¹ Pawulo omutume wa Kristo Yesu olw'okutaka kwa Katonda, ne Timoseewo ow'oluganda, ² era abatukuvu, ab'oluganda abeesigwa mu Kristo ab'omu Kolosaayi: ekisa kibbenga gye muli n'emirembe ebiva eri Katonda Itawaisu. ³ Twebalya Katonda Itaye wa Mukama waisu Yesu Kristo, nga tubasabira enaku gyonagyona, ⁴ bwe twawulire okwikiriria kwanyu mu Kristo Yesu, n'okutaka kwe mulina eri abatukuvu bonabona, ⁵ olw'eisuubi eryagisibwe mu igulu, lye mwawulire eira mu kigambo eky'amazima ag'enjiri, ⁶ eyaizire gye muli; era nga bw'eri mu nsi gyonagyona, ng'ebala ebibala era ng'ekula, era nga ne mu imwe, okuva ku lunaku bwe mwawulire ne mutegeera ekisa kya ⁷ Katonda mu mazima; nga bwe mwayigiriziibwe Epafula omwidu munaisu omutakibwa, niiye muweereza omwesigwa owa Kristo ku lwaisu, ⁸ era eyatukobeire okutaka kwanyu mu Mwoyo. ⁹ Feena kyetuva tetulekaayo, okuva ku lunaku bwe twawulire, okubasabira n'okubeegayirira kaisi mwizulibwe okutegeeranga by'ataka mu magezi gonagona n'okutegeera eby'Omwoyo, ¹⁰ okutambulanga nga bwe kisaanira Mukama waisu olw'okusiimibwa kwonakwona, nga mubalanga ebibala mu buli kikolwa ekisa, era nga mukuliranga mu kutegeera Katonda; ¹¹ nga muyinzisibwanga n'obuyinza bwonabwona, ng'amaani ag'ekitiibwa kye bwe gali, olw'okugumiikiriza kwonakwona n'okuzibiikiriza awamu n'okusanyuka; ¹² nga mwebalya Itawaisu, eyatusaanyizirye ife omugabo ogw'obusika obw'abatukuvu mu musana, ¹³ eyatulokoire mu buyinza obw'endikiriria, n'atutwala mu bwakabaka obw'Omwana we omutakibwa; ¹⁴ imwe tubbenga n'okununulwa, niikwo kusonyiyibwa kw'ebbiibi byaisu: ¹⁵ oyo niikyo ekifaananyi kya Katonda ataboneka, omuberyeberye ow'ebitonde byonabyona; ¹⁶ kubanga mu oyo ebintu byonabyona mwe byatondeirwe, mu igulu ne ku nsi, ebiboneka n'ebitaboneka, oba nga ntebe gya bwakabaka, oba bwami, oba kufuga, oba masaza; ebintu byonabyona byatondeibwe niye, era no ku lulwe; ¹⁷ naye niye w'oluberyeberye mu byonabyona, era ebintu byonabyona bibbaawo mu iye. ¹⁸ Era oyo nigwo omutwe gw'omubiri, niye kanisa: oyo nirwo oluberyeberye, omuberyeberye ow'omu bafu; iye kaisi abbenga ow'oluberyeberye mu byonabyona. ¹⁹ Kubanga Itawaisu yasiimire okutuukirira kwonakwona okubbanga mu iye; ²⁰ n'okutabaganyisia ebintu byonabyona eri iye mwene mu iye, bwe yamalire okuleeta emirembe olw'omusaayi gw'omusalaba gwe; mu iye okutabaganyisia oba eby'oku nsi oba eby'omu igulu. ²¹ Mwena, bwe mwabbaire eira banaigwanga era abalabe mu kulowooza kwanyu mu bikolwa ebibbiibi, naye atyanu yabatabaganyisirye ²² mu mubiri ogw'enyama ye olw'okufa, okubanjula abatukuvu, ababulaku mabala abatasiisikibwa mu maiso ge: ²³ bwe mubba obubeezi mu kwikirirya, nga mugumire, nga temusagaasagana, so nga temuviire mu isuubi ly'enjiri gye mwawulire, eyabuulirwe mu bitonde byonabyona ebiri wansi w'eigulu; nze Pawulo gye nafuukire omuweereza waayo. ²⁴ Atyanu nsanyukire mu bibonoobono byange ku lwanyu, era ntuukirizia ebibulaku mu kubona enaku kwa Kristo mu mubiri gwange olw'omubiri gwe, niiyo e kanisa; ²⁵ nze gye nafuukire omuweereza waayo, ng'obuwanika bwa Katonda bwe buli bwe naweeweibwe gye muli, okutuukirirya ekigambo kya Katonda, ²⁶ ekyama ekyagisiibwe okuva eira n'eira n'emirembe n'emirembe: naye atyanu kyoleseibwe eri abatukuvu be, ²⁷ Katonda be yatakire okutegeeza obugaiga obw'ekitiibwa eky'ekyama kino bwe buli mu b'amawanga, ekyo niye Kristo mu imwe, eisuubi ery'ekitiibwa: ²⁸ niiye gwe tubuulira ife, nga tulabula buli muntu, era nga tuyigiriza buli muntu mu magezi gonagona, kaisi twanjule buli muntu ng'atutukiriire mu Kristo; ²⁹ n'okufuba kye nfubira era, nga mpakana ng'okukola kwe bwe kuli, okukolera mu nze n'amaani.