¹ Awo abamu ku bakaire ba Isiraeri ni baiza gye ndi ne batyama mu maiso gange. ² Awo ekigambo kya Mukama ne kingizira nga kitumula nti ³ Omwana w'omuntu, Abasaiza bano batwaire ebifaananyi byabwe mu mwoyo gwabwe, era batekere enkonge ey'obutali butuukirivu mu maiso gaabwe: nsobola ntya abo okumbuulya n'akamu konka? ⁴ Kale tumula nabo obakobe nti Ati bw'atumula Mukama Katonda nti buli muntu ow'omu nyumba ya Isiraeri atwala ebifaananyi bye mu mwoyo gwe, n'ateeka enkonge ey'obutali butuukirivu bwe mu maiso ge, n'aiza eri nabbi; nze Mukama ndimwiramu mu ebyo ng'olufulube lw'ebifaananyi bye bwe luli; ⁵ kaisi nkwate enyumba ya Isiraeri omwoyo gwabwe ibo, kubanga bonabona baneeyawireku olw'ebifaananyi byabwe. ⁶ Kale bakobe enyumba ya Isiraeri nti ati bw'atumula Mukama Katonda nti mwire mukyuke okuleka ebifaananyi byanyu; era mukyuse amaiso ganyu okuleka emizizyo gyanyu gyonagyona. ⁷ Kubanga buli muntu ow'omu nyumba ya Isiraeri oba ow'o ku banaigwanga ababba mu Isiraeri eyeeyawula nanze n'atwala ebifaananyi bye mu mwoyo gwe n'ateeka enkonge ey'obutali butuukirivu bwe mu maiso ge n'aiza eri nabbi okuneebuulyaku; nze Mukama ndimwiramu nze mwene: ⁸ era ndikakasya amaiso gange okwolekera omuntu oyo, era ndimufuula ekyewuunyo, okubba akabonero n'olugero, era ndimuzikirirya wakati mu bantu bange; kale mulimanya nga ninze Mukama. ⁹ Era oba nga nabbi alibbeyebwa n'atumula ekigambo, nze Mukama nga mbeyere nabbi oyo, era ndimugololeraku omukono gwange, ni muzikirirya wakati mu bantu bange Isiraeri. ¹⁰ Era balyetiika obutali butuukirivu bwabwe: obutali butuukirivu bwa nabbi bulyekankanira dala obutali butuukirivu bw'oyo amwebuulyaku; ¹¹ enyumba ya Isiraeri ereke okuwaba ate okunvaaku waire okweyonoona ate n'okusobya kwabwe kwonakwona; naye babbenga abantu bange, nzena mbbenga Katonda wabwe, bw'atumula Mukama Katonda. ¹² Awo ekigambo kya Mukama ne kingizira nga kitumula nti ¹³ Omwana w'omuntu, ensi bwe nyonoona ng'esoberye, nzena ni ngigololeraku omukono gwange ni menya omwigo ogw'emigaati gyamu, ni ngiweereryaki enjala, ni ngimalamu abantu era n'ensolo; ¹⁴ abo bonsatu, Nuuwa n'o Danyeri n'o Yobu, waire nga babbaire omwo, bandiwonyezeibwe emeeme gyabwe ibo gyonka olw'obutuukirivu bwabwe, bw'atumula Mukama Katonda. ¹⁵ Bwe ndibitya ensolo embiibbi mu nsi n'okugyonoona ne gigyonoona n'okuzika n'ezika, omuntu yenayena n'atasobola kubitamu olw'ensolo egyo; ¹⁶ Abasaiza abo bonsatu waire nga baali omwo, nga bwe ndi omulamu, bw'atumula Mukama, tibandiwonyerye batabne baabwe waire bawala baabwe; ibo bonka bandiwonyezeibwe, naye ensi erizika. ¹⁷ Oba bwe ndireeta ekitala ku nsi ni ntumula nti ekitala, bita mu nsi; n'okumalamu ni ngimalamu abantu n'ensolo; ¹⁸ abo bonsatu waire nga bali omwo, nga bwe ndi omulamu, bw'atumula Mukama Katonda, tibaliwonya bataane baabwe waire bawala baabwe, naye ibo beene baliwonyezebwa bonka. ¹⁹ Oba bwe ndiweererya kawumpuli mu nsi eno, ne ngifukaku ekiruyi kyange mu musaayi, okugimalamu abantu n'ensolo: ²⁰ Nuuwa no Danyeri no Yobu waire nga bali omwo, nga bwe ndi omulamu, bw'atumula Mukama Katonda, tibaliwonya mutaane waabwe waire muwala waabwe; baliwonya emeeme gyabwe ibo gyonka olw'obutuukirivu bwabwe. ²¹ Kubanga ati bw'atumula Mukama Katonda nti Kale tibirisinga inu okubba bityo, bwe ndiweererya emisango gyange eina emizibu ku Yerusaalemi, ekitala n'enjala n'ensolo embiibbi n'o kawumpuli, okukimalamu abantu n'ensolo? ²² Era naye mulisigalamu ekitundu ekifiikirewo ekiritolebwamu ni kitwalibwa, abaana ab'obwisuka n'ab'obuwala: bona, balifuluma baliiza gye muli, mwenw mulibona engira yabwe n'ebikolwa byabwe: kale mulisanyusibwa mu bubiibbi bwe ndeetere ku Yerusaalemi, olwa byonabona bye nkiretereku. ²³ Era balibasanyusya bwe mulibona engira yabwe n'ebikolwa byabwe: kale mulimanya nga tinabalangire bwereere okukola byonabona bye nakolere mu ikyo, bw'atumula Mukama Katonda.