¹ Kale oba nga mwazuukirire wamu ne Kristo, musagirenga ebiri waigulu, Kristo gy'ali ng'atyaime ku mukono omulyo ogwa Katonda. ² Mulowoozenga ebiri waigulu, so ti ebiri ku nsi. ³ Kubanga mwafire, n'obulamu bwanyu bugisiibwe wamu ne Kristo mu Katonda. ⁴ Kristo, obulamu bwaisu, bw'alibonekera, era mwena kaisi ne mubonekebwa wamu naye mu kitiibwa. ⁵ Kale mufiikye ebitundu byanyu ebiri ku nsi; obwenzi, obugwagwa, okwegomba okw'ensoni, omuwudu omubbiibi, n'okuyaayaana, niikwo kusinza ebifaananyi; ⁶ olw'ebyo obusungu bwa Katonda bwiza ku baana abatawulira; ⁷ era mwena mu ebyo niimwo mwe mwatambuliranga eira, bwe mwabbaire abalamu mu ibyo. ⁸ Naye atyanu era mwena mutoolewo byonabyona, obusungu, ekiruyi, eitima, okuvuma, okuloogya eby'ensoni mu munwa gwanyu: ⁹ temubbeyagananga mwenka na mwenka; kubanga mwamweyambwireku omuntu ow'eira wamu n'ebikolwa bye, ¹⁰ ne muvaala omuntu omuyaka, afuulibwa omuyaka olw'okutegeera mu kifaananyi ky'oyo eyamutondere: ¹¹ awo tewasobola kubbaawo Muyonaani n'Omuyudaaya, okutayirirwa n'obutatayilirwa, munaigwanga, Omusukusi, omwidu, ow'eidembe: naye Kristo nibyo ebintu byonabyona ne mu byonabyona. ¹² Kale muvaalenga ng'abalonde ba Katonda, abatukuvu era abatakibwa, omwoyo ogw'ekisa, obusa, okwewombeeka, obuteefu, okugumiikirizia; ¹³ nga muzibiikirizagananga, era nga musonyiwagananga mwenka na mwenka, omuntu yenayena bw'abbanga n'ensonga ku muntu mwinaye; era nga Mukama waisu bwe yabasonyiwire imwe, era mwena mutyo: ¹⁴ ku ebyo byonabyona era muvaale okutakagana, nikyo ekintu ekinyweza okutuukirira. ¹⁵ Era emirembe gya Katonda giramulenga mu myoyo gyanyu, era gye mwayeteirwe mu mubiri ogumu; era mubbenga n'okwebalya. ¹⁶ Ekigambo kya Kristo kibbenga mu imwe n'obugaiga mu magezi gonagona; nga muyigirizagananga era nga mulabulagananga mwenka na mwenka mu zabbuli n'enyembo n'ebiyiiye eby'Omwoyo, nga mwembera Katonda mu kisa mu myoyo gyanyu. ¹⁷ Era buli kye mwakolanga, mu kigambo oba mu kikolwa, mukolerenga byonabyona mu liina lya Mukama waisu Yesu, nga mwebalya Katonda Itawaisu ku bubwe. ¹⁸ Abakali, muwulirenga baibawanyu, nga bwe kiri ekisa mu Mukama waisu. ¹⁹ Abasaiza, mutakenga bakali banyu, so temubakwatirwanga bukambwe. ²⁰ Abaana abatobato, muwulirenga bakaire banyu mu byonabyona, kubanga ekyo niikyo ekisiimibwa mu Mukama waisu. ²¹ Baitwabwe, temunyiizanga baana banyu, balemenga okwiririra omwoyo. ²² Abaidu, muwulirenga bakama banyu ab'omu mubiri mu byonabyona, ti mu kuweereza okw'okungulu ng'abasiimibwa abantu, wabula mu mwoyo ogubula bukuusa, nga mutya Mukama waisu: ²³ buli kye mwakolanga mukolenga n'omwoyo, nga ku bwa Mukama waisu so ti ku bwa bantu; ²⁴ nga mumaite nga mulisasulibwa Mukama waisu empeera ey'obusika: muli baidu ba Mukama waisu Kristo. ²⁵ Kubanga ayonoona aliweebwa kabite nga bwe yayonoonere: so wabula kusosola mu bantu.