, twabbaire tusiba ebinywa mu nimiro, era bona, ekinywa kyange ne kyemerera, era ne kyesimba; era, bona, ebinywa byanyu ne biiza ne bikyetooloola, ne bivuunamira ekinywa kyange. ⁸ Bagande be ne bamukoba nti Okufuga olitufuga iwe? oba kutwala olitutwala iwe? Ne beeyongera ate okumukyawa olw'ebirooto bye n'olw'ebigambo bye. ⁹ N'aloota ate ekirooto ekindi, n'akibuulira bagande be n'atumula nti bona, ndootere n'ekirooto ekindi; era, bona, eisana n'omwezi n'emunnyenye eikumi n'eimu ne binvuunamira. ¹⁰ N'akikobera itaaye na bagande be; itaaye n'amunenya, n'amukoba nti Kirooto ki kino ky'olootere? Nze no mawo na bagande bo okwiza tuliiza okukuvuunamira? ¹¹ Bagande be ne bamukwatirwa eiyali; naye kitaaye n'aijukira ebyo bye yatumwire. ¹² Bagande be ne baaba okulisya ekisibo kya itaaye mu Sekemu. ¹³ Isiraeri n'akoba Yusufu nti Bagande bo tebalisya kisibo mu Sekemu? Iza nkutume gye bali. N'amukoba nti Niinze ono. ¹⁴ N'amukoba nti Yaba atyanu obone nga bagande bo baliyo kusa, era n'ekisibo nga kiriyo kusa; oire onkobere. Awo n'amutuma okuva mu kiwonvu eky'e Kebbulooni, n'atuuka e Sekemu. ¹⁵ Omusaiza n'amubona, era, bona, yabbaire akyamiire mu nsiko: omusaiza n'amubuulya nti Osagira ki? ¹⁶ N'atumula nti Nsagira bagande bange: nkobera, nkwegayiriire, gye balisiirye ekisibo. ¹⁷ Omusaiza n'atumula nti Baabire: kubanga nabawuliire nga batumula nti Twabe e Dosani. Yusufu n'asengererya bagande be, n'abasanga mu Dosani. ¹⁸ Ne bamulengera ng'akaali wala, ne bamwekobaana nga akaali kubasemberera okumwita. ¹⁹ Ne bakobagana nti Bona, Omulooti wuuyo aiza. ²⁰ Kale mwize tumwite, tumusuule mu bumu ku bwina, tulitumula nti Ensolo endalu niiyo yamuliire: kaisi ne tubona ebirooto bye bwe biribba. ²¹ Lewubeeni n'awulira ekyo, n'amuwonya mu mukono gwabwe; n'atumula nti Tuleke okumwitira dala. ²² Lewubeeni n'abakoba nti Temuyiwa musaayi; mumusuule mu bwina buno obuli mu idungu, naye temumuteekaku mukono: kaisi amuwonye mu mukono gwabwe, okumwirirya itaaye. ²³ Awo olwatuukire, Yusufu bwe yatuukire eri bagande be, ne bambula Yusufu ekizibawo kye, ekizibawo eky'amabala amangi kye yabbaire avaire; ²⁴ ne bamutwala ne bamusuula mu bwina: n'obwina bwabbaire bukalu nga munula maizi. ²⁵ Ne batyama okulya emere: ne bayimusya amaiso gaabwe ne balinga, era, bona, ekibiina ky'Abaisimaeri abaaviire a mu Gireyaadi nga batambula, nga balina eŋamira egyetiikire eby'akaloosa n'envumbo ne moli, nga babitwala mu Misiri. ²⁶ Yuda n'akoba bagande be nti Kiritugasa kitya okwita mugande waisu n'okugisa omusaayi gwe? ²⁷ Kale tumugulye Abaisimaeri, so omukono gwaisu guleke okumubbaaku; kubanga niiye mugande waisu, niigwo mubiri gwaisu. Bagande be ne bamuwulira. ²⁸ Abamidiyaani, ab'obuguli, ne babitawo; ne bawalula Yusufu ne bamutoola mu kiina, ne bagulya Abaisimaeri Yusufu ebitundu by'efeeza abiri. Ne batwala Yusufu mu Misiri. ²⁹ Lewubeeni n'aidayo eri ekiina; era, bona, Yusufu teyabbaire mu kiina; n'akanulakanula engoye gye. ³⁰ N'aidayo eri bagande be, n'atumula nti Omwana abulayo; nzeena ndyaba waina? ³¹ Ne bairira ekizibawo kya Yusufu, ne baita embuli enume, ne bainika ekizibawo mu musaayi; ³² ne baweererya ekizibawo eky'amabala amangi, ne bakireetera itaaye; ne batumula nti Twaboine kino: atyanu tegeera obanga niikyo ekizibawo eky'omwana wo oba ti niikyo. ³³ N'akitegeera, n'atumula nti niikyo ekizibawo eky'omwana wange; ensolo embiibbi yamuliire; Yusufu yataagulwataagulwa awabula kubuusabuusa. ³⁴ Yakobo n'akanulakanula engoye gye, ne yeesiba ebibukutu mu nkende, n'akungubagira omwana we enaku nyingi. ³⁵ Abataane be bonabona na bawala be bonabona ne bagolokoka okumusanyusa; naye n'agaana okusanyusibwa; n'atumula nti Kubanga ndiika emagombe awali omwana wange nga nkaali nkunga. itaaye n'amulirira amaliga. ³⁶ Abamidiyaani ne bamugulya Potifali mu Misiri, ye mwami wa Falaawo, omukulu w'abambowa.