¹ Ate ekigambo kya Mukama ne kingizira nga kitumula nti ² Mwana w'o muntu, manyisya Yerusaalemi emizizyo gyakyo, ³ otumule nti Ati Mukama Katonda bw'akoba Yerusaalemi nti okuzaalibwa kwo n'ekika kyo by'o mu nsi ey'omu Kanani; Omwamoli niiye yabbaire Itaawo, n'o mawo yabbaire Mukiiti. ⁴ Era eby'okuzaalibwa kwo ku lunaku kwe wazaaliirwe tiwasaliibwe kalera, so tewanabiiibwe n'a maizi okukutukuzibwa; tiwateekeibwemu munyu n'akatono, so tewabikiibweku n'akatono. ⁵ Wabula liiso eryakusaasiire okukukola ku ebyo byonabyona, okukukwatirwa ekisa; naye n'osuulibwa mu itale ewanza kubanga wakyayiibwe iwe ku lunaku kwe wazaaliirwe. ⁶ Awo bwe nakubitireku ne nkubonanga weekulukuunyirye mu musaayi gwo, ne nkukoba nti waire ng'oli mu musaayi gwo, bba mulamu: niiwo awo, ni nkukoba nti waire ng'oli mu musaayi gwo, bba mulamu. ⁷ Ni nkwalya ng'ekimuli eky'omu nimiro, ni weeyongera n'ofuuka mukulu, n'otuuka ku buyonjo obusa einu; amabeere go ni gamera, enziiri gyo ni gikula; era naye ng'oli bwereere nga tobiikiibweku. ⁸ Awo bwe nakubitireku ni nkulingirira, bona, ekiseera kyo nga niikyo kiseera eky'okutakibwamu; ni nkwaliiraku ekirenge kyange ni mbiika ku bwereere bwo: niiwo awo, ni nkulayirira, ni ndagaana naiwe endagaanu, bw'atumula Mukama Katonda, n'ofuuka wange. ⁹ Awo ni nkunaabya n'amaizi; niiwo awo, ni nkunaabiryaku dala omusaayi gwo, ni nkusiigaku amafuta. ¹⁰ N'okuvaalisya ne nkuvaalisya omulimu ogw'eidalizi, ni nkunaanika engaito egy'amawu g'entukulu ni nkusiba olwebaagyo olwa bafuta ensa, ni nkubiikaku aliiri. ¹¹ Era ni nkunaanika eby'obuyonjo, ni nteeka ebikomo ku mikono gyo n'omukuufu mu ikoti ryo. ¹² Ne nteeka empeta ku nyindo yo, n'eby'omu matu mu matu go n'engule ensa ku mutwe gwo. ¹³ Bwe wayonjeibwe otyo n'e zaabu n'e feeza; n'ebivaalo byo byabbaire bye bafuta nsa ne aliiri n'omulimu ogw'eidalizi; walyanga obwita obusa n'omujenene gw'enjoki n'amafuta: n'obba musa inu dala, n'obona omukisa okutuusya mu bukulu obw'obwakabaka. ¹⁴ Eiyangwe lyo ne lyatiikirira mu mawanga olw'obusa bwo; kubanga bwabbaire butuukiriire olw'obukulu bwange bwe nabbaire nkutaireku bw'atumula Mukama Katonda. ¹⁵ Naye iwe ni weesiga obusa bwo, ne weefuula omwenzi olw'eitutumu lyo, n'ofuka obukaba bwo ku buli muntu eyabitangawo; bwabbanga bubwe. ¹⁶ Era watoire ku bivaalo byo, ne weekolera ebifo ebigulumivu ebyayonjeibwe n'amabala agatali gamu, n'oyendera ku ibyo: ebifaanana bityo tebiriiza so tebiribba bityo. ¹⁷ N'okwirira n'oirira eby'obuyonjo bwo ebisa eby'e zaabu yange ne by'e feeza yange bye nabbaire nkuwaire, ni weekolera ebifaananyi by'abantu, n'oyenda ku ibyo: ¹⁸ n'oirira ebivaalo byo eby'e idalizi, n'obibiikaku n'oteeka amafuta gange n'o bubaani bwange mu maiso gaabyo. ¹⁹ Era n'e mere yange gye nakuwaire, obwita obusa n'amafuta n'o mujenene gw'enjoki, bye nakuliisyanga, n'okuteeka n'obiteeka mu maiso gabyo okubba eivumbe eisa, ne bibba bityo, bw'atumula Mukama Katonda. ²⁰ Era ate wairiiire abaana bo ab'obwisuka n'ab'obuwala, be wanzaaliire, abo n'obawaayo okubba sadaaka eri ibyo okuliibwa. Obwenzi bwo kyabbaire kigambo kitono, ²¹ n'oikuta n'oita abaana bange, n'obawaayo