¹ v1 Pawulo omutume (ataviire mu bantu waire okubita eri omuntu, wabula eri Yesu Kristo ne Katonda Itawaisu, eyamuzuukizirye mu bafu), ² n'ab'oluganda bonabona abali nanze tubawandiikiire ekanisa egy'e Galatiya: ³ ekisa kibbenga gye muli n'emirembe ebiva eri Katonda Itawaisu, ne Mukama waisu Yesu Kristo, ⁴ eyeewaireyo olw'ebibbiibi byaisu, kaisi atutoole mu mirembe gino egiriwo emibbiibi nga bwe yatakire Katonda era Itawaisu: ⁵ aweebwenga ekitiibwa emirembe n'emirembe. Amiina. ⁶ Neewuunya kubanga musenguka mangu mutyo eyabetere mu kisa kya Kristo okwaba eri enjiri efaanana obundi; ⁷ ti gendi, wabula abantu ababateganya, abataka okukyusirya dala enjiri ya Kristo. ⁸ Naye oba nga ife oba malayika ava mu igulu bw'abuuliranga enjiri wabula nga bwe twababuuliire, akolimirwenga. ⁹ Nga bwe twasookere okutumula, ntyo bwe ntumula atyanu ate nti Omuntu bw'ababuuliranga enjiri wabula nga bwe mwaweweibwe, akolimirwenga. ¹⁰ Kubanga atyanu mpembera bantu aba Katonda? Oba nsala amagezi okusiimibwa abantu? Singa nabbaire nga nkaali nsiimibwa abantu, tinandibbaire mwidu wa Kristo. ¹¹ Kubanga mbategeeza, ab'oluganda, nti enjiri eyabuuliirwe nze ti ya buntu: ¹² kubanga nzena tinagiweweibwe muntu so tinjigirizibwanga, naye mu kubikkuliwa kwa Yesu Kristo. ¹³ Kubanga mwawuliire bwe nabbanga eira mu mpisa gy'Ekiyudaaya, nga nayiganyanga ekanisa ya Katonda awabula kigera ne nginyaga, ¹⁴ ne mbitiririanga mu mpisa gy'Ekiyudaaya okusinga bangi bwe twakulire mu igwanga lyaisu, nga mbasinganga okubba n'eiyali eringi einu mu mpisa gye naweweibwe bazeiza bange ¹⁵ Naye Katonda bwe yasiimire, eyanjawiire okuva mu kida kya mawange, n'anjeta olw'ekisa kye, ¹⁶ okubikulira Omwana we mu nze, kaisi mubuulirenga mu b'amawanga; amangu ago tinateserie na mubiri waire no musaayi: ¹⁷ so tinayambukire Yerusaalemi eri abo abansookere okubba abatume: naye nayabire mu Buwalabu, ne ngira ate mu Ddamasiko. ¹⁸ Awo bwe wewabitirewo emyaka eisatu ne nyambuka e Yerusaalemi okubona Keefa, ne malayo gy'ali enaku ikumi na itaanu. ¹⁹ Naye tinaboine ogondi ku batume wabula Yakobo muganda wa Mukama waisu. ²⁰ Kale, bye mpandiika, bona, mu maiso ga Katonda timbeeya. ²¹ Awo ne njaba mu njuyi egy'e Busuuli ne Kirukiya. ²² Ne mba nga nkaali kutegeerebwa mu maiso g'ekanisa egy'e Buyudaaya egiri mu Kristo: ²³ naye ne bawuliranga buwuliri nti Eyatuyiganyanga eira atyanu abuulira okwikiriria kwe yanyaganga eira. ²⁴ ne bagulumizia Katonda ku lwange.