¹ Kubanga ebyo byonabyona nabiteekere ku mwoyo gwange, okukeeta ebyo byonabyona; ng'abatuukirivu n'abagezigezi n'emirimu gyabwe babbaire mu mukono gwa Katonda: oba nga kutaka oba nga kukyawa omuntu takumaite: byonabyona biri mu mberi yaabwe. ² Byonabyona byekankana okwizira bonabona: waliwo ekigambo ekimu eri omutuukirivu n'omubbiibi; eri omusa n'eri omulongoofu n'eri atali mulongoofu; eri oyo asala sadaaka n'eri oyo atasala sadaaka: ng'omusa bw'ali, alina ebibbiibi bw'ali atyo; n'oyo alayira ali ng'oyo atya ekirayiro. ³ Ekyo kibbiibi mu byonabyona ebikolebwa wansi w'eisana, ng'ekigambo ekimu ekibaizira bonabona: niiwo awo, era omwoyo gw'abaana b'abantu gwizwire obubbiibi, era eiralu liri mu mwoyo gwabwe nga bakaali balamu, awo oluvanyuma, lw'ekyo ne baira mu bafu. ⁴ Kubanga eri oyo agaitibwa n'abalamu bonabona waliwo eisuubi: kubanga embwa enamu esinga empologoma enfu obusa. ⁵ Kubanga abalamu bamaite nga balifa: naye abafu babulaku kye bamaite, so nga tebakaali balina empeera; kubanga ekijukiryo kyabwe kyerabirwa. ⁶ Okutaka kwabwe kwekankana n'okukyawa n'eiyali lyabwe okuzikirira atyanu: so nga tebakaali balina mugabo enaku gyonagyona mu byonabyona ebikolebwa wansi w'eisana. ⁷ Weyabiranga, olyenga emere yo ng'osanyuka, onywenga omwenge gwo n'omwoyo ogujaguzya; kubanga Katonda amalire okwikirirya emirimu gyo. ⁸ Ebivaalo byo bitukulenga enaaku gyonagyona; so n'omutwe gwo tegubulwanga mafuta. ⁹ Bbanga n'omukali gw'otaka n'eisanyu enaku gyonagyona egy'obulamu bwo obutaliimu bw'akuwaire wansi w'eisana, enaku gyo gyonagyona egitaliimu: kubanga ogwo niigwo mugabo gwo mu bulamu, no mu kutegana kwo kw'otegana wansi w'eisana. ¹⁰ Buli kintu omukono gwo kye gubona okukola, okikolenga n'amaani go; kubanga wabula mulimu waire okuteesya waire okumanya waire amagezi mu magombe gy'oyaba. ¹¹ Awo ne ngirayo ne mbona wansi w'eisana ng'ab'embiro ti niibo basinga empaka egy'embiro, so n'ab'amaani ti niibo basinga okulwana, so n'abagezigezi ti niibo bafuna emere, so n'abantu abategeevu ti niibo bafuna obugaiga, so n'abakabakaba ti niibo baganja; naye bonabona bibagwira bugwiri ebiseera n'ebigambo. ¹² Kubanga n'omuntu tamaite kiseera kye: ng'ebyenyanza ebikwatibwa mu butiimba obubbiibi, era ng'enyonyi egikwatibwa mu kakunizo, era batyo abaana b'abantu bateegebwa mu kiseera ekibbiibi, bwe kibagwira nga tebamanyiriire. ¹³ Era naboine amagezi wansi w'eisana ntyo; ne gafaanana mangi gye ndi: ¹⁴ waaliwo ekibuga ekitono n'abasaiza ababbaire omwo ti bangi; kabaka omukulu n'akirumba, n'akizingizya, n'akizimbaku amakomera amanene: ¹⁵ awo ne waboneka omwo omusaiza omwavu omugezigezi, oyo n'awonya ekibuga olw'amagezi ge; era naye ne watabba muntu aijukira omusaiza oyo omwavu. ¹⁶ Kale ne ntumula nti Amagezi gasinga amaani obusa: era naye amagezi g'omwavu ganyoomebwa, ebigambo bye ne batabiwulira. ¹⁷ Ebigambo eby'abagezigezi ebitumulwa akasirise babiwulira okusinga okuwowogana kw'oyo afugira mu basirusiru. ¹⁸ Amagezi gasinga ebyokulwanisya: naye omumu alina ebibbiibi azikirizya ebisa bingi.