¹ Pawulo, omutume wa Kristo Yesu olw'okutaka kwa Katonda eri abatukuvu abali mu Efeso n'abaikirirya mu Kristo Yesu: ² ekisa kibbenga gye muli n'emirembe ebiva eri Katonda Itawaisu ne Mukama waisu Yesu Kristo. ³ Yeebazibwe Katonda Itaaye wa Mukama waisu Yesu Kristo, eyatuwaire buli mukisa gwonagwona ogw'Omwoyo mu bifo eby'omu igulu mu Kristo: ⁴ nga bwe yatulondera mu iye ng'ensi ekaali kutondebwa, ife okubba abatukuvu ababula kabbiibi mu maaso ge mu kutaka: ⁵ bwe yatwawiire eira okumufuukira abaana ku bwa Yesu Kristo, nga bwe yasiimire olw'okutaka kwe, ⁶ ekitiibwa ky'ekisa kye kaisi kitenderezebwenga, kye yatuwaire obuwi mu oyo omutakibwa: ⁷ eyatuweeserye akununulibwa kwaisu olw'omusaayi gwe, okusonyiyibwa ebyonoono byaisu, ng'obugaiga obw'ekisa kye bwe buli, ⁸ kye yasukiriirye gye tuli mu magezi gonagona n'okutegeera kwonakwona, ⁹ bwe yatutegeezerye ekyama eky'okutaka kwe, nga bwe yasiimire yenka, nga bwe yamaliriire eira mu iye, ¹⁰ olw'obuwanika obw'omu biseera ebituukirivu, okugaitira awamu byonabyona mu Kristo, ebiri mu igulu n'ebiri ku nsi; ¹¹ mu oyo feena mwe twafuukiire obusika bwe twayawuliibwe eira mu kumalirira kw'oyo akozia byonabyona nga bw'ataka mu kuteesia kwe; ¹² ife kaisi tubbe eitendo ly'ekitiibwa kye, ife abaasookere okusuubira mu Kristo: ¹³ era mwena mu iye, bwe mwawuliire ekigambo eky'amazima, enjiri ey'obulokozi bwanyu, mu oyo, n'okwikirirya bwe mwaikiriirye, ne muteekebwaku akabonero n'Omwoyo Omutukuvu eyasuubiziibwe, ¹⁴ niigwo musingo gw'obusika bwaisu, okutuusia envuma ya Katonda lw'erinunulibwa, ekitiibwa kye kitenderezebwe. ¹⁵ Bwe nawuliire okwikirirya Mukama waisu Yesu okuli mu imwe, era kwe mwalagire eri abatukuvu bonabona, ¹⁶ kyenva tindekangayo kwebalya, nga mbatumulaku mu kusaba kwange; ¹⁷ Katonda wa Mukama waisu Yesu Kristo, Itawaisu ow'ekitiibwa, abawe omwoyo ogw'amagezi n'ogw'okubikuliwa mu kumutegeera iye; ¹⁸ nga mumulisibwanga amaiso ag'omwoyo gwanyu, imwe okumanya eisuubi ery'okweta kwe bwe liri, obugaiga obw'ekitiibwa eky'obusika bwe mu batukuvu bwe buli, ¹⁹ era obukulu obusinga einu obw'amaani ge eri ife abaikirirya bwe buli, ng'obuyinza bw'amaanyi ge bwe bukola, ²⁰ ge yakoza mu Kristo, bwe yamuzuukizirye mu bafu, n'amutyamisia ku mukono gwe omuliiro mu bifo eby'omu igulu, ²¹ waigulu einu okusinga okufuga kwonakwona n'obuyinza n'amaani n'obwami na buli liina eryatulwa ti mu mirembe gino gyonka naye ne mu egyo egyaba okwiza: ²² n'ateeka byonabyona wansi w'ebigere bye, n'amuteekawo okubba omutwe ku byonabyona eri ekanisa, ²³ niigwo mubiri gwe, okutuukirira ku oyo atuukiriirya byonabyona mu byonabyona