¹ Era oijuukiriranga Omutonzi wo mu biseera eby'obuvubuka bwo, enaku embiibbi nga gikaali kwiza n'emyaka nga gikaali kusembera bw'olitumula nti Tingisanyukira n'akamu; ² eisana n'omusana n'omwezi n'emunyenye nga gikaali kuzikizibwa, ebireri ne biira amaizi ng'a gamalire okutonnya. ³ ku lunaku abakuumi b'enyumba kwe balitengerera, abasaiza ab'amaani ne bakutama, n'abo abasa ne balekayo kubanga batono, n'abo abalingizya mu madirisa ne bazikizibwa, ⁴ enjigi ne giigalwawo mu luguudo; eidoboozi ery'okwisya nga liikaikane, ne wabbaawo ayimuka olw'okukunga kw'enyonyi, n'abawala bonabona ab'okwemba bwe baliikaikanyizibwa; ⁵ Niiwo awo, balitya ekyo ekigulumizibwa, ebitiisya ne bibba mu ngira; n'omulogi gulimulisya, n’eideede lirizitowa, ne piripiri aliwaawo: kubanga omuntu ayaba mu nyumba ye ey'olubeerera, abakungi ne batambulatambula mu nguudo: ⁶ omuguwa ogwa feeza nga gukaali kusumulukuka, n'ekibya ekya zaabu nga kikaali kumenyeka, n'ensuwa nga Ekaali kwatika ku nsulo no lupanka nga ekaali kwayatika ku kidiba; ⁷ enfuufu n'eira mu itakali nga bwe yabbaire, omwoyo ne gwiira eri Katonda eyagugabire. ⁸ Obutaliimu obusinga obutaliimu bwonabwona, bw'atumula Omubuulizi; byonabyona butaliimu. ⁹ Era ate kubanga Omubuulizi yabbaire n'amagezi, ne yeeyongera okwegeresya abantu okumanya; Niiwo awo, yafumiintirizanga n'asagira n'aliraanya engero nyingi. ¹⁰ Omubuulzi yasaagiire okubona ebigambo ebikirizibwa, n'ebyo ebyawandiikiibwe n'obugolokofu, niibyo ebigambo eby'amazima. ¹¹ Ebigambo eby'abagezigezi biri ng'emiwunda, era ebigambo eby'ebifunvu by'amakuŋaaniro biri ng'eninga egikomererwa okusa. ebiweebwa okuva eri omusumba omumu. ¹² Era ate, mwana wange, labuka: okukolanga ebitabo ebingi kubulaku gye kukoma; n'okwega einu kukooya omubiri. ¹³ Ekigambo ekyo we kikoma wano; byonabyona biwuliirwe: otyanga Katonda, okwatanga ebiragiro bye; kubanga ekyo niibyo byonabyona ebigwanira omuntu. ¹⁴ Kubanga Katonda alisala omusango gwa buli mulimu, wamu na buli kigambo ekyagisiibwe, oba nga kisa oba nga kibbiibi.