ng'obabitya mu musyo eri byo? ²² Era mu mizizo gyo gyonagyona n'o mu bwenzi bwo toijukiranga naku gyo butobuto bwo, bwe wabbaire obwereere nga tobiikiibweku, era nga weekulukuunya mu musaayi gwo. ²³ Awo olutuuka obubbiibi bwo bwonabwona nga bumalire okubbaawo, (zikusangire, gikusangire! bw'atumula Mukama Katonda,) ²⁴ wezimbiire ekifo ekikulumbala ne weekolera ekifo ekigulumivu mu buli luguudo. ²⁵ Ozimbire ekifo kyo ekigulumivu buli luguudo we lusibuka, era ofiire obusa bwo okubba eky'omuzizyo, era obikuliire ku bigere buli muyise n'oyongera ku bwenzi bwo. ²⁶ Era oyendere ku Bamisiri, baliraanwa bo, ab'omubiri omunene; n'otumula ku bwenzi bwo okunsunguwalya. ²⁷ Kale, bona, nkugololeireku omukono gwange, era nkendeezerye emere yo eya buliijo, ni nkuwaayo eri okutaka kw'abo abakukyawa, abawala b'Abafirisuuti abakwatiibwe ensoni engira yo ey'obukaba. ²⁸ Era n'oyenda ku Basuuli, kubanga tiwasoboire kwikuta; niiwo awo, oyendere ku ibo, era naye tewanyiwire. ²⁹ Era ate wayongera ku bwenzi bwo mu nsi y'e Kanani okutuusya e Bukaludaaya; era naye n'obwo tebwakunyiyirye. ³⁰ Omwoyo gwo nga munafu! bw'atumula Mukama Katonda, kubanga okola bino byonabyona, omulimu ogw'omukali ow'amawaagali omwenzi; ³¹ kubanga ozimba ebifo byo ebikulumbala buli luguudo we lusibuka, n'okola ekifo kyo ekigulumivu mu buli luguudo; so tobbanga nga mukali mwenzi kubanga onyooma empeera. ³² Omukali alina ibaaye ayenda so! aikirirya abageni mu kifo kya ibaaye so! ³³ Abakali bonabona abenzi babawa ebirabo: naye iwe owa ebirabo byo baganzi bo bonabona, n'obagulirira baize gy'oli okuva mu njuyi gyonagyona olw'obwenzi bwo. ³⁴ Era osoberye ensobya ibiri abakali abandi mu bwenzi bwo, kubanga wabula akusengererya iwe okwenda: era kubanga ogulirira so toweebwa mpeera kyova osobya ensobya eibiri. ³⁵ Kale, ai omwenzi, wulira ekigambo kya Mukama: ³⁶ ati bw'atumula Mukama Katonda nti Kubanga empitambiibbi yo yafukiirwe dala, n'obwereere bwo ne bubiikulwaku olw'obwenzi bwo bwe wayendere ku baganzi bo; era olw'ebifaananyi byonabyona eby'emizizyo gyo n'olw'omusaayi gw'abaana bo gwe wabawaire; ³⁷ kale, bona, ndikuŋaanya baganzi bo bonabona be wasanyukire nabo, n'abo bonabona be watakire, wamu n'abo bonabona be wakyawire; okukuŋaanya ndibakuŋaanya okulwana naiwe enjuyi gyonagyona, era ndibabiikulira obwereere bwo, bonabona babone obwereere bwo. ³⁸ Era ndikusalira omusango ng'abakali abaita obufumbo ne bayiwa omusaayi bwe basalirwa omusango; era ndikuleetaku omusaayi ogw'ekiruyi n'obukyayi. ³⁹ Era ndikuwaayo mu mukono gwabwe, kale balisuula ekifo kyo ekikulumbala ne bamenyaamenya ebifo byo ebigulumivu; era balikwambula ebivaalo byo, ne banyaga eby'obuyonjo bwo ebisa: kale balikuleka ng'oli bwereere ng'obikwirweku. ⁴⁰ Era balikuniinisyaku ekibiina, ne bakukubba Amabbaale, ne bakusumitira dala n'ebitala byabwe. ⁴¹ Era balyokya enyumba gyo omusyo ne batuukirirya emisango ku iwe abakali bangi nga babona; era ndikulekesyaayo obwenzi, so toliwaayo mpeera ate lwo kubiri. ⁴² ntyo bwe ndiikutya ekiruyi kyange ku iwe, n'eiyali lyange bulikuvaaku, ne ntereera ne ntabbaaku busungu ate. ⁴³ Kubanga toijukiranga naku gyo butobuto bwo, naye n'onyiiza mu bino byonabyona; kale, bona, nzena ndireeta engira yo ku mutwe gwo, bw'atumula Mukama Katonda: so tolyongera bukaba obwo ku mizizyo gyo gyonagyona. ⁴⁴ Bona, buli muntu agera engero yakugereranga olugero luno ng'atumula nti bga maye n'o muwala we atyo. ⁴⁵ Oli muwala wa mawo atamwa ibaaye n'abaana be; era oli wo luganda na bagande bo abatamwa ba ibawabwe: mawanyu yabbaire Mukiiti, n'o itawanyu yabbaire Mwamoli. ⁴⁶ No mukulu wo niiye Samaliya abba ku mukono gwo omugooda, iye na bawala be: n'o mwana wanyu atyama ku mukono gwo omulyo niiye Sodomu na bawala be. ⁴⁷ Era naye totambuliranga mu mangira gabwe, so tokolanga ng'emizizyo gyabwe bwe giri; naye ekyo ng'okyeta kigambo kitono inu, n'osinga ibo okubba omukyamu mu mangira go gonagona. ⁴⁸ Nga bwe ndi omulamu, bw'atumula Mukama Katonda, mugande wo Sodomu takolanga, iye waire bawala be, nga iwe bw'okolere, iwe na bawala bo. ⁴⁹ bona, buno niibwo bwabbaire obutali butuukirivu bwa mugande wo Sodomu; amalala n'okwikutanga emere n'okwesiima nga yeegolola byabbaire mu niiye n'o mu bawala be; so tiyanywezerye mukono gwo mwavu n'eyeetaaga. ⁵⁰ Era baalina ekitigi, ne bakola eby'emizizyo mu maiso gange: kyenaviire mbatoolawo nga bwe nasiimire. ⁵¹ So ne Samaliya takolanga kitundu kyo ku bibbiibi byo; naye iwe wayongeira ku mizizyo gyo okusinga ibo, n'oweesya obutuukirivu bagande bo olw'emizizyo gyo gyonagyona gye wakolere. ⁵² Era wena bbaaku ensoni gyo iwe, kubanga osalire omusango bagande bo okusinga; olw'ebibbiibi byo bye wakolere eby'emizizyo okusinga ibo kyebaviire bakusinga obutuukirivu: niiwo awo, era swala obbeeku ensoni gyo kubanga oweeserye bagande bo obutuukirivu. ⁵³ Era ndiiryawo obusibe bwabwe, obusibe bw'e Sodomu na bawala be, n'o busibe bwe Samaliya n'a bawala be, n'o busibe bw'abasibe bo abali wakati mu ibo: ⁵⁴ kaisi obbeeku ensoni gyo iwe, era okwatibwe ensoni olw'ebyo byonabyona bye wakolere, kubanga obasanyusya. ⁵⁵ Era bagande bo, Sodomu na bawala be, baliira mu bukulu bwabwe obw'eira, n'e Samaliya n'a bawala be baliira mu bukulu bwabwe obw'eira, weena n'a bawala bo muliira mu bukulu bwanyu obw'eira. ⁵⁶ Kubanga mugande wo Sodomu omunwa gwo tigumwatulanga ku lunaku olw'amalala go; ⁵⁷ obubbiibi bwo nga bikaali kubiikulwa, nga mu biseera abawala ab'e Busuuli lwe bavumire n'abo bonabona abamwetooloire, abawala aba Bafirisuuti abakugirira ekyeju enjuyi gyonagyona. ⁵⁸ Wabbaireku obukaba bwo n'emizizyo gyo, bw'atumula Mukama. ⁵⁹ Kubanga Ati bw'atumula Mukama Katonda nti ndikukolera dala nga bw'okolere, iwe eyanyoomere ekirayiro n'omenya endagaanu. ⁶⁰ Era naye nze ndiijukira endagaanu gye nalagaine naiwe mu naku egy'obutobuto bwo, era ndinywezya eri iwe endagaanu eteriwaawo. ⁶¹ Kale kaisi noijukira amangira go, n'okwatibwa ensoni, bw'oliweebwa bagande bo, bagande bo abakulu n'a bagande bo abatobato: era ndibakuwa okubba abawala, naye ti lwe ndagaanu yo. ⁶² Era ndinywezya endagaanu yange naiwe; kale olimanya nga ninze Mukama: ⁶³ Kaisi oijukire n'oswala n'oleka okwasama ate omunwa gwo olw'e nsoni gyo; bwe ndimala okukusonyiwa byonabyona bye wakolere, bw'atumula Mukama Katonda.