¹ Awo olwatuukire mu mwaka ogw'asatu mu mwezi ogw'okuna ku lunaku olw'omwezi olw'okutaanu, bwe nabbaire ndi mu basibe ku mbali kw'omwiga Kebali, eigulu ne libiikulibwa, ni mbona okwolesebwa kwa Katonda. ² Ku lunaku olw'okutaanu olw'omwezi, niigwo gwabbaire omwaka ogw'okutaanu ogw'okusibibwa kwa kabaka Yekoyakini, ³ ekigambo kya Mukama ne kiziriira dala Ezeekyeri kabona mutaane wa Buuzi mu nsi ey'Abakaludaaya ku mbali kw'omwiga Kebali; omukono gwa Mukama ne gubba ku iye eyo. ⁴ Awo ni moga, era, bona, empunga egikunta olw'amaani ni gifuluma obukiika obugooda, ekireri ekinene n'omusyo ogw'ezingazinga n'okumasamasa okukyetooloire, era mu igwo wakati ne muvaamu ng'eibala erye zaabu etabwirwemu efeeza, eriva mu musyo wakati. ⁵ Era mu igwo wakati ni muva ekifaananyi eky'ebiramu bina. N'embala yaabyo yabbaire eti; byabbaire ekifaananyi eky'omuntu. ⁶ Era buli kimu kyabbaire n'obweni buna, era buli kimu ku ibyo kyabbaire n'ebiwawa bina. ⁷ N'ebigere byabyo byabbaire n'ebigere bigolokofu; n'o munda w'ebigere byabyo nga mufaanana munda w'ekigere ky'enyana: era nga bitangaliija ng'eibala ery'ekikomo ekizigule. ⁸ Era byabbaire n'emikono gy'omuntu wansi w'ebiwawa byabyo ku mpete gyabyo ina: era ebyo ebina byabbaire n'obweni bwabyo n'ebiwawa byabyo biti; ⁹ ebiwawa byabyo byagaitibwe buli kiwawa ne kinaakyo; tibyakyukire bwe byatambwire; byayabire buli kimu nga byesimbire. ¹⁰ Ekifaananyi ky'obweni bwabyo, byabbaire n'obweni bw'omuntu; era ebyo ebina byabbaire n'obweni bw'empologoma ku lumpete olugooda; era ebyo ebina byabbaire n'obweni bw'ente ku lumpete olugooda; ebyo byonabyona byabbaire n'obweni bw'eikookooma. ¹¹ N'obweni bwabyo n'ebiwawa byabyo byabbaire nga byawukire waigulu; ebiwawa bibiri ebya buli kimu byagaitiibwe wamu, n'ebibiri byasandikiire empete gyabyo. ¹² Era buli kimu byayabire nga byesimbire: omwoyo gye gwabanga gwaba, gye byayabire; tebyakyukire bwe byayabire. ¹³ Ekifaananyi ky'ebiramu ebyo, embala yaabyo yabbaire ng'ebisiriirya eby'omusyo ebyaka, ng'embala ey'engada; yayambukanga n'eikira wakati mu biramu ebyo: era omusyo nga gumasamasa n'o mu musyo ne muva enjota. ¹⁴ Ebiramu ne biiruka mbiro ne biirawo ng'ekifaananyi eky'okumyansa kw'eigulu. ¹⁵ Awo bwe nabbaire nga ningiria ebiramu ebyo, bona, olupanka ku itakali ku mbali kw'ebiramu, buli bweni ku bweni bwabyo obuna olupanka olumu. ¹⁶ Embala eyo lupanka n'omulimu gwabwe baafaanana eibala erya berulo: era abo abana babbaire n'ekifaananyi kimu: n'embala yaabwe n'omulimu gwabwe byabbaire nga olupanka oluli wakati w'o lupanka. ¹⁷ Bwe gyatambulanga gyatambuliranga ku mpete gyabwe eina: tibaakyukire bwe batambwire. ¹⁸ Obwekulungirivu bwagyo bwabbaire buwanvu, bwe ntiisya; era abo abana babbaire obwekulungirivu bwabwe nga bwizwire amaiso enjuyi gyonagyona. ¹⁹ Era ebiramu bwe byatambulanga, empanka batambuliranga ku mbali kwagyo: era ebiramu bwe byasitulibwanga okuva ku itakali, empanka gyasitulibwanga. ²⁰ Omwoyo buli gye gwabbanga gwaba, gye gyayabanga; eyo omwoyo gye gwabbanga gwaba: ne mpanka baasitulibwanga ku mbali kwagyo; kubanga omwoyo ogw'ekiramu gwabbaire mu mpanka. ²¹ Ebyo bwe byatambulanga, ne gino gyatambulanga; era ebyo bwe byayemereranga, ne gino gyayemeranga; era ebyo bwe byasitulibwanga okuva ku itakali, empanka gyasitulibwanga ku mbali kwagyo: kubanga omwoyo ogw'ekiramu gwabbaire mu mpanka. ²² Era waigulu w'omutwe ogw'ekiramu wabbairewo ekifaananyi eky'eibbanga, ng'eibala erya kulusitalo ow'entiisya, nga kitimbiibwe ku mitwe gyabyo waigulu. ²³ Era wansi w'eibbanga ebiwawa byabyo byabbaire bigolokofu, ekimu kyabbaire bibiri ebyasaanikiire eruuyi, na buli kimu kyabbaire bibiri ebyasaanikiire eruuyi ku mpete gyabyo. ²⁴ Era bwe byatambulanga, ni mpulira okuwuuma kw'ebiwawa byabyo ng'okuwuuma kw'amaizi amangi, ng'eidoboozi ly'Omuyinza w'ebintu byonabyona, okuwuuma okw'oluyoogaanu ng'okuwuuma kw'eigye: bwe byemereranga, ne biikya ebiwawa byabyo. ²⁵ Era wabbairewo eidoboozi waigulu w'eibbanga eryabbaire waigulu w'emitwe gyabyo: bwe byayemereranga, ne biikya ebiwawa byabyo. ²⁶ Era waigulu w'eibbanga eryabbaire waigulu w'emitwe gyabyo kwabbaireku ekifaananyi eky'entebe, ng'embala ey'eibbaale eya safiro: n'o ku kifaananyi eky'entebe kwabbaire ku ekifaananyi ng'embala ey'omuntu ku iyo waigulu. ²⁷ Ne mbona ng'eibala ery'ezaabu etabwirwemu efeeza, ng'embala ey'omusyo munda mu iyo enjuyi gyonagyona, okuva ku mbala y'enkende ye n'okwambuka; era okuva ku mbala y'enkende ye n'okwika, naboine ng'embala ey'omusyo, era wabbairewo okumasamasa okumwetooloire. ²⁸ Ng'embala eya musoke abba ku kireri ku lunaku olw'amaizi, etyo bwe yabbaire, mu embala ey'okumasamasa enjuyi gyonagyona. Eno niiyo yabbaire embala ey'ekifaananyi eky'ekitiibwa kya Mukama. Awo bwe nakiboine, ni nvuunama amaiso gange, ni mpulira eidoboozi ly'oyo eritumula.