¹ Awo olwatuukire mu mwaka ogw'eikumi n'e isatu ku lunaku olw'o luberyeberye olw'o mwezi ekigambo kya Mukama ne kingizira nga kitumula nti ² Omwana w'o muntu, kubanga Tuulo atumwire ku Yerusaalemi nti siisiikya! oyo amenyekere eyabbanga omulyango ogw'a mawanga; akyukiire gye ndi: atyanu iye ng'amalire okuzikibwa nze ndigaigawala. ³ Mukama Katonda kyava atumula ati nti bona, ndi mulabe wo, iwe Tuulo, era ndikutabaalya amawanga mangi, ng'e nyanza bw'etabaala amayengo gaayo. ⁴ Kale balizikirirya babbugwe b'e Tuulo, ni bamenyera dala ebigo bye: era ndimukolokotaku enfuufu ye, ni mufuula olwazi olwereere. ⁵ yabbanga kifo kyo kutegerangaku migonjo wakati mu nyanza: kubanga ninze nkitumwire, bw'atumula Mukama Katonda: era kyabbanga munyago gwa mawanga. ⁶ N'a bawala be abali mu itale baliitibwa n'e kitala: kale balimanya nga ninze Mukama. ⁷ Kubanga Mukama Katonda bw'atumula ati nti bona, ndireeta ku Tuulo Nebukaduneeza kabaka w'e Babulooni; kabaka wa bakabaka, okuva obukiika obugooda, ng'alina embalaasi n'a magaali n'a beebagaire embalassi n'e kibiina n'abantu bangi. ⁸ Aliita n'e kitala bawala bo abali mu itale era alikuzimbaku ebigo, n'a kutuumaku ekifunvu, n'akuyimusiryaku engabo. ⁹ Era alisimba ebintu bye ebitomera ku babugwe bo, era alimenyera dala ebigo byo n'e mpasa gye. ¹⁰ Embalaasi gye kubanga giyingire obungi, enfuufu yaagyo erikubiikaku: babugwe bo balitengera olw'oluyoogaanu lw'abo abeebagala embalaasi n'e mpanka n'a magaali, bw'aliyingira mu miryango gyo, ng'a bantu bwe bayingira mu kibuga ekiwagwirwemu ekituli. ¹¹ Aniinirira enguudo gyo gyonagyona n'e binuulo by'e mbalaasi gye: aliita abantu bo n'e kitala, n'e mpango egy'a maani go giriika wansi. ¹² Era balinyaga obugaiga bwo, n'e by'o buguli bwo balibifuula omuyigo: era balimenyera dala babbugwe bo, ne bazikirirya enyumba gyo egy'okwesiima: era baligalamirya amabbaale go n'e misaale gyo n'e nfuufu yo wakati mu maizi. ¹³ Era ndikomya eidoboozi ery'e nyembo gyo: n'okuvuga kw'e nanga gyo tekuliwulirwa ate. ¹⁴ Era ndikufuula olwazi olwereere: era wabbanga kifo kyo kutegerangaku migonjo: tolizimbibwa ate: kubanga ninze Mukama nkitumwire, bw'a tumula Mukama Katonda. ¹⁵ ati Mukama Katonda bw'akoba Tuulo nti ebizinga tebiritengera olw'o kubwatuka olw'okugwa kwo, abaliku ebiwundu bwe balisinda, ng'a baitira ekiwendo wakati mu iwe? ¹⁶ Awo abalangira bonabonna ab'e nyanza baliva ku ntebe gyabwe, ni bambula ebivaalo byabwe, ni beetoolaku engoye gyabwe egy'e idalizi: balivaala okuteengera; balityama ku itakali nga batengera buli kaseera ne bakusamaalirira. ¹⁷ Era balitandika okukukungubagira ne bakukoba nti ng'o zikiriire, iwe eyatyamibwangamu abalu nyanza, ekibuga ekyayatiikiriire, ekyabbaire amaani ku nyanza, kyo n'abo abakityamamu, abaagwisyaku entiisya yaabwe ku abo bonabona abaagitambulirangamu! ¹⁸ Atyanu ebizinga biritengera ku lunaku olw'o kugwa kwo: niiwo awo, ebizinga ebiri mu nyanza birikeŋentererwa olw'okwaba kwo. ¹⁹ Kubanga ati bw'atumula Mukama Katonda nti Bwe ndikufuula ekibuga ekyalekeibwewo, ng'e bibuga ebitatyamiibwemu; bwe ndi kuniinisyaku enyanza, amaizi amangi ni gakubiikaku; ²⁰ kale ndikutengerya wamu n'abo abaika mu biina, eri abantu ab'omu biseera eby'eira, era ndikutyamisya mu njuyi gy'ensi egya wansi, mu bifo ebyalekeibwewo obw'eira, wamu n'abo abaika mu biina, olekenga okutyamibwamu; era nditeeka ekitiibwa mu nsi ey'a balamu: ²¹ ndikufuula entiisya, so tolibbaawo ate: waire nga bakusagira, naye tibaakubonenga ate enaku gyonagyona, bw'atumula Mukama Katonda.