¹ Awo mu mwaka ogw'oluberyeberye ogwa Kuulo kabaka w'e Buperusi, ekigambo kya Mukama mu munwa gwa Yeremiya kituukirire, Mukama n'akubbirirya omwoyo gwa Kuulo kabaka w'e Buperusi n'okulangirira n'alangirira okubunisya obwakabaka bwe bwonabwona, n'okuwandiika n'abiwandiika ng'atumula nti ² Atyo bw'atumula Kuulo kabaka w'e Buperusi nti Obwakabaka bwonabwona obw'omu nsi Mukama Katonda w'eigulu abumpaire; era ankuutiire okumuzimbira enyumba mu Yerusaalemi ekiri mu Yuda. ³ Buli ali mu imwe ku bantu be bonabona, Katonda we abbe naye, ayambuke mu Yerusaalemi ekiri mu Yuda, azimbe enyumba ya Mukama Katonda wa Isiraeri, (niiye Katonda,) ali mu Yerusaalemi. ⁴ Era buli asigaire mu kifo kyonakyona mw'abba nga mugeni, abasaiza ab'omu kifo kye bamubbeere ne feeza ne zaabu n'ebintu n'ebisolo, obutateekaku ekyo kye bawaayo ku bwabwe eky'enyumba ya Katonda eri mu Yerusaalemi. ⁵ Awo emitwe gy'enyumba gya baitawabwe egya Yuda ne Benyamini ne bagolokoka, na bakabona n'Abaleevi, bonabona Katonda be yakubbirizirye omwoyo gwabwe okwambuka okuzimba enyumba ya Mukama edi mu Yerusaalemi. ⁶ Awo abo bonabona ababeetooloire ne banywezya emikono gyabwe n'ebintu ebya feeza ne zaabu n'ebintu n'ebisolo n'ebintu eby'omuwendo omungi obutateekaaku ebyo byonabyona bye bawaireyo ku bwabwe. ⁷ Era Kuulo kabaka n'afulumya ebintu eby'omu nyumba ya Mukama Nebukaduneeza bye yatoire mu Yerusaalemi n'abiteeka mu isabo lya bakatonda be: ⁸ ebyo Kuulo kabaka w'e Buperusi n'abifulumya mu mukono gwa Misuledasi omuwanika, n'abibalira Sesubazali omukulu wa Yuda. ⁹ Era guno niigwo muwendo gwabyo: esaani egya zaabu asatu, esaani egya feeza lukumi, obwambe abiri mu mwenda; ¹⁰ ebibya ebya zaabu asatu, ebibya ebya feeza eby'omutindo ogw'okubiri bina na ikumi, n'ebintu ebindi lukumi. ¹¹ Ebintu byonabyona ebya zaabu n'ebya feeza byabbaire enkumi itaanu mu bina. Ebyo byonabyona Sesubazali yabitoireyo n'abireeta, abanyage bwe batoleibwe e Babulooni ne baleetebwa e Yerusaalemi